‏ Lamentations 5

Rehim sorap duwa etiw

1O, Jaratqan Iye, basımızǵa túskenler tuwralı oylap kór.
Qara, qanday xor bolǵanımızdı kór!
2Bizge bergen jeriń jat jerlilerge,
Úylerimiz kelgindilerge qaldı.
3Bizler ákesiz jetim bolıp qaldıq,
Analarımız jesirge aylandı.
4Suwımızdı pul tólep ishemiz,
Otınımızdı da satıp alamız.
5Moynımızǵa moyıntırıq salıp jumsamaqta,
Qattı sharshadıq, tınıshlıqtan juda bolǵanbız.
6Qarnımızdı toydırıw ushın,
Mısır menen Assiriyaǵa qol sozdıq.
7Ata-babalarımız gúna isledi, biraq endi ózleri joq.
Bizler bolsaq, olardıń qılmısı ushın jazalanbaqtamız.
8Qullar ústimizden húkimdarlıq qılmaqta,
Olardıń qolınan qutqaratuǵın hesh kim joq.
9Daladaǵı qaraqshınıń qılıshı sebepli,
Janımızdı qáwip astına qoyıp nan tabamız.
10Ashlıqtıń dártinen,
Tandırdan shıqqanday laplap tur terimiz.
11Sionda hayallardıń,
Yahuda qalalarında qızlardıń namısına tiydi.
12Jolbasshılarımız olardıń qolı menen asıp qoyıldı,
Aqsaqallarımız húrmet etilmedi.
13Jigitler digirman tartpaqta,
Balalar awır otın astında tentireklemekte.
14Aqsaqallar qala dárwazasında másláhátlesip otırmaytuǵın boldı,
Jas jigitler artıq qosıq aytpaytuǵın boldı.
15Júregimizdi shadlıq tárk etti,
Oyın-kúlkimiz azaǵa aylandı.
16Basımızdan tajımız túsip qaldı,
Gúna islegenimiz ushın sorımız qurıdı!
17Júregimiz túńildi,
Jılay berip, kózlerimiz gúńgirtlesti.
18Sebebi Sion tawı húwlep bosap qaldı,
Saǵallar ol jerde ızǵıp júr.
19Sen bolsań, o, Jaratqan Iye, máńgige húkimdarlıq qılasań,
Seniń taxtıń áwladtan-áwladqa dawam etedi.
20Nege Sen bizlerdi pútkilley umıttıń?
Nege bizlerdi uzaq waqıt taslap qoydıń?
21Jaratqan Iye, bizlerdi Ózińe qaytar,
Bizler qaytayıq,
Bizlerge burınǵı kúnlerimizdi qaytarıp ber.
22Sen bizlerden pútkilley waz keshken bolsań da,
Ǵázebiń sheksiz bolsa da, solay qıl.