‏ Judges 19

Lebiyli adam hám onıń toqalı

1Izrailda patsha bolmaǵan dáwirde, Efrayımnıń tawlı úlkesiniń alıs túpkirinde lebiyli bir adam jasaytuǵın edi. Sol lebiyli adam Yahudanıń Beytlehem qalasınan ózine bir toqal aldı. 2Biraq toqalı oǵan opasızlıq etti hám onı taslap, ákesiniń úyine, Yahudanıń Beytlehem qalasına ketip qaldı. Hayal sol jerde tórt ay bolǵanda, 3kúyewi onıń kewlin tawıp, qaytarıp alıp keliw ushın izinen keldi. Ol ózi menen birge xızmetshisin hám eki eshegin alıp kelgen edi. Hayal olardı ákesiniń úyine kirgizdi hám hayaldıń ákesi lebiylini kórgende, onı quwanısh penen kútip aldı. 4Lebiyliniń qáyin atası, yaǵnıy toqalınıń ákesi onı úsh kún qonaq qıldı. Olar sol jerde iship-jedi hám túnep qaldı.

5Tórtinshi kúni olar erte turdı. Qızdıń ákesi ketiwge tayarlanıp atırǵan kúyew balasına:

– Nan-pan jep, hállenip al, sońınan qaytarsızlar, – dedi. 6Ekewi birge otırıp, iship-jep bolǵannan keyin, qáyin atası oǵan:

– Búgin de túnep qalıp, kewlińdi xoshla, – dedi. 7Lebiyli ketpekshi bolıp ornınan turdı, biraq qáyin atası onı jáne túnep qalıwǵa kóndirdi. 8Besinshi kúni lebiyli ketpekshi bolıp, azanda erte turdı. Sonda qáyin atası:

– Iship-jep, hállenip al, kún awǵansha kútiń, – dedi. Solay etip, ekewi birge otırıp, iship-jep aldı.

9Sol adam toqalı hám xızmetshisi menen birge qaytpaqshı bolǵanda, qáyin atası oǵan:

– Qara, kún awıp, kesh bolayın dep tur. Endi búgin de usı jerde qonıp qalıp, kewlińdi xoshla. Erteń erte turıp, jolǵa atlanıp, úyińizge qaytarsızlar, – dedi. 10Biraq sol adam ol jerde jáne túnep qalıwdı qálemedi. Ol toqalın alıp, júk artılǵan eki eshegi menen jolǵa shıqtı hám Ebusqa, yaǵnıy Erusalimge jaqın jerge jetip keldi.

11Olar Ebusqa jaqınlasqanda, kún batayın dep turǵan edi. Sonda xızmetshi xojayınına:

– Ebuslılardıń bul qalasına kirip, usı jerde túnep qalayıq, – dedi.

12Xojayını oǵan:

– Yaq, xalqı izraillılar bolmaǵan jat qalaǵa kirmeymiz, al Gibaǵa baramız, – dedi. 13Keyin lebiyli sózin dawam etip, xızmetshisine:

– Júr, Gibaǵa yamasa Ramaǵa jetip qalayıq. Ekewiniń birewinde túnep qalarmız, – dedi.

14Solay etip, olar jolın dawam etti hám Benyamin urıwınıń Giba qalasına jaqınlasqanda, quyash ta batıp qalǵan edi. 15Olar túnep qalıw ushın, Gibaǵa qaray burıldı da, barıp, qala maydanında otırdı. Biraq hesh kim olardı úyine mirát etpedi.

16Keshte, bir ǵarrı atız jumısınan qaytıp kiyatır edi. Ol Efrayımnıń tawlı úlkesinen bolıp, Gibada jasaytuǵın edi. Al qala xalqı bolsa, benyaminliler edi. 17Ǵarrı qala maydanındaǵı jolawshılardı kórip, lebiyliden:

– Qay jerden kelip, qay jerge baratırsızlar? – dep soradı.

18Lebiyli adam ǵarrıǵa bılay dep juwap berdi:

– Yahudanıń Beytlehem qalasınan kiyatırmız. Efrayımnıń tawlı úlkesindegi uzaq bir jerge, ózim jasaytuǵın jerge ketip baratırmız. Men Beytlehem qalasına barǵan edim, endi Jaratqan Iyeniń úyine qaytıp baratırman. Biraq hesh kim meni úyine mirát etpedi. 19Bizlerde esheklerimiz ushın ot-jem, ózim, toqalım hám xızmetshim ushın awqat hám sharap bar. Bizler hesh nársege mútáj emespiz.

20Ǵarrı oǵan:

– Kewliń toq bolsın. Barlıq kerekli nárselerdi ózim bereyin, tek ǵana kóshede qonıp qalma, – dedi. 21Ǵarrı olardı úyine alıp barıp, esheklerine jem berdi. Qonaqlar ayaqların juwıp, sońınan iship-jedi.

22Olar jańa kewillerin jazıp otırǵanda, qalada jasawshı buzıq adamlar úydi qorshap aldı. Olar qapını qaǵıp, úydiń iyesi bolǵan ǵarrıǵa:

– Úyińe kelgen adamdı sırtqa shıǵar, bizler onıń menen jatayıq, – dep baqırıstı.

23Úy iyesi sırtqa shıǵıp, olarǵa bılay dedi:

– Yaq, tuwısqanlarım, bunday jawızlıq qılmańlar. Bul adam meniń úyime kelgen qonaǵım-ǵo, oǵan bunday masqarashılıqtı islemeńler. 24Mine, úyimde erkek qolı tiymegen qızım hám bul adamnıń toqalı bar. Men olardı sırtqa shıǵarıp bereyin. Sizler olar menen jatıńlar hám olarǵa qálegenińizdi isleńler. Biraq bul adamǵa bunday masqarashılıqtı islemeńler.

25Biraq adamlar onı tıńlamadı. Sonda lebiyli toqalın iyterip sırtqa shıǵardı da, olardıń qolına tapsırdı. Adamlar tún boyı hayaldı zorlap, onıń namısına tiydi hám tańǵa shamalas onı jiberdi. 26Hayal tań sáhárde xojayını qonıp qalǵan úydiń qapısına kelip jıǵıldı hám quyash shıqqansha, sol jerde jattı.

27Hayaldıń xojayını jolın dawam etiw ushın azanda turıp, esikti ashtı. Sonda ol qolların bosaǵaǵa qoyıp jatırǵan toqalın kórdi. 28Ol hayalǵa:

– Ornıńnan tur, ketemiz, – dedi. Biraq hayal juwap bermedi. Lebiyli onı eshegine júklep, úyine qaray júrip ketti.

29Ol úyine jetkende, qolına pıshaq aldı da, toqalınıń óligin on eki bólekke bólip, pútkil Izrail jerine tarqatıp jiberdi. 30Bunı kórgenlerdiń hámmesi: «Izraillılar Mısırdan shıqqalı berli búginge deyin bunday waqıya bolıp kórgen emes. Bul tuwralı oylasıp, keńesińler hám ne islewimiz kerekligin aytıńlar», – desti.