Judg 17 | KaaIBT22L | STEP | Efrayımnıń tawlı úlkesinde Mixa atlı bir adam bar edi.

‏ Judges 17

Mixanıń butları

1 Efrayımnıń tawlı úlkesinde Mixa atlı bir adam bar edi. 2 Mixa anasına:

– Sennen urlanǵan bir mıń bir júz shekel gúmis esińde me? Sen onı urlaǵandı kóz aldımda ǵarǵaǵan ediń-ǵo. Sol gúmis mende, onı men alǵan edim, – dedi.

Sonda anası oǵan:

– Seni Jaratqan Iye jarılqasın, balam! – dedi. 3 Mixa bir mıń bir júz shekel gúmisti anasına qaytarıp berdi.

Al anası:

– Ulımnıń bir jonılǵan hám bir quyma but isletiwi ushın, men bul gúmisti Jaratqan Iyege baǵıshlayman. Ulım, gúmisti ózińe qaytarıp berip atırman, – dedi.

4 Solay etip, anası Mixa qaytarıp bergen gúmisten eki júz shekel alıp, onı zergerge berdi. Zerger onnan bir jonılǵan hám bir quyma but islep berdi. Olar Mixanıń úyine qoyıldı.

5 Mixanıń sıyınıw ushın saldırǵan muxaddes úyi bar edi. Ol bir efod ^{▼▼ Efod – sózlikke qarań.} hám kiyeli músinlerdi isletip, ullarınıń birin ruwxaniy etip tayınladı. 6 Ol dáwirde Izrailda patsha joq bolıp, hár kim ózine durıs bolıp kóringen isti isleytuǵın edi.

7 Sol waqıtları Yahuda urıwınıń Beytlehem qalasında jasap atırǵan lebiyli bir jas jigit bar edi. 8 Ol jasawǵa basqa bir jer tabıw ushın, Yahudanıń Beytlehem qalasınan shıqtı da, jol-jónekey Efrayımnıń tawlı úlkesindegi Mixanıń úyine keldi.

9 Mixa onnan:

– Qay jerden kiyatırsań? – dep soradı. Ol Mixaǵa:

– Yahudanıń Beytlehem qalasınan kiyatırman. Ózim lebiylimen, jasaytuǵın jer izlep júrmen, – dedi.

10 Mixa oǵan:

– Meniń úyimde qalıp, meniń keńesgóyim hám ruwxaniyim bol. Men saǵan jılına on shekel gúmis bereyin, tamaǵıńdı toydırayın hám kiyindireyin, – dedi. 11 Solay etip, lebiyli jigit Mixanıń úyinde jasawǵa kelisim berdi. Mixa da onı óz ulınday kórdi. 12 Mixa lebiylini ruwxaniy etip tayınladı hám ol Mixanıń úyinde jasap qaldı. 13 Sonda Mixa: «Endi men Jaratqan Iyeniń maǵan jaqsılıq qılatuǵının bilemen. Óytkeni meniń lebiyli ruwxaniyim bar», – dedi.