‏ Lamentations 3

Qayǵıǵa batqan adam

1Qudaydıń ǵázep tayaǵın jep,
Azap shekken adamman men.
2Ol meni aydap aparıp,
Jaqtı túspeytuǵın qarańǵılıqta júrgizdi.
3Pútkil kún dawamında qayta-qayta,
Tek maǵan qarsı qolın kóterdi.
4Etimdi, terimdi tozdırıp,
Súyeklerimdi sındırdı.
5Meni qamal qılıp,
Hásiretli awırmanlıq penen qorshap aldı.
6Ázelde álemnen ótkenler sıyaqlı,
Meni qarańǵılıqta jasawǵa májbúrledi.
7Qashpawım ushın, átirapımdı diywal menen qorshadı,
Awır shınjırlar menen kisenledi.
8Páriyad etip, jalbarınǵanımda da,
Ol duwamdı qabıl qılmadı.
9Jonılǵan taslar menen jolımdı tosıp,
Soqpaqlarımdı bılǵastırıp tasladı.
10Quday men ushın buqqıdaǵı ayıwǵa,
Jasırın jatqan arıslanǵa uqsaydı.
11Ol meni jolımnan shıǵarıp, tilkimledi,
Dármansız jalǵız qaldırdı.
12Oq jayın kerip,
Meni oǵına nıshan qıldı.
13Oq qaltasınan oqlar alıp atıp,
Bawırımdı testi.
14Men pútkil xalqıma kúlki bolıp,
Kún boyı aytatuǵın qosıǵına aylandım.
15Ol meni ashshı hásiretke toydırıp,
Juwsannıń ashshı suwın ishtirdi.
16Ózimdi topıraqqa bılǵap,
Tas penen tislerimdi sındırdı.
17Janım tınıshlıqtan mahrum boldı,
Baxıttıń ne ekenin umıttım.
18Ózime ózim: «Shıdamım tawısıldı,
Jaratqan Iyege bolǵan úmitim sóndi», – dedim.
19Azabım hám sergizdanlıǵım tuwralı oylasam,
Ashshı juwsan hám záhár ishkendey bolaman.
20Janım bunı úzliksiz eske alıp,
Ishimde ezilip atır.
21Biraq mınanı júregime túyip,
Sonnan úmit etemen:
22Jaratqan Iyeniń súyispenshiligi sebepli,
Biz joq bolıp ketpedik,
Onıń rehimliligi tawısılmaydı.
23Hár kúni azanda olar jańara beredi,
Onıń sadıqlıǵı ullı!
24Men ishimnen: «Jaratqan Iye – meniń úlesim,
Sonlıqtan men Oǵan úmit baylayman», – dedim.

25Jaratqan Iye Ózine úmit baylaǵanlarǵa,
Ózin izlegenlerge jaqsılıq qıladı.
26Jaratqan Iyeniń qutqarıwın,
Únsiz kútken jaqsı.
27Jaslıqta moyıntırıqqa úyrengen jaqsı.
28Adam únsiz, jalǵız otırsın,
Sebebi bul awırmanlıqtı Jaratqan Iye saldı.
29Et betinen jerge jıǵılsın,
Bálkim, ele úmit bar shıǵar.
30Ózin urǵanǵa shekesin tutsın,
Kórgen xorlıqtı ishine jutsın.

31Sebebi Iye, máńgige taslap qoymaydı.
32Ol qayǵı keltirgen bolsa da,
Ullı miyrimi menen rehim qıladı.
33Adamzattı jazalap, azar berse de,
Bulardı Ol júrek qálewi menen qılmaydı.
34Úlkedegi barlıq tutqınlar,
Ayaq astında ezilgende,
35Quday Taalanıń dárgayında,
Adam huqıqınan mahrum bolǵanda,
36Dawa isinde adamǵa ádalatsızlıq qılınǵanda,
Iye bulardı kórmey me?
37Bulardı Iyeniń Ózi buyırmasa,
Kim aytıp, júzege asıradı?
38Jamanlıq ta, jaqsılıq ta,
Quday Taalanıń awzınan shıqpay ma?
39Óz gúnaları ushın jazasın alsa da,
Tiri qalǵan eken, adam nege shaǵım etsin?

40Jollarımızdı tekserip, sınap kóreyik,
Jaratqan Iyege qaytıp barayıq.
41Keliń, kóklerdegi Qudayǵa qollarımızdı sozıp,
Júregimizdi ashıp bılay deyik:
42«Bizler qılmıs islep, bas kóterdik,
Sen de bizlerdi keshirmediń.

43Ǵázepke minip, bizlerdi quwdaladıń,
Ayawsız óltirdiń.
44Duwalarımız esitilmewi ushın,
Óziń bultlarǵa búrkenip aldıń.
45Bizlerdi milletler arasında,
Taslandı hám sıpırındıqqa aylandırdıń.
46Barlıq dushpanlarımız awzın keń ashıp,
Bizlerdi tabaladı.
47Qáwip hám hiyle,
Qıyraw hám wayranshılıq basımızǵa tústi».

48Xalqımnıń nabıt bolǵanı sebepli,
Kóz jaslarım sel bolıp aǵadı.
49Kóz jasım toqtamay, úzliksiz aǵa beredi,
50Jaratqan Iye kóklerden názer salıp, kórmegenshe.
51Qalamdaǵı barlıq qızlardıń awhalın kórip,
Júregim qayǵı-hásiretke batqan.
52Hesh qanday sebepsiz,
Dushpanlarım meni qustay awladı.
53Janımdı alıw ushın shuqırǵa tasladı,
Ústimnen tas attı.
54Suw basımnan asıp ketti,
Men, óldim dep oyladım.
55Shuqırdıń túbinen,
Atıńdı aytıp shaqırdım, o, Jaratqan Iye.
56«Qulaǵıńdı jawma, dadımdı esit», – dedim.
Sen jalbarınǵanımdı esittiń.
57Shaqırǵanımda, Sen maǵan jaqınlap:
«Qorqpa», – dediń.
58Iye, Sen dawa-arzımdı qorǵap,
Ómirimdi saqlap qaldıń.
59Jaratqan Iye, maǵan qılınǵan nahaqlıqtı Sen kórdiń,
Dawama haq húkimińdi shıǵar.
60Olardıń qalay ósh almaqshı ekenin,
Maǵan qarsı dúzgen jobasın kórdiń.
61Jaratqan Iye, olardıń meni qalay xorlaǵanın,
Maǵan qarsı dúzgen jobasın,
62Dushpanlardıń kún boyı meniń ústimnen,
Qalay gáp qılǵanların esittiń.
63Olarǵa názer sal! Otırsa da, tursa da,
Meni qosıq qılıp, ústimnen kúledi.
64Olarǵa qolları menen islegen isine jarasa,
Jazasın ber, Jaratqan Iye!
65Olardıń júreklerin túnekke búrke,
Seniń ǵarǵısıń ústilerine jawsın!
66Ǵázep penen olardıń izinen qalmay,
Kóklerińniń astınan olardı joq qıl, Jaratqan Iye!