‏ Judges 16

Samson Gazada

1Bir kúni Samson Gazaǵa bardı. Sol jerde bir buzıq hayaldı kórip qalıp, onıń menen birge túnedi. 2Gazalılarǵa: «Samson usı jerge keldi», – degen xabar jetiwden, olar sol dógerekti qorshap aldı da, tún boyı Samsondı ańlıp, qala dárwazasınıń janında buqqı taslap jattı. Olar: «Kún shıǵıwdan, onı óltiremiz», – dep oylap, tún boyı turǵan jerinen qıymıldamadı.

3Al Samson tún ortasına deyin jattı. Ol tún yarımında ornınan turıp, qala dárwazasın eki jaqlaw hám ilgishi menen qosıp, ornınan qoparıp aldı. Onı iynine qoyıp, Xebronnıń qarsı aldındaǵı tawdıń tóbesine aparıp tasladı.

Samson hám Delila

4Bunnan soń, Samson Sorek oypatlıǵında jasaytuǵın Delila atlı bir qızǵa ashıq bolıp qaldı. 5Filist húkimdarları qızǵa kelip:

– Sen Samsonnıń qúdiretli kúshiniń sırı nede ekenin bilip ber. Onı baylap boysındırıwımız ushın, qalay jeńe alatuǵınımızdı aytıwǵa hiyle menen onı kóndir. Usılay isleseń, bizler saǵan hár birimiz bir mıń bir júz shekel gúmisten beremiz, – dedi.

6Sonda Delila Samsonǵa:

– Iltimas, maǵan bul qúdiretli kúshti qay jerden alıp atırǵanıńdı ayt. Seni boysındırıw ushın, ne menen baylaw kerek? – dep soradı.

7Samson oǵan:

– Eger meni keppegen jeti taza giris penen baylasa, sonda men ápiwayı adam sıyaqlı kúshsiz bolıp qalaman, – dedi.

8Sonda Filist húkimdarları Delilaǵa keppegen jeti taza oq jaydıń girisin ákelip berdi. Delila onıń menen Samsondı bayladı. 9Sol waqıtta ishki bólmede qızdıń jasırınıp turǵan adamları bar edi. Delila Samsonǵa:

– Samson! Filistler bastırıp keldi! – dedi.

Samson baylanǵan girislerdi otqa janǵan jip sıyaqlı úzip tasladı. Solay etip, onıń kúshiniń sırı ashılmay qaldı.

10Sonda Delila Samsonǵa:

– Meni aldap, jalǵan sóylediń. Endi ayt, seni ne menen baylaw kerek? – dedi.

11Samson oǵan:

– Eger meni hesh qollanılmaǵan taza arqan menen baylasa, men ápiwayı adam sıyaqlı kúshsiz bolıp qalaman, – dedi.

12Solay etip, Delila taza arqandı alıp, Samsondı bayladı da:

– Samson! Filistler kiyatır! – dedi.

Sol waqıtta ańlıp otırǵanlar ishki bólmede otır edi. Samson qollarındaǵı arqandı jip sıyaqlı úzip tasladı.

13Delila Samsonǵa:

– Házirge deyin meni aldap, maǵan jalǵan sóylediń. Maǵan aytshı, seni ne menen baylawǵa boladı? – dedi.

Samson oǵan:

– Eger jeti burım shashımdı órmekke qosıp toqıp, onı qazıq penen bekkemleseń, men ápiwayı adam sıyaqlı kúshsiz bolıp qalaman, – dedi.

14Samson uyıqlap atırǵanda, Delila onıń jeti burım shashın órmekke qosıp toqıdı da, qazıq penen bekkemledi. Sońınan ol:

– Samson! Filistler kiyatır! – dedi.

Sonda Samson uyqısınan oyanıp, órmek hám qazıqtı tawar menen qosa shashınan julıp aldı.

15Sonda Delila Samsonǵa:

– Maǵan isenbey turıp, qalayınsha: «Seni jaqsı kóremen», – dep ayta alasań? Mine, sen meni úshinshi márte aldap, qúdiretli kúshińniń sırı nede ekenin aytpay otırsań, – dedi.

