‏ Judges 5

Debora hám Baraqtıń jırı

1Debora menen Abinoam ulı Baraq sol kúni bılay jırladı:

2«Izrail kósemleri basshılıq qılǵanda,
Xalıq pidákerlik penen atlanǵanda,
Jaratqan Iyeni alǵıslańlar!
3Tıńlańlar, sizler, háy patshalar!
Háy tóreler, qulaq salıńlar!
Jaratqan Iyeni jırlayman,
Izraildıń Qudayı Jaratqan Iyeni saz shertip alǵıslayman.
4Seirden shıqqanıńda, Jaratqan Iye,
Edom jerinen júris qılǵanıńda,
Jer silkindi, aspannan jawın quydı.
Awa, bultlar jawın quydırdı.
5Tawlar Jaratqan Iyeniń aldında titiredi,
Hátteki, titiredi Sinay tawı,
Izraildıń Qudayı Jaratqan Iyeniń aldında.

6Anat ulı Shamgardıń dáwirinde,
Yaeldiń zamanında kárwanlar júrmey qaldı,
Jolawshılar aylanba joldan júretuǵın boldı.
7Men Izrailda ana bolıp, ortaǵa shıqpaǵanımsha,
Men, Debora ortaǵa shıqqanǵa deyin,
Izrail awılları bosap qaldı.
8Izraillılar jańa qudaylardı tańlaǵanda,
Urıs qalanıń dárwazasına tireldi,
Izraildıń qırıq mıń áskeriniń qolında,
Qalqan da, nayza da kórinbedi.
9Júregim Izraildıń basshıları menen,
Hám xalıq arasındaǵı pidákerler menen birge,
Jaratqan Iyeni alǵıslańlar!
10Háy, aq eshek mingenler,
Háy, gilem ústinde otırǵanlar,
Háy, jolda jayaw júriwshiler, tıńlańlar!
11Qudıqlardıń basındaǵı alaman dawısı,
Jaratqan Iyeniń jeńislerin,
Izrail áskerleriniń jeńislerin ańlatar:

„Sonda Jaratqan Iyeniń xalqı,
Qala dárwazalarına qaray júris qıldı.
12Oyan, Debora, oyan,
Oyan, jırıńdı ayt, oyan!
Háy, Abinoam ulı Baraq,
Ornıńnan tur, alıp júr tutqınlarıńdı“.

13Aman qalǵanlar sárkárdalarınıń janına keldi,
Jaratqan Iyeniń xalqı batırları menen maǵan keldi.
14Amalek jerindegi Efrayımnan keldi,
Benyaminliler de saǵan erdi.
Maxir áwladınan keldi basshılar,
Zebulonnan keldi sárkárdalıq hasasın uslaǵanlar.
15Birge edi Issaxar basshıları Debora menen,
Issaxar urıwı da Baraqtıń izinen,
Oypatlıqqa tústi asıǵıslıq penen.
Biraq Ruben urıwınıń tiyreleri,
Kúshli ekileniwshilik ishinde qaldı.
16Ne ushın qaldıńız súriwler arasında?
Shopanlardıń qoylardı shaqırǵanın esitiw ushın ba?
Biraq Ruben urıwınıń tiyreleri,
Kúshli ekileniwshilik ishinde qaldı.
17Giladlılar Iordan dáryasınıń arǵı jaǵında qaldı,
Ne ushın Dan urıwı kemeler janında qaldı?
Asher urıwı teńiz jaǵasında qaldı,
Óz jaǵıslarına mákan bastı.
18Biraq Zebulon hám Naftaliy xalqı,
Janların ólimge tikti maydannıń biyik jerlerinde.

19Sonda patshalar kelip urıstı,
Taanaxta hám Megiddo suwları jaǵasında,
Qanan patshaları urıstı,
Biraq gúmis te, olja da almadı.
20Sawashqa tústi juldızlar aspannan,
Siseraǵa qarsı urıstı, júrip olar aspandaǵı óz jolınan.
21Kishon dáryası, háy, eski dárya,
Aǵızıp ketti olardı,
Háy janım, kúsh-quwatqa tolıp, alǵa bas.
22Keldi sonda atlar dúsirlep,
Kúshli atlardıń tuyaqları,
Qaldırdı izlerin jerde.
23Jaratqan Iyeniń perishtesi bılay dedi:
„Náletleńler, Meroz qalasın,
Náletler aytıń, onıń xalqına.
Járdemge kelmegeni ushın Jaratqan Iyege,
Batırlarǵa qarsı urısıw ushın“.

24Ken tiyresinen bolǵan Xeberdiń hayalı Yael,
Hayallar arasında mol-mol etip jarılqansın,
Shatırlarda jasaytuǵın hayallar arasında,
Mol-mol etip jarılqansın.
25Suw soraǵanda sút berdi,
Hasıl kesede qatıq usındı.
26Aldı shep qolına shatır qazıǵın,
Oń qolına jumısshınıń balǵasın.
Urdı Siseranı, ezdi basın,
Shekesine qaqtı qazıqtı,
Qazıq ta tesip ótti onıń basın.
27Jıǵıldı Sisera onıń ayaqları astına,
Qulap, jerde sozılıp jattı.
Ol jıǵılıp, Yaeldiń ayaqları astına,
Jıǵılǵan jerinde jansız qaldı.

28Siseranıń anası tereze artınan,
Zarlandı bılay dep, pánjireden qarap:
„Ulımnıń sawash arbası,
Keshikti nege bunshelli?
Esitilmeydi nege elege deyin,
Sawash arbalarınıń sesleri?“
29Juwap berer oǵan janındaǵı dana hayalları.
Anası da ózin jubatıp bılay der:
30„Múmkin, olar oljanı bólisip atırǵan shıǵar,
Hár jigittiń payına bir-eki qızdan.
Siseraǵa oljadan reńli kiyimler,
Awa, oljadan túsken ráńbáráń kiyimler,
Olja alǵannıń hár birine,
Eki ráńbáráń etip kestelengen kiyimler tiyisken shıǵar“.

31Jaratqan Iye! Barlıq dushpanlarıń usılay joq bolsın.
Seni súygenler bolsa,
Pútkil qúdireti menen shıqqan quyash yańlı bolsın!»

Sonnan keyin, el qırıq jıl paraxatshılıqta jasadı.