‏ Leviticus 11

Hadal hám haram haywanlar

1Jaratqan Iye Muwsa menen Xaronǵa bılay dedi:

2– Izrail xalqına bılay dep aytıńlar: «Jer betinde jasaytuǵın haywanlardan mınalardıń góshin jewińizge boladı: 3tuyaqları tereń etip ekige ayırılǵan asha tuyaqlı hám gúyis qaytaratuǵın haywanlardıń hámmesin. 4Biraq bul haywanlardan tek mınalardıń góshin jewińizge bolmaydı: túye gúyis qaytaradı, biraq onıń tuyaǵı ekige ayırılmaǵan. Sonlıqtan ol sizler ushın haram boladı. 5Daman ▼

▼ Daman – surokqa uqsaytuǵın haywan.

gúyis qaytaradı, biraq onıń tuyaǵı joq. Sonlıqtan ol sizler ushın haram boladı. 6Qoyan gúyis qaytaradı, biraq onıń tuyaǵı joq. Sonlıqtan ol sizler ushın haram boladı. 7Shoshqa ekige ayırılǵan, asha tuyaqlı bolǵanı menen, ol gúyis qaytarmaydı. Sonlıqtan ol sizler ushın haram boladı. 8Usı haywanlardıń góshin jemeńler hám olardıń óligine de qol tiygizbeńler. Olar sizler ushın haram sanaladı.

9Suwda jasaytuǵın haywanlardan mınalardıń góshin jewińizge boladı: teńizde, suwlarda jasaytuǵın qalashlı hám qabırshaqlı haywanlardıń góshin jewińizge boladı. 10Teńizde hám suwlarda jasaytuǵın qalashsız hám qabırshaqsız haywanlardıń hámmesi sizler ushın mákiriw sanaladı. 11Bular sizler ushın jerkenishli sanaladı. Olardıń góshin jemeńler hám óliginen jerkenińler. 12Suwda jasaytuǵın qalashsız hám qabırshaqsız haywanlardıń hámmesi sizler ushın jerkenishli sanaladı.

13Mına quslardı jerkenishli dep bilip, olardıń góshin jemeńler: búrkit, kúshegen, qara qus, 14shayqus, lashın hám onıń túrleri, 15ǵarǵanıń barlıq túrleri, 16úki, batpaq bayıwlısı, shaǵala hám qarshıǵanıń túrleri, 17úy bayıwlısı, qarabay, qulaqlı japalaq, 18aq quw, uzaqsha, sipa, 19láylek hám qutannıń túrleri, ópepek hám jarǵanat.

20Qanatlı shıbın-shirkeylerdiń hámmesi sizler ushın jerkenishli. 21Al olardıń ishindegi tek ǵana uzın ayaqları menen sekirip júretuǵınların jewińizge boladı. 22Olar: shegirtkeniń barlıq túrleri, shekshek shegirtke, qara shegirtke hám usılardıń barlıq túrleri. 23Basqa shıbın-shirkeylerdiń hámmesi sizler ushın jerkenishli.

24Tómendegi haywanlar sizlerdi haramlaydı, olardıń óligine bir jerin tiygizgen adam keshke deyin haram sanaladı. 25Kim de kim olardıń óligin tasısa, ol kiyimlerin juwıwı tiyis hám ol keshke deyin haram sanaladı. 26Tuyaǵı ekige ayırılǵan, biraq tuyaǵındaǵı jarıǵı tereń bolmaǵan hám gúyis qaytarmaytuǵın hár bir haywan sizler ushın haram boladı. Olarǵa bir jerin tiygizgen adam da haram sanaladı. 27Tórt ayaqlı haywanlardan pánjelerin jerge basıp júretuǵın haywanlar da sizler ushın haram boladı. Olardıń óligine bir jerin tiygizgen adam keshke deyin haram sanaladı. 28Olardıń óligin tasıǵan adam kiyimlerin juwsın hám ol keshke deyin haram sanaladı. Óytkeni bul haywanlar sizler ushın haram.

29Jer bawırlap júriwshi mına haywanlar da sizler ushın haram sanaladı: górtıshqan, tıshqan, kesirtkeniń túrleri, 30gekkon, eshkemer, diywal kesirtkesi, shól kesirtkesi, xameleon. 31Barlıq jer bawırlawshılar ishinde sizler ushın haram dep sanalatuǵınları usılar. Olardıń óligine bir jerin tiygizgen adam keshke deyin haram sanaladı. 32Olardıń birewiniń óligi bir nárseniń ústine túsip ketse, onı haram qıladı. Sol hár bir iste qollanılatuǵın aǵash ıdıs, kiyim, teri, ya kenep bolsın, olardı suwǵa salıp qoyıw kerek. Olar keshke deyin haram sanalıp, sońınan hadal sanaladı. 33Al eger haywannıń óligi ılay ıdıstıń ishine túsip ketse, onda ıdıstıń ishindegi hár qanday nárse haram sanaladı hám ıdıs sındırıp taslanıwı kerek. 34Bunday ıdıstaǵı suw iship-jewge bolatuǵın azıq-awqatqa tamıp ketse, onda bular haram sanaladı. 35Usınday haywanlardıń biriniń óligi neniń ústine tússe de, sonı haram qıladı. Ol tandırǵa yamasa oshaqqa túsken bolsa, onda olar buzıp taslanıwı tiyis. Sebebi olar haram boladı hám sizler ushın da haram sanaladı. 36Biraq ólik túsken bulaq yamasa suw saqlaǵısh ǵana hadal sanaladı. Al haywanlardıń óligine bir jerin tiygizgen adam haram sanaladı. 37Eger usı haywanlardıń biriniń óligi egiletuǵın tuqımǵa tússe, tuqım hadal bolıp qala beredi. 38Biraq eger ol suwǵa salınǵan tuqımnıń ústine tússe, tuqım sizler ushın haram sanaladı.

39Eger góshin jewge bolatuǵın haywan haram ólse, onıń óligine bir jerin tiygizgen adam keshke deyin haram sanaladı. 40Onıń góshinen jegen adam kiyimlerin juwıwı tiyis hám ol keshke deyin haram sanaladı. Ólikti tasıǵan adam da kiyimlerin juwıwı tiyis. Bunday adam keshke deyin haram sanaladı.

41Jer bawırlap júriwshi barlıq haywanlardı mákiriw sanańlar. Olardı jemeńler. 42Qarnı menen súyretilip júriwshi bolsın, tórt ayaqlı jer bawırlawshı hám kóp ayaqlı janıwarlar bolsın, olardıń hesh birin jemeńler. Óytkeni olar jerkenishli. 43Olardıń hesh biri menen ózińizdi mákiriw etpeńler, olar arqalı haram bolıp qalmańlar. 44Sebebi Men – sizlerdiń Qudayıńız Jaratqan Iye bolaman. Muxaddes bolıw ushın ózlerińizdi Maǵan baǵıshlańlar, sebebi Men – muxaddespen. Jer bawırlawshılardıń hesh biri menen ózlerińizdi haramlamańlar. 45Qudayıńız bolıw ushın, sizlerdi Mısırdan shıǵarǵan Jaratqan Iye – Men bolaman. Muxaddes bolıńlar, óytkeni Men – muxaddespen. 46Haywanlar, quslar, suwda jasawshı hár túrli haywanlar hám jer bawırlawshılar tuwralı qaǵıydalar usı boladı. 47Haramdı hadaldan, jewge bolatuǵın haywanlardı jewge bolmaytuǵın haywanlardan ayırıp bilińler!»