16Delila hár kúni usı sózler menen Samsonnıń mazasın alıp, qıynap jiberdi. Aqırında bul Samsonnıń janına batqanlıqtan, 17ol qızǵa óziniń barlıq ishki sırın ashıp:

– Meniń basıma hesh páki tiymegen. Óytkeni men anamnıń qursaǵına túskennen baslap, Qudayǵa baǵıshlanǵanman. Eger shashımdı aldırsam, men óz kúshimdi joytaman hám ápiwayı adam sıyaqlı kúshsiz bolıp qalaman, – dedi.

18Delila Samsonnıń ishki sırınıń barlıǵın ashıp bergenin bilgende, filistlerdiń húkimdarların shaqırttı da:

– Jáne kelińler, óytkeni Samson maǵan óz sırın ashtı, – dedi. Filist húkimdarları qollarına gúmislerin alıp, Delilaǵa keldi. 19Delila Samsondı dizesiniń ústinde uyıqlattı da, adamlarınan birewin shaqırıp, Samsonnıń jeti burım shashın qırqtırdı. Solay etip, Delila Samsonnıń ústinen biylikti óz qolına ala basladı hám onıń kúshi qaytıp qaldı.

20Delila Samsonǵa:

– Samson! Filistler kiyatır! – dedi.

Samson oyanıp: «Burınǵıday ózimdi azat etemen», – dep oyladı. Biraq ol Jaratqan Iyeniń ózin taslap ketkenin bilmegen edi.

21Sonda filistler onı qolǵa alıp, kózlerin oyıp tasladı. Olar Samsondı Gazaǵa aparıp, qola shınjırlar menen bayladı hám qamaqxanada oǵan digirman aydattı. 22Biraq Samsonnıń qırqılǵan shashları óse basladı.

Samsonnıń ólimi

23Filist húkimdarları óz qudayı Dagonnıń húrmetine ullı bayram berip, oǵan qurbanlıqlar beriw hám kewil kóteriw ushın jıynalıp: «Qudayımız dushpanımız bolǵan Samsondı bizlerge táslim etti», – dedi. 24Filist xalqı Samsondı kórgende, ózleriniń qudayına bılay dep alǵıs ayta basladı:

«Óltirip kóp adamlarımızdı,
Elimizdi wayran etken dushpanımızdı,
Qudayımız bizlerge táslim etti».

25Olardıń keypi kóterilgende: «Samsondı alıp kelińler, ol bizlerdiń kewlimizdi kótersin», – dedi. Olar Samsondı qamaqxanadan ákeldirip, onı mazaq qıla basladı. Sonda onı órelerdiń arasına turǵızıp qoyǵan edi. 26Samson óziniń qolınan uslap kelgen xızmetshige:

– Men usı jaydı tirep turǵan órelerge qolımdı qoyıp, olarǵa súyenip turayın, – dedi.

27Butxananıń ishi erkek hám hayallarǵa tolı bolıp, filistlerdiń barlıq húkimdarları da sol jerde edi. Úsh mıńǵa jaqın erkek hám hayallar Samsondı tamasha qılıw ushın tamnıń basında tur edi.

28Samson Jaratqan Iyege:

«Quday Iye, meni esińe al. Jalbarınaman, maǵan jáne bir márte kúsh ber, o Qudayım. Bir umtılǵanda, filistlerden eki kózim ushın ósh alayın», – dep jalbarındı. 29Sońınan ol butxananı tirep turǵan oraylıq órelerdiń birinshisine oń qolın, al ekinshisine shep qolın tiredi de: 30«Filistler menen birge óleyin!» – dedi hám bar kúshi menen órelerdi iyterip jiberdi. Butxana filistlerdiń húkimdarlarınıń hám ishindegi adamlardıń hámmesiniń ústine qulap tústi. Solay etip, Samson ólip baratırıp, tiri waqtında óltirgenlerinen góre kóbirek adamlardı óltirdi.

31Samsonnıń tuwǵan-tuwısqanları hám pútkil úy-ishi kelip, onıń óligin alıp ketti. Olar Samsondı ákesi Manoaxtıń Sora menen Eshtaol arasındaǵı qábirine jerledi. Samson Izrailda jigirma jıl biylik qılǵan edi.