‏ Judges 3

1– 2Qanandaǵı urıslardıń hesh birine qatnaspaǵan barlıq izraillılardı sınaw ushın hám hesh sawash tájiriybesi bolmaǵan jańa áwladlardıń sawash tálimin úyreniwi ushın, Jaratqan Iye qaldırǵan milletler mınalar edi: 3filist xalqınıń bes húkimdarı, barlıq qananlılar, sidonlılar hám Baal-Xermon tawınan Lebo-Xamatqa deyingi aralıqta Lebanon tawlarında jasaytuǵın xiwler. 4Jaratqan Iye Izrail xalqın sınaw ushın hám Muwsa arqalı ata-babalarına bergen buyrıqların olardıń orınlaytuǵının yamasa orınlamaytuǵının kóriw ushın, bul milletlerdi olardıń elinde qaldırǵan edi.

5Solay etip, izraillılar qanan, xet, amor, periz, xiw hám ebus xalıqlarınıń arasında jasadı. 6Olar menen qız alısıp, qız beristi hám olardıń qudaylarına tabındı.

Otniel

7Izrail xalqı Jaratqan Iyeniń názerinde jawız bolǵan islerdi isledi. Olar Qudayı Jaratqan Iyeni umıtıp, Baal hám Ashera butlarına tabındı. 8Sonlıqtan Jaratqan Iyeniń Izrailǵa qáhári kelip, olardı Aram-Naharayım patshası Kushan-Rishatayımǵa táslim qıldı. Olar segiz jıl Kushan-Rishatayımnıń qol astında boldı. 9Biraq izraillılar Jaratqan Iyege nala etkende, Jaratqan Iye olarǵa bir qutqarıwshı jiberdi. Olardı qutqarǵan Kalebtiń kishkene inisi Kenazdıń ulı Otniel edi. 10Jaratqan Iyeniń Ruwxı Otnieldiń ústine túsip, ol Izraildı basqardı. Otniel urısqa shıqqanda, Jaratqan Iye Aram patshası Kushan-Rishatayımdı oǵan táslim qıldı hám Otniel Kushan-Rishatayımnan ústin keldi. 11Solay etip, el Kenaz ulı Otnieldiń ólimine deyin qırıq jıl tınıshlıqta jasadı.

Ehud

12Sonnan keyin, izraillılar Jaratqan Iyeniń názerinde jáne jawız bolǵan islerdi isley basladı. Sonıń ushın Jaratqan Iye Moab patshası Eglondı izraillılarǵa qarsı turatuǵınday etip kúshke toltırdı. 13Patsha Eglon ammon hám amalek xalıqların ózine biriktirip alıp, Izrailǵa hújim jasadı. Olar Izraildı jeńiliske ushıratıp, Palma qalasın ▼

▼ Palma qalası – yaǵnıy Erixo.

basıp aldı. 14Solay etip, izraillılar on segiz jıl Moab patshası Eglonnıń qol astında qaldı.

15Biraq izraillılar Jaratqan Iyege nala etkende, Jaratqan Iye olar ushın Ehud atlı bir qutqarıwshını jiberdi. Benyamin urıwınan bolǵan Geranıń ulı Ehud solaqay edi. Bir kúni izraillılar Ehud arqalı Moab patshası Eglonǵa salıqların jiberdi. 16Ehud ózine uzınlıǵı eki qarıs keletuǵın, eki júzi bar bir qanjar islep aldı hám qanjardı kiyiminiń astına, oń sanına baylap qoydı. 17Ehud salıqtı Moab patshası Eglonǵa aparıp berdi. Eglon júdá semiz adam edi. 18Ehud salıqtı bergennen soń, salıqtı kóterip aparǵan adamlardı qaytarıp jiberdi. 19Al ózi bolsa, Gilgaldıń qasındaǵı tas butlardıń janınan keynine qaytıp keldi de, patshaǵa:

– Taqsır, meniń sizge aytatuǵın bir sırım bar, – dedi.

Patsha oǵan:

– Úndeme, – dedi de, qasındaǵı adamlardıń hámmesin sırtqa shıǵarıp jiberdi.

20Ehud joqarıdaǵı salqın bólmesinde jalǵız qalǵan patshaǵa jaqınlap, oǵan:

– Sizge Qudaydan bir xabar alıp keldim, – degende, patsha taxtınan turdı. 21Ehud shep qolı menen oń sanındaǵı qanjardı aldı da, patshanıń qarnına tıqtı. 22Qanjar patshanıń qarnına sabı menen qosıla kirip ketti. Ehud qanjardı suwırıp almaǵanlıqtan, qanjar patshanıń maylı qarnında qalıp qoydı. 23Ehud aywanǵa shıqtı da, joqarıdaǵı bólmeniń qapıların jawıp, qulıplap ketti. 24Ol shıǵıp ketkennen keyin, patshanıń xızmetshileri kelip, joqarıdaǵı bólmeniń qapısınıń ilik turǵanın kórdi de, bir-birine: «Patshamız salqın bólmede dáret sındırıp atırǵan shıǵar», – desti. 25Olar kóp waqıt kútse de, patsha bólmeniń qapısın ashpadı. Sonlıqtan olar giltti alıp, qapını ashıp qarasa, mırzasınıń óligi jerde jatır eken.

26Olar patshanı kútip turǵanda, Ehud tas butlardıń janınan ótip, Seiraǵa qashıp ketti. 27Ehud sol jerge jetip bardı da, Efrayımnıń tawlı úlkesine shıǵıp, kárnay shertti. Izraillılar onıń menen birge tawlardan tómenge tústi. Ehud olardıń aldında jol baslap júrdi. 28Ehud olarǵa:

– Izimnen júrińler, sebebi Jaratqan Iye dushpanıńız bolǵan moablılardı sizlerge táslim etti, – dedi. Ehudtıń izinen kiyatırǵan izraillılar Moabqa ótetuǵın Iordan ótkellerin iyelep, hesh kimdi ótkermedi.

29Olar moablılardıń on mıńǵa shamalas qarıwlı hám kúshli adamın óltirdi. Moablılardıń hesh biri aman qalmadı. 30Sol kúni moablılar izraillılardıń qol astına ótti. El seksen jıl paraxatshılıqta jasadı.

Shamgar

31Ehudtan soń, Anat ulı Shamgar biy boldı. Shamgar filistlerdiń altı júz adamın ógiz aydaytuǵın tayaq penen óltirip, ol da izraillılardı qutqardı.