Lev 10 | KaaIBT22L | STEP | Xaronnıń ulları Nadab hám Abihu tútetki tútetiletuǵın ıdısların alıp, ishlerine shoq, shoqtıń ústine tútetki saldı. Olar Jaratqan Iye usınıwdı buyırmaǵan ottı Onıń aldına alıp keldi.

‏ Leviticus 10

Nadab hám Abihudıń ólimi

1 Xaronnıń ulları Nadab hám Abihu tútetki tútetiletuǵın ıdısların alıp, ishlerine shoq, shoqtıń ústine tútetki saldı. Olar Jaratqan Iye usınıwdı buyırmaǵan ottı Onıń aldına alıp keldi. 2 Jaratqan Iyeniń otı payda boldı. Ot olardı kúydirip jiberdi hám olar Jaratqan Iyeniń aldında ólip qaldı. 3 Sonda Muwsa Xaronǵa bılay dedi:

– Jaratqan Iyeniń: «Maǵan xızmet etkenlerge muxaddesligimdi kórsetemen,
Pútkil xalıq aldında saltanatımdı ashaman», –

dep aytqanı usı edi. Xaron úndemedi.

4 Muwsa Xaronnıń ákesiniń inisi Uzzieldiń ulları Mishael hám Elsafandı shaqırıp alıp, olarǵa:

– Berman kelińler, tuwısqanlarıńızdıń óli denesin Muxaddes shatırdıń aldınan ordanıń sırtına alıp shıǵıńlar, – dedi. 5 Olar keldi de, Muwsanıń buyırǵanınday, tuwısqanlarınıń denelerin kiyimlerinen uslap, ordanıń sırtına alıp shıqtı.

6 Bunnan soń, Muwsa Xaronǵa hám onıń ulları Elazar menen Itamarǵa bılay dedi:

– Aza tutıp, shashlarıńızdı jaymańlar hám kiyimlerińizdi jırtpańlar. Olay isleseńiz, ólesizler hám Jaratqan Iye pútkil xalıqqa qáhárlenedi. Biraq tuwısqanlarıńız bolǵan pútkil Izrail xalqı Jaratqan Iye tárepinen ot penen joq qılınǵanlar ushın aza tutıwı múmkin. 7 Ushırasıw shatırınıń aldınan hesh jaqqa shıǵıp ketpeńler, bolmasa ólip qalasızlar. Óytkeni sizler Jaratqan Iyeniń maylaytuǵın mayı menen Oǵan baǵıshlandıńız.

Xaron hám onıń ulları Muwsanıń aytqanına boysındı.

Ruwxaniyler ushın qaǵıydalar

8 Jaratqan Iye Xaronǵa bılay dedi:

9 – Óziń de, ullarıń da Ushırasıw shatırına sharap yamasa basqa ótkir ishimlikler iship kirmeńler, bolmasa ólip qalasızlar. Bul áwladlar boyı máńgi qaǵıyda bolsın. 10 Sizler muxaddes nárseni ápiwayı nárseden, haram nárseni hadal nárseden ayıra alıwıńız shárt. 11 Meniń Muwsa arqalı Izrail xalqına bergen barlıq qaǵıydalarımdı olarǵa úyretiwińiz tiyis.

12 Muwsa Xaronǵa hám onıń qalǵan ulları Elazar menen Itamarǵa bılay dedi:

– Jaratqan Iyege berilgen ǵálle sadaqasınıń jandırılmaǵan bólegin alıp, onnan ashıtqısız nan jawıp qurbanlıq orınnıń qasında jeńler. Sebebi bul – júdá muxaddes. 13 Onı muxaddes jerde jeńler. Óytkeni Jaratqan Iyege berilgen sıylardan seniń hám ullarıńnıń payı usı boladı. Maǵan usınday buyrıq berildi. 14 Al joqarı kóterip usınılǵan tós penen baǵıshlap usınılǵan sandı ullarıń hám qızlarıń menen birge taza jerde jeńler. Óytkeni Izrail xalqınıń bergen tatıwlıq qurbanlıqlarınan seniń hám balalarıńnıń payı etip, usılar berildi. 15 Izrail xalqı sıy qılıp bergen may menen birge qurbanlıqtıń san hám tósin ákelsin. Olar tós hám sandı Jaratqan Iyege baǵıshlap, joqarı kóterip usınǵannan keyin, bular saǵan hám seniń ullarıńa beriledi. Jaratqan Iyeniń buyrıǵına muwapıq, bular máńgige seniń hám balalarıńnıń payı boladı.

16 Muwsa gúna qurbanlıǵı ushın beriletuǵın tekeni sorastırǵanda, onıń jandırıp jiberilgenin bildi. Sonda ol Xaronnıń qalǵan ulları Elazar hám Itamarǵa qattı ashıwlanıp bılay dedi:

17 – Ne ushın gúna qurbanlıǵınıń góshin muxaddes jerde jemedińler? Ol – júdá muxaddes qurbanlıq-ǵo! Jaratqan Iyeniń aldında jámiyettiń gúnasın juwıp, olardı páklewińiz ushın, Jaratqan Iye onı sizlerge bergen edi. 18 Tekeniń qanı Muxaddes shatırdıń ishine alıp kirilmegen. Sizlerge buyırǵanımday, tekeni muxaddes jerde jewińiz kerek edi.

19 Xaron Muwsaǵa bılay dedi:

– Olar búgin Jaratqan Iyege gúna qurbanlıǵın hám jandırılatuǵın qurbanlıqtı berdi. Al meniń basıma usınday is tústi! Búgin men gúna qurbanlıǵınıń góshinen jegenimde, bul Jaratqan Iyege unar ma edi?

20 Bul sózdi esitip, Muwsa buǵan ırazı boldı.