‏ Judges 21

Benyaminli jigitlerdiń úylendiriliwi

1Izraillılar Mispada: «Hesh birimiz benyaminlilerge qız bermeymiz», – dep ant ishken edi.

2Xalıq Beyt-Elge keldi hám sol jerde Jaratqan Iyeniń aldında keshke deyin otırıp, dad salıp, zar jılastı. 3Olar: «Izraildıń Qudayı Jaratqan Iye! Nege Izrailda bulay boldı? Ne ushın Izraildıń bir urıwı joq bolıp ketti?» – dedi.

4Kelesi kúni xalıq azanda erte turdı da, qurbanlıq orın islep, jandırılatuǵın qurbanlıqlar hám tatıwlıq qurbanlıqların usındı.

5Sonda izraillılar: «Jaratqan Iyeniń aldındaǵı jıyınımızǵa Izrail urıwlarınan qaysı urıw kelmey qaldı?» – dep soradı. Sebebi olar Mispaǵa, Jaratqan Iyeniń aldındaǵı jıyınǵa kelmegenlerdiń sózsiz óltiriletuǵının aytıp, qatań ant ishken edi. 6Izraillılar benyaminli tuwısqanları ushın qayǵırısıp, bılay dedi: «Izrail búgin bir urıwınan ayırıldı. 7Aman qalǵan benyaminlilerge hayal bolatuǵın qızlardı qayaqtan tabamız? Sebebi bizler qızlarımızdı olarǵa hayallıqqa bermeymiz dep, Jaratqan Iye haqı ant ishken edik».

8Sońınan olar: «Mispaǵa, Jaratqan Iyeniń aldına Izrail urıwlarınan kim kelmedi?» – dep soradı. Solay etip, ordadaǵı jıyınǵa Yabesh-Giladtan hesh kimniń kelmegeni málim boldı. 9Óytkeni kelgenler kózden ótkerilgende, Yabesh-Giladtan hesh kim joq edi.

10Sonlıqtan jıynalǵanlar Yabesh-Giladqa on eki mıń márt áskerdi jiberip, olarǵa bılay dedi: «Barıńlar, Yabesh-Gilad xalqın, sonday-aq hayal hám balaların da qılıshtan ótkerińler. 11Orınlaytuǵın isińiz mınadan ibarat: hár bir erkekti hám erkek qolı tiygen hár bir hayaldı óltirińler». 12Olar Yabesh-Gilad xalqı arasınan erkek qolı tiymegen tórt júz qız tawıp, olardı Qanan jerindegi Shilodaǵı ordaǵa alıp keldi.

13Sońınan barlıq jıynalǵanlar Rimmon úńgirindegi benyaminlilerge adam jiberip, tınıshlıq járiyaladı. 14Sonda benyaminliler qaytıp keldi. Jıynalǵanlar Yabesh-Gilad xalqınan tiri qaldırılǵan qızlardı olarǵa hayallıqqa berdi. Biraq qızlardıń sanı olardıń hámmesi ushın jetkiliksiz bolıp shıqtı.

15Izrail xalqı benyaminlilerdiń jaǵdayına qayǵırdı. Óytkeni Jaratqan Iye Izrail urıwlarınıń birligin buzǵan edi. 16Jıyındaǵı aqsaqallar: «Benyaminlilerdiń barlıq hayalları óltirilgenlikten, qalǵan erkeklerdi úylendiriw máselesin qalay sheshemiz?» – dedi. 17Aqsaqallar dawam etip: «Izraildan bir urıw joq bolıp ketpewi ushın, tiri qalǵan benyaminlilerdiń miyrasxorları bolıwı kerek. 18Bizler olarǵa qızlarımızdı hayallıqqa bere almaymız. Sebebi: „Benyaminlilerge qız bergen hár bir izraillı náletlensin“, – dep ant ishken edik», – dedi. 19Sońınan olar: «Minekey, Shiloda hár jılı Jaratqan Iyege arnap bayram ótkiziledi», – dedi. Shilo Beyt-Eldiń arqa tárepinde, Beyt-Elden Shexemge ketetuǵın joldıń shıǵısında, Lebonanıń qublasında jaylasqan edi.

20Solay etip, olar benyaminlilerge bılay dep úyretti: «Barıp, júzim baǵı ishinde jasırınıp turıńlar. 21Dıqqat penen qarap turıńlar. Shilonıń qızları oyınǵa shıqqanda, dárhal júzim baǵınan shıǵıp, hár birińiz bir qızdan uslap alıńlar da, Benyamin jerine alıp qashıńlar. 22Qızlardıń ákeleri yamasa ájaǵaları bizlerge shaǵım jasap kelse, bizler olarǵa: „Benyaminlilerdi bizler ushın keshirińler. Óytkeni tutqınǵa alǵan qızlarımız hámmesine jetpedi. Al sizler qızlarıńızdı óz qálewińiz benen bermegenińiz ushın, ayıplı sanalmaysızlar“, – dep aytamız». 23Benyaminli jigitler usılay isledi. Qızlar oyınǵa túskende, hár bir jigit bir qızdan alıp qashtı. Olar ózleriniń jerlerine qaytıp barıp, qalalar saldı hám sol jerde jasay basladı.

24Sońınan Izrail xalqı sol jerden tarqap, hár biri óz urıwına, tiyresine hám úlesine tiygen jerlerine qayttı.

25Ol dáwirde Izrailda patsha joq bolıp, hár kim ózine durıs bolıp kóringen isti isleytuǵın edi.