‏ Judges 4

Debora hám Baraq

1Ehudtıń óliminen keyin, Izrail xalqı Jaratqan Iyeniń názerinde jawız bolǵan islerdi jáne isley basladı. 2Sonlıqtan da Jaratqan Iye izraillılardı Xasorda húkimdarlıq etip atırǵan qananlı patsha Yabinge táslim qıldı. Yabinniń Sisera degen bir sárkárdası bolıp, ol Xaroshet-Goyımda jasaytuǵın edi. 3Yabinniń toǵız júz temir sawash arbası bar edi. Ol izraillılardı jigirma jıl ayawsız ezgenlikten, izraillılar Jaratqan Iyege nala shekti.

4Sol waqıtları payǵambar hayal, Lappidottıń hayalı Debora izraillılarǵa biylik qılatuǵın edi. 5Debora Efrayımnıń tawlı úlkesinde, Rama menen Beyt-El arasındaǵı palma aǵashınıń astında otırıp, aldına kelgen izraillılardıń dawların sheshetuǵın edi. 6Bir kúni Debora Abinoam ulı Baraqtı Kedesh-Naftaliyden shaqırtıp alıp, oǵan:

– Izraildıń Qudayı Jaratqan Iye qasıńa Naftaliy hám Zebulon urıwlarınan on mıń adamdı alıp, Tabor tawına barıwıńdı buyıradı. 7Ol patsha Yabinniń sárkárdası Siseranı, onıń sawash arbaların hám áskerlerin Kishon sayına, seniń aldıńa aparıp, saǵan táslim qıladı, – dedi.

8Baraq Deboraǵa:

– Eger meniń menen birge barsań, baraman. Al birge barmasań, barmayman, – dedi.

9Debora:

– Álbette, seniń menen birge baraman, biraq sen tutqan bul jol ózińe dańq alıp kelmeydi. Sebebi Jaratqan Iye Siseranı bir hayalǵa táslim etejaq, – dedi.

Solay etip, Debora Baraq penen birge Kedeshke ketti. 10Baraq Zebulon hám Naftaliy urpaqların Kedeshke jıynadı. Baraqtıń izine on mıń adam erdi. Debora da onıń menen birge ketti.

11Ken tiyresinen bolǵan Xeber Muwsanıń qáyin atası Xobabtıń urpaǵınan bolǵan tiyreleslerinen bólek shıǵıp, Kedeshke jaqın jerdegi Saanannimdegi terebinf aǵashınıń janına shatırın tikken edi.

12Abinoam ulı Baraqtıń Tabor tawına shıqqanın esitken Sisera 13toǵız júz temir sawash arbasın hám qasındaǵı barlıq áskerlerin Xaroshet-Goyımnan shıǵarıp, Kishon sayına topladı.

14Debora Baraqqa:

– Qáne, atlan! Sebebi bul kún – Jaratqan Iyeniń Siseranı saǵan táslim etetuǵın kúni. Jaratqan Iye seniń aldıńda baradı, – dedi.

Solay etip, Baraq on mıń adamdı ertip, Tabor tawınan tústi. 15Baraq hújim qılǵanda, Jaratqan Iye Siseranı, onıń sawash arbaların hám áskerlerin albırattı. Sonda Sisera sawash arbasınan túsip, jayaw qashıp ketti. 16Baraq onıń sawash arbaların hám áskerlerin Xaroshet-Goyımǵa deyin quwıp bardı. Siseranıń pútkil áskerleri qılısh júzinen ótkerildi. Hesh biri aman qalmadı.

17Al jayaw qashıp ketken Sisera bolsa, kenlerden bolǵan Xeberdiń hayalı Yaeldiń shatırına keldi. Óytkeni Xasordıń patshası Yabin menen Xeberdiń shańaraǵı arasındaǵı qarım-qatnas jaqsı edi.

18Yael Siseranı kútip alıwǵa shıǵıp, oǵan:

– Qorqpań, mırzam. Keliń, shatırıma kiriń, – dedi. Sisera hayaldıń shatırına kirgende, hayal onıń ústine bir japqıshtı jawıp qoydı.

19Sisera:

– Shólledim, ótinish, ishiwge az-maz suw ber, – dedi.

Yael sút mesin ashıp, Siseraǵa sút ishkizgennen keyin, onıń ústin jáne jawıp qoydı.

20Sisera hayalǵa:

– Shatırdıń kirer awzında tur. Eger birew kelip: «Shatırıńda kim bar?» – dep sorasa, «Hesh kim joq», – dep juwap ber, – dedi.

21Xeberdiń hayalı Yael qolına shatırdıń bir qazıǵı menen balǵanı aldı. Ol sharshaǵanlıqtan qattı uyqıǵa ketken Siseranıń qasına áste jaqınlap bardı da, qazıqtı onıń shekesine qaqtı hám qazıq tesip ótip, jerge kirip ketti. Sisera sol zamatta-aq óldi. 22Sol waqıtta Baraq Siseranı quwıp kiyatırǵan edi. Yael Baraqtıń aldınan shıǵıp, oǵan:

– Ishke kir, izlep kiyatırǵan adamıńdı saǵan kórseteyin, – dedi.

Baraq hayaldıń shatırına kirip barǵanda, shekesine qazıq qaǵılıp, ólip atırǵan Siseranı kórdi.

23Solay etip, Quday sol kúni qananlı patsha Yabindi Izrail xalqına boysındırdı. 24Izrail xalqı qanan patshası Yabinge kúnnen-kúnge qarsı turıp, aqırında onı joq qıldı.