Lev 12 | KaaIBT22L | STEP | Jaratqan Iye Muwsaǵa bılay dedi:

‏ Leviticus 12

Bosanǵan hayaldıń tazalanıwı

1 Jaratqan Iye Muwsaǵa bılay dedi:

2 – Izrail xalqına bılay dep ayt: «Eger bir hayal hámiledar bolıp, ul tuwsa, ol etegi kelgen kúnleri sıyaqlı, jeti kún haram sanaladı. 3 Onıń balası segiz kúnliginde súnnet etilsin. 4 Hayaldıń qannan tazalanıw múddeti segizinshi kúnnen baslap, jáne otız úsh kún dawam etsin. Bul shille waqtı tamam bolmaǵansha, hayal muxaddes nársege qol tiygizbewi hám Muxaddes shatırǵa barmawı tiyis. 5 Eger hayal qız tuwsa, ol eki hápte dawamında etegi kelgen kúnleri sıyaqlı haram sanaladı. Sonnan soń, hayaldıń qannan tazalanıw múddeti alpıs altı kún bolsın.

6 Ul yamasa qız tuwǵan hayaldıń tazalanıw múddeti pitkennen soń, ol jandırılatuǵın qurbanlıq ushın bir jasar toqlı, gúna qurbanlıǵı ushın bir jas kepter yamasa bir qumırını Ushırasıw shatırınıń aldına ákelip, ruwxaniyge bersin. 7 Ruwxaniy olardı Jaratqan Iyeniń aldında qurbanlıqqa berip, hayal ushın páklew rásimin ótkersin. Sonda hayal qan ketiwden tazalanǵan bolıp sanaladı. Ul yamasa qız tuwǵan hayalǵa baylanıslı qaǵıyda usı boladı.

8 Eger hayaldıń qoshqar beriwge shaması bolmasa, onda ol birewin jandırılatuǵın qurbanlıq, al ekinshisin gúna qurbanlıǵı ushın eki qumırı yamasa eki jas kepter ákelsin. Sonda ruwxaniy hayal ushın páklew rásimin ótkeredi hám hayal taza sanaladı».