Lev 13 | KaaIBT22L | STEP | Jaratqan Iye Muwsa menen Xaronǵa bılay dedi:

‏ Leviticus 13

Teri kesellikleri tuwralı

1 Jaratqan Iye Muwsa menen Xaronǵa bılay dedi:

2 – Denesinde jaman teri keselligine aylanıwı múmkin bolǵan daq, bórtpe yamasa aqtańlaǵı bar adam ruwxaniy Xaronǵa yamasa onıń ruwxaniy ullarınıń birine aparılsın. 3 Ruwxaniy teridegi jaranı tekserip shıqsın. Eger jaranıń ústindegi qıl aǵarıp, jara oyılǵan bolsa, onda bul – jaman teri keselligine tán jara. Bunday jaǵdayda terisindegi jaranıń usınday ekenligi anıqlanǵan adamdı ruwxaniy haram dep járiyalasın. 4 Al eger adamnıń terisinde aqtańlaq bolǵanı menen, ol oyılmaǵan hám ústindegi qıllar aǵarmaǵan bolsa, onda ruwxaniy kesel adamdı jeti kún basqalardan bóleklep qoysın. 5 Jetinshi kúni ruwxaniy jaranı jáne tekserip kórsin. Eger jara sol halında qalıp, terige jayılmaǵan bolsa, onda kesel adamdı jáne jeti kún bóleklep qoysın. 6 Ruwxaniy jetinshi kúni kesel adamdı taǵı tekserip kórsin. Eger jara terige jayılmaǵan hám aldınǵısınan góre bilinbey baratırǵan bolsa, onda ol keseldi hadal dep járiyalasın. Bul – ápiwayı bórtpe bolǵanı. Kesel adam kiyimlerin juwsın hám sonda ol hadal dep sanaladı. 7 Ruwxaniyge tekserilip, hadal dep sanalǵannan keyin, sol adamnıń terisindegi bórtpe jayıla baslasa, ol qaytadan ruwxaniyge kórinsin. 8 Ruwxaniy adamdı taǵı tekserip shıqsın. Eger adamnıń terisindegi bórtpe jayılǵan bolsa, onda ruwxaniy onı haram dep járiyalasın. Demek, sol adamnıń jaman teri keselligine shalınǵanı.

9 Usı keseldiń belgisi bar adam ruwxaniyge aparılıp, 10 ruwxaniy onı tekserip shıqqanda, teride aq daq tabılsa, daqtıń ústindegi qıllar da aq bolıp, ol awzı ashıq jara bolsa, 11 bul jazılmaytuǵın teri keselligi bolǵanı. Ruwxaniy adamdı haram dep járiyalasın, onı bóleklep qoyıwdıń paydası joq. Sebebi ol adam álle qashan haram bolıp esaplanadı.

12 Eger kesellik jayılıp, jara sol adamdı basınan ayaǵına deyin qaplaǵan bolsa, 13 onda ruwxaniy onı tekserip shıqsın. Eger