‏ Lamentations 2

Erusalimniń jazalanıwı

1Áttegene-ay! Qalayınsha Iye ǵázep atına minip,
Qız Siondı qara bult penen qapladı.
Ol Izraildıń gózzallıǵın,
Kóklerden jerge ılaqtırdı.
Qáhári kelgen kúni,
Ayaq qoyǵıshı bolǵan Ibadatxananı eske almadı.

2Yaqıptıń urpaqlarınıń pútkil mákanların,
Iye ayawsız jalmap juttı.
Ǵázebi kelip, qırıp tasladı,
Qız Yahudanıń qorǵanlı qalaların.
Patshalıǵın hám húkimdarların,
Xorlap, jer menen jeksen qıldı.

3Ǵázebi qaynap,
Izraildıń pútkilley shaqın sındırdı.
Dushpan hújim qılǵanda,
Oń qolın Izraildıń ústinen tartıp aldı.
Dógerekti jalmaytuǵın jalınday bolıp,
Yaqıptıń jurtın jandırıp jiberdi.

4Ol dushpan kibi oq jayın tartıp,
Jaw kibi oń qolın iske saldı.
Kózge jaǵımlı kóringenlerdiń hámmesin óltirip,
Qız Sionnıń shatırınıń ústine,
Ǵázebin ot kibi tókti.

5Iye dushpanday bolıp,
Izraildı jalmap juttı.
Barlıq sarayların jalmap jutıp,
Qorǵanlı qalaların wayran etti.
Qız Yahudanıń páriyadın,
Ahıw-nalasın arttırdı.

6Ibadatxanasın baǵdaǵı qostay etip qulattı,
Jıynalatuǵın orındı qarabaqanaǵa aylandırdı.
Jaratqan Iye Sionda belgilengen bayramlardı,
Shabbat kúnlerin umıttırdı.
Qáhár-ǵázepke minip,
Patsha hám ruwxaniylerden júz burdı.

7Iye Óz qurbanlıq ornınan waz keshti,
Muxaddes mákanın tárk etti.
Ibadatxana imaratın,
Dushpan qolına berdi.
Jaratqan Iyeniń Úyinen shıqqan dushpan shawqımı,
Bayram kúnindegi dawısqa megzedi.

8Jaratqan Iye qız Sionnıń diywalın,
Wayran qılıwdı sheshti.
Ol jaqsılap jobalastırdı,
Írayınan qaytpay, hámmesin nabıt qıldı.
Solay etip, sırtqı hám ishki diywallar aza tutpaqta,
Ekewi de haldan taydı.

9Dárwazasın topıraqqa bılǵap,
Iye támbilerin sındırıp, joq qıldı.
Patshasın hám kósemlerin,
Jat milletler arasına súrgin qıldı.
Endi xalıqqa Qudaydıń nızamları úyretilmeydi,
Payǵambarlarına da Jaratqan Iyeden ayan kelmeydi.

10Qız Sionnıń aqsaqalları,
Til qatpastan jerde otırıptı,
Baslarına topıraq shashıp,
Aza kiyimin kiyip alǵan.
Basların tómen salbıratıp alǵan,
Erusalimniń jas qızları da.

11Jas tógiwden kózlerim taldı,
Qálbim órtenbekte.
Xalqımnıń nabıt bolǵanı zardabınan,
Júregim tilkim-tilkim bolmaqta.
Sebebi qala kóshelerinde,
Balalar hám náresteler esten tanıp jatırıptı.

12Olar: «Nan menen suw ber», – dep,
Analarına páriyad qılmaqta,
Jaradar kibi, qala kóshelerinde esten tanıp,
Analarınıń bawırında jan táslim qılmaqta.

13Men saǵan ne aytayın?
Seni nege megzeteyin, o, qız Erusalim?
O, pák qız Sion!
Jubatıwım ushın, seni nege teńeyin?
Jaraqatıń teńizdey tereń,
Saǵan kim shıpa bere aladı?

14Payǵambarlarıń kórgen ayanlar,
Jalǵan hám mánissiz bolıp shıqtı.
Abadanshılıǵıńdı qayta tiklew ushın,
Qılmıslarıńdı betińe aytpadı.
Olar kórgen jalǵan ayanlar,
Seni joldan shıǵardı.

15Joldan ótkenler qol shoshaytıp,
Qız Erusalim, seni tabalap, bas shayqap:
«Gózzallıq kórki,
Pútkil dúnyanıń quwanıshı delingen qala usı ma?» – deydi.

16Barlıq dushpanlar saǵan awzın keń ashıp,
Tabalap, tislerin qayraydı.
«Bizler onı jalmap juttıq!
Mine, biz kútken kún!
Aqırı bul kúnge de jettik, onı kórdik!» – deydi.

17Jaratqan Iye Óz niyetin ámelge asırdı.
Áyyemgi zamanlarda aytqanınday,
Aytqan sózin orınladı,
Seni ayawsız nabıt qıldı.
Awhalıńa dushpanlardı shad qıldı,
Jawlarıńdı kúshke toltırdı.

18Iyege qattı jalbarın!
Háy, qız Sionnıń diywalı!
Kúndiz-túni kóz jasıńdı dárya kibi aǵız,
Ózińe tınıshlıq berme,
Kóz jasıń hasla toqtamasın!

19Tur, túni menen qayta-qayta jalbarın,
Kewlińdegini Iye dárgayında suw kibi tók!
Hár bir kósheniń basında, ashlıqtan qulap atırǵan,
Perzentlerińniń janı ushın,
Qol jayıp, Oǵan jalbarın.

20Qara, Jaratqan Iye, xalqıńnıń awhalın kór!
Qaysı xalıqtı bunday awhalǵa salǵan ediń?
Hayallar erkeletip ósirgen balaların jey ala ma?
Ruwxaniy hám payǵambarlar Muxaddes mákanda óltirile me?

21Jası-ǵarrısı kóshede shańǵa bılǵanıp jatır,
Qız-jigitlerim qılıshtan qırıldı.
Ǵázebiń kelgen kúni Sen olardı óltirdiń,
Hámmesin ayawsız bawızladıń.

22Belgilengen bayram kúnindegidey shaqırıp,
Hár tárepten maǵan qarsı dushpanlardı jıynadıń.
Jaratqan Iyeniń ǵázebi kelgen kúni,
Hesh kim qashıp qutıla almadı,
Birde birewi jan saqlap qala almadı,
Erkeletip ósirgenlerimdi dushpanım qırıp tasladı.