Lev 1 | KaaIBT22L | STEP | Jaratqan Iye Muwsanı shaqırıp alıp, Ushırasıw shatırınan oǵan bılay dedi:

‏ Leviticus 1

Jandırılatuǵın qurbanlıqlar

1 Jaratqan Iye Muwsanı shaqırıp alıp, Ushırasıw shatırınan oǵan bılay dedi:

2 – Sen Izrail xalqına járiyalap mınalardı ayt: «Arańızdaǵı birińiz Jaratqan Iyege qurbanlıq bermekshi bolsa, ol iri yamasa mayda mal usınsın.

3 Eger iri maldan jandırılatuǵın qurbanlıq beretuǵın bolsa, onda ol minsiz hám erkek mal usınsın. Jaratqan Iyeniń bul qurbanlıqtı qabıl etiwi ushın, qurbanlıqtı Ushırasıw shatırınıń aldına alıp kelsin. 4 Sol adam qurbanlıq maldıń basına qolın qoysın. Sonda qurbanlıq adamnıń gúnalarınan pákleniwi ushın qabıl etiledi. 5 Keyin ol buǵanı Jaratqan Iyeniń aldında shalsın. Xaronnıń ulları bolǵan ruwxaniyler buǵanıń qanın alıp kelip, qandı Ushırasıw shatırınıń kirer awzınıń aldındaǵı qurbanlıq orınnıń tórt qaptalına serpip jibersin. 6 Sońınan qurbanlıq berip atırǵan adam jandırılatuǵın qurbanlıqtıń terisin sıyırıp alıp, onı jiliklep bólsin. 7 Al ruwxaniy Xaronnıń ulları qurbanlıq orında ot jaǵıp, ústine otın qalasın. 8 Keyin maldıń jiliklerin, basın hám ish mayların sol ottıń ústine jaylastırsın. 9 Maldıń ishek-qarnı hám tuyaqları suw menen juwılsın. Al ruwxaniy olardıń barlıǵın qurbanlıq orınnıń ústinde tútetip jandırsın. Bul – jandırılatuǵın qurbanlıq, Jaratqan Iyege xosh iyisli sıy boladı.

10 Eger mayda maldan jandırılatuǵın qurbanlıq beretuǵın bolsa, onda ol minsiz bolǵan erkek toqlı yamasa teke usınsın. 11 Onı qurbanlıq orınnıń arqa tárepinde, Jaratqan Iyeniń aldında shalsın. Xaronnıń ulları bolǵan ruwxaniyler qandı qurbanlıq orınnıń tórt qaptalına serpip jibersin. 12 Adam qurbanlıqtı jiliklep, basın hám ish mayların ayırıp alsın. Ruwxaniy olardı qurbanlıq orındaǵı janıp turǵan ottıń ústine jaylastırsın. 13 Qurbanlıqtıń ishek-qarnı hám tuyaqları suw menen juwılsın. Al ruwxaniy olardıń barlıǵın qurbanlıq orınnıń ústinde tútetip jandırsın. Bul – jandırılatuǵın qurbanlıq, Jaratqan Iyege xosh iyisli sıy boladı.

14 Eger kim de kim jandırılatuǵın qurbanlıq etip Jaratqan Iyege qus bermekshi bolsa, onda ol qumırı yamasa jas kepter usınsın. 15 Ruwxaniy onı qurbanlıq orınǵa ákelip, basın úzip alsın hám basın qurbanlıq orınnıń ústinde tútetip jandırsın. Al qustıń qanın qurbanlıq orınnıń qaptalına sıǵıp, aǵızsın. 16 Ruwxaniy qustıń jemsegin ishindegi nárseleri menen birge shıǵarıp, qurbanlıq orınnıń shıǵıs tárepindegi kúl tógiletuǵın jerge taslasın. 17 Soń qustıń qanatlarınan uslap, qustı qaq ayırsın, biraq onı ekige bólip taslamasın. Keyin qustı qurbanlıq orındaǵı janıp turǵan ottıń ústine qoyıp tútetip jandırsın. Bul – jandırılatuǵın qurbanlıq, Jaratqan Iyege xosh iyisli sıy boladı».