‏ Judges 18

Danlılardıń Layıshqa jaylasıwı

1Sol dáwirde Izrailda patsha joq edi. Sonda Dan urıwı mákanlaytuǵın jer izlep atırǵan edi. Óytkeni olarǵa Izrail urıwları arasında ózlerine tiyisli úles jer ele berilmegen edi. 2Solay etip, danlılar óz urıwındaǵı barlıq tiyreleri ishinen Sora hám Eshtaol qalalarınan bolǵan bes batır jigitti jerlerdi kózden ótkerip, olardı bilip qaytıw ushın jiberdi. Olar jigitlerge:

– Barıp, jerlerdi kózden ótkizińler, – dedi.

Jigitler Efrayımnıń tawlı úlkesinde jaylasqan Mixanıń úyine keldi hám sol jerde túnep qaldı. 3Olar Mixanıń úyiniń janında turǵanda, lebiyli jas jigitti sóylegen sóziniń ózgesheliginen tanıdı hám sol tárepke burılıp, onnan:

– Seni bul jerge kim ákeldi? Bul jerde ne islep atırsań? Ne ushın bul jerdeseń? – dep soradı.

4Lebiyli jigit Mixanıń ózine ne islegenlerin aytıp:

– Mixa meni jalladı, men oǵan ruwxaniylik qılaman, – dedi.

5Sonda danlılar oǵan:

– Bizlerdiń baratırǵan bul jolımızdıń sátli yaki sátsiz ekenin Qudaydan sorap, bilip ber, – dedi.

6Ruwxaniy olarǵa:

– Qáweterlenbey kete berińler, Jaratqan Iye baratırǵan jolıńızda yar boladı, – dep juwap berdi.

7Solay etip, sol bes adam jolǵa shıǵıp, Layıshqa keldi. Olar qala xalqınıń sidonlılar sıyaqlı qáwipsiz, tınısh hám biyǵam ómir súrip atırǵanın kórdi. Bul úlkeniń xalqına húkimin ótkizip, jábir beretuǵın hesh kim joq edi. Olar sidonlılardan uzaqta bolıp, hesh kim menen qarım-qatnas jasamaytuǵın edi.

8Bes jigit Sora hám Eshtaolǵa, urıwlaslarınıń janına qaytqanda, urıwlasları olardan:

– Qanday xabar alıp keldińler? – dep soradı.

9Jigitler olarǵa bılay dep juwap berdi:

– Júrińler, sidonlılarǵa hújim eteyik. Bizler olardıń jerin kórdik, ol júdá jaqsı jer eken. Ne qılıp tursızlar? Irkilmey barıp, oǵan iyelik eteyik. 10Ol jerge barǵanıńızda, biyǵam jasap atırǵan xalıqtı hám júdá keń jerdi kóresizler. Hesh qanday kemshiligi joq ol jerdi Quday qolıńızǵa tapsırıp atır.

11Sonda Dan urıwınan altı júz adam qurallanıp, Sora hám Eshtaoldan jolǵa shıqtı. 12Olar Yahudaǵa kelip, Kiryat-Yarim qalasınıń janında orda qurdı. Sol sebepli Kiryat-Yarimniń batısındaǵı bul jer búgingi kúnge deyin Maxane-Dan ▼

▼ Maxane-Dan – «Dan ordası» degen mániste.

dep ataladı. 13Danlılar sol jerden Efrayımnıń tawlı úlkesine qaray ketip, Mixanıń úyine keldi.

14Layısh jurtın kózden ótkeriwge ketken bes jigit urıwlaslarına:

– Sizler mına úylerdiń birinde efod, kiyeli músinler, jonılǵan bir but hám quyma bir but bar ekenin bilesizler me? Endi ne islew kerekligin ózlerińiz sheshińler, – dedi. 15Sonda olar lebiyli jas jigit jasap atırǵan Mixanıń úyine kelip, lebiyliden hal-awhal soradı. 16Al qurallanǵan altı júz danlı adam dárwazanıń kirer awzında turdı. 17Jerdi kózden ótkergen bes jigit úyge kirip, efodtı, kiyeli músinlerdi hám jonılǵan but penen quyma buttı alıp shıqtı. Ruwxaniy hám qurallanǵan altı júz adam dárwazanıń kirer awzında turǵan edi.

18Olardıń Mixanıń úyine kirip, efodtı, kiyeli músinlerdi hám butlardı alıp shıqqanın kórgen ruwxaniy olardan:

– Ne qılıp atırsızlar? – dep soradı.

19Olar ruwxaniyge:

– Únińdi óshir, awzıńdı jap. Sen bizler menen birge júr de, bizlerge keńesgóy hám ruwxaniy bol. Saǵan bir adamnıń úyinde ruwxaniylik etkeniń jaqsı ma, ya Izraildıń bir urıwı yamasa bir tiyresine ruwxaniylik etkeniń jaqsı ma? – dedi. 20Ruwxaniy quwanıp ketti. Ol efodtı, kiyeli músinlerdi hám buttı alıp, sol adamlar menen birge ketti. 21Danlılar bala-shaǵaların, malların hám dúnya-múlkin aldına salıp, jolǵa shıqtı.

22Danlılar Mixanıń úyinen uzaqlasqanda, Mixanıń qońsı-qobaları jıynalıp, olardı quwıp jetti. 23Olar danlılardıń izinen baqırǵanda, danlılar artına burılıp qarap, Mixaǵa:

– Ne bolıp qaldı, nege adamlardı jıynap keldiń? – dedi.

24Mixa olarǵa:

– Sizler meniń ruwxaniyimdi hám soqtırǵan butlarımdı alıp kettińler. Maǵan ne qaldı ózi? Jáne mennen: «Saǵan ne boldı?» – dep soraǵanıńız nesi?! – dedi.

25Danlılar oǵan:

– Únińdi óshir! Bolmasa, adamlarımızdıń bazıları ǵázeplenip, hújim etse, ózińdi de, shańaraǵıńdı da nabıt qılasań, – dedi. 26Sonnan keyin, danlılar jolların dawam etti. Mixa olardıń ózinen góre kúshlirek ekenligin kórip, úyine qaytıp ketti.

27Al danlılar Mixanıń soqtırǵan zatların hám ruwxaniyin janına alıp, Layıshqa qaray ketti. Olar tınısh hám biyǵam qala xalqın qılıshtan ótkerip, qalaǵa ot berdi. 28Beyt-Rexobtıń janındaǵı oypatlıqta jaylasqan Layısh qalasına járdemge keletuǵın hesh kim bolmadı. Óytkeni Layısh Sidonnan uzaqta bolıp, basqa qalalar menen qarım-qatnas jasamaytuǵın edi.

Dan urıwı qalanı jańadan qurıp, sol jerge ornalasıp qaldı. 29Olar Izraildıń ulı bolǵan babası Dannıń húrmetine qalanı Dan dep atadı. Qalanıń eski atı Layısh edi. 30Danlılar jonılǵan buttı sol jerge ornattı. Muwsanıń aqlıǵı bolǵan Gershomnıń ulı Ionatan hám onıń urpaqları súrginge deyin Dan urıwına ruwxaniylik qıldı. 31Qudaydıń Úyi Shiloda bolǵan waqıt dawamında, danlılar Mixa isletken jonılǵan butqa tabındı.