Judg 20 | KaaIBT22L | STEP | Dannan Beer-Shebaǵa deyingi aralıqta hám Gilad jerinde jasaytuǵın pútkil Izrail xalqı jolǵa shıqtı. Olar bir jaǵadan bas shıǵarıp, Mispaǵa, Jaratqan Iyeniń aldına jıynaldı.

‏ Judges 20

Benyamin urıwına qarsı urıs

1 Dannan Beer-Shebaǵa deyingi aralıqta hám Gilad jerinde jasaytuǵın pútkil Izrail xalqı jolǵa shıqtı. Olar bir jaǵadan bas shıǵarıp, Mispaǵa, Jaratqan Iyeniń aldına jıynaldı. 2 Qudaydıń xalqınıń bul jıyınına Izrail xalqınıń hám pútkil urıwlarınıń basshıları qatnasıwǵa keldi. Ol jerde qurallanǵan tórt júz mıń ásker bar edi. 3 Sol arada Benyamin urıwı izraillılardıń Mispaǵa jıynalǵanın esitken edi.

Izraillılar:

– Bul jawızlıqtıń qalay bolǵanın bizlerge túsindirip beriń, – dedi.

4 Óltirilgen hayaldıń lebiyli kúyewi bılay dep juwap berdi:

– Men túnew ushın toqalım menen birge benyaminlilerdiń Giba qalasına keldim. 5 Sonda Gibanıń adamları meni óltirmekshi bolıp, túnde úydi qorshap aldı hám olar toqalımdı zorladı. Toqalım sol sebepli óldi. 6 Men onıń óligin alıp bólekledim hám hár bir bólekti pútkil Izrail jeri boylap jiberdim. Sebebi olar Izrailda jawız hám uyat isti isledi. 7 Háy, Izrail xalqı! Minekey, hámmeńiz usı jerdesiz, endi sizler bul isti qarap shıǵıp, sheshimińizdi aytıńlar.

8 Sol jerdegi pútkil xalıq bir awızdan bılay dedi:

– Bizlerdiń hesh birimiz shatırlarımızǵa ketpeymiz, úylerimizge qaytpaymız. 9 Endi bizler Gibaǵa bılay isleymiz: oǵan shek boyınsha hújim jasaymız. 10 Áskerlerdi azıq-awqat penen támiyinlew ushın, pútkil Izrail urıwlarınan hár júz adamnan on, mıń adamnan júz, on mıń adamnan mıń adam saylap alınadı. Al qalǵanları benyaminlilerdiń Giba qalasına barıp, olardı Izrailda islegen uyat isi ushın jazalaydı.

11 Solay etip, pútkil izraillılar bir jaǵadan bas shıǵarıp, Gibaǵa qarsı jıynaldı.

12 Izrail urıwları Benyamin urıwına adamların jiberip: «Arańızda bunday jawızlıq nege islendi? 13 Gibadaǵı sol buzıq adamlardı házir-aq qolımızǵa tapsırıń. Bizler olardı óltirip, Izraildan jawızlıqtı joq eteyik», – dedi.

Biraq benyaminliler izraillı tuwısqanlarına qulaq salmadı. 14 Izraillılarǵa qarsı urısıw ushın, benyaminliler óz qalalarınan Gibaǵa keldi. 15 Sol kúni Giba xalqınan bolǵan jeti júz aǵla jawıngerden tısqarı, benyaminlilerdiń basqa qalalarınan kelgen, qurallanǵan jigirma altı mıń adam jıynaldı. 16 Olardıń arasında solaqay bolǵan jeti júz aǵla jawınger bar edi. Olardıń hámmesi, hátte, bir tal shashtı nıshan qılıp qoyǵanda da, saqpan menen urıp tiygize alatuǵın edi.

17 Benyaminlilerden basqa, izraillılardan qurallanǵan tórt júz mıń adam jıynaldı. Olardıń hámmesi jawınger adamlar edi. 18 Izraillılar Beyt-Elge barıp, Qudaydan: «Benyaminliler menen urısıwǵa bizlerden birinshi bolıp kim baradı?» – dep soradı. Jaratqan Iye olarǵa: «Birinshi bolıp yahudalılar urısqa shıǵadı», – dedi.

19 Izraillılar azanda jolǵa shıǵıp, Gibanıń qarsı aldına áskeriy orda qurdı. 20 Izraillılar Benyamin urıwı menen sawashqa túsiw ushın, Gibada sap tartıp turdı. 21 Gibadan shıqqan benyaminliler sol kúni izraillılardan jigirma eki mıń adamdı óltirdi. 22 Biraq Izrail xalqı bir-birin jigerlendirip, aldınǵı kúni turǵan jerinde jáne sap tartıp turdı. 23 Sonda izraillılar Beyt-Elge barıp, Jaratqan Iyeniń aldında keshke deyin jıladı hám Jaratqan Iyeden: «Tuwısqanlarımız bolǵan benyaminliler menen jáne urısıwǵa shıǵayıq pa?» – dep soradı. Jaratqan Iye olarǵa: «Awa, olarǵa qarsı urısıńlar», – dedi.

24 Solay etip, izraillılar ekinshi kúni jáne benyaminlilerge qarsı júris qıldı. 25 Sol kúni Benyamin urıwı da Gibadan olarǵa qarsı atlanıp, izraillılardan qolına qılısh kótergen jáne on segiz mıń adamdı óltirdi.

26 Sonda pútkil Izrail xalqı Beyt-Elge barıp, ol jerde Jaratqan Iyeniń aldında otırıp jıladı hám sol kúni keshke deyin oraza tuttı. Jáne de, olar Jaratqan Iyege jandırılatuǵın qurbanlıqlar hám tatıwlıq qurbanlıqların usındı. 27 – 28 Sol waqıtta Qudaydıń Kelisim sandıǵı Beyt-Elde edi. Xaronnıń aqlıǵı, Elazardıń ulı bolǵan Pinexas sol jerde, sandıqtıń janında ruwxaniy bolıp xızmet etetuǵın edi. Izraillılar Jaratqan Iyeden: «Tuwısqanlarımız bolǵan benyaminliler menen urısıwdı dawam eteyik pe yamasa toqtatayıq pa?» – dep soradı. Jaratqan Iye olarǵa: «Urıstı dawam etińler. Sebebi erteń olardı sizlerge táslim qılaman», – dedi.

29 Izraillılar Gibanıń aynalasında buqqı taslap jattı. 30 Olar úshinshi kúni benyaminlilerge qarsı háreketke ótip, burınǵıday qala qarsısında sapqa dizilip turdı. 31 Benyaminliler de olarǵa qarsı shıǵıp, qaladan uzaqlasıp ketti. Olar Beyt-Elge hám Gibaǵa baratuǵın jollarda, ashıq maydanlarda aldınǵısı sıyaqlı izraillılardı óltire basladı. Izraillılardan otızǵa shamalas adam óltirildi.

32 Benyaminliler: «Ótken sapardaǵıday olardı jáne jeńiliske ushıratamız», – desti. Al izraillılar bolsa: «Olardan qashayıq hám olardı qaladan uzaqlastırıp, jollarǵa shıǵarayıq», – desti. 33 Sonda izraillılardıń barlıǵı óz orınlarınan shıǵıp, Baal-Tamarda sapqa dizilip turdı. Gibanıń átirapında buqqıda jatırǵan izraillılar da orınlarınan atlıǵıp shıqtı. 34 Solay etip, Izraildıń on mıń aǵla jawıngeri Gibaǵa hújim jasadı. Ǵıjlaǵan urıs baslandı. Benyaminliler basına túsetuǵın apattan xabarsız edi. 35 Jaratqan Iye benyaminlilerdi izraillılar aldında jeńiliske ushırattı. Izraillılar sol kúni benyaminlilerden qolına qılısh uslaǵan jigirma bes mıń bir júz adamdı óltirdi. 36 Sonda benyaminliler jeńiliske ushıraǵanın túsindi. Al izraillılar artqa sheginip, benyaminlilerge jol berdi. Óytkeni olar Giba aynalasında buqqıda jatırǵanlarǵa isenetuǵın edi. 37 Buqqıdaǵılar tosattan Gibaǵa hújim jasap, qaladaǵı pútkil xalıqtı qılıshtan ótkerdi. 38 Buqqıdaǵılar menen izraillılar arasında kelisilgen bir belgi bar edi. Qalaǵa ot berilip, qoyıw tútinniń aspanǵa kóteriliwi – hújimge ótiwdiń belgisi edi. 39 Sol waqıtta izraillılar sawash maydanınan artqa burılıp, hújimge ótiw kerek edi.

Sol arada benyaminliler izraillılardıń otızǵa jaqın adamın óltirgen edi. Sol sebepten benyaminliler: «Burınǵı sawashtaǵı sıyaqlı, izraillılar bizlerden jáne jeńiledi», – dedi. 40 Biraq qaladan qoyıw tútin kóterile baslaǵanda, benyaminliler artına burılıp qarap, pútkil qaladan aspanǵa tútin kóterilip atırǵanın kórdi. 41 Olar izine burılıp kiyatırǵan izraillılardı kórgende, albırasıp qaldı. Óytkeni olar baslarına apat túskenin bilgen edi. 42 Benyaminliler izraillılardan jol boylap, shólge qaray qashsa da, urıstan qashıp qutıla almadı. Al qalalardan shıqqan izraillılar da olardı qıra baslaǵan edi. 43 Solay etip, izraillılar benyaminlilerdi qorshap aldı hám olardı Gibanıń shıǵısındaǵı jerlerge deyin quwıp, qıyrattı. 44 Benyaminlilerden on segiz mıń adam óltirildi. Olardıń hámmesi de márt áskerler edi. 45 Olardıń aman qalǵanları shólge, Rimmon jartasına qaray qasha basladı. Izraillılar jol-jónekey olardan jáne bes mıń adamdı óltirdi. Olardı Gidomǵa deyin quwıp barıp, jáne eki mıńın óltirdi.

46 Sol kúni benyaminlilerden hámmesi bolıp jigirma bes mıń adam óltirildi. Olardıń hámmesi de qolına qılısh uslaǵan márt áskerler edi. 47 Biraq altı júz adam shólge qashıp barıp, Rimmon jartasın panaladı. Olar sol úńgirde tórt ay qaldı. 48 Izraillılar benyaminlilerge qaytıp barıp, qalalardaǵı adamlardı, mallardı hám dus kelgenniń hámmesin qılıshtan ótkerdi. Aldılarınan shıqqan barlıq qalalarǵa ot berdi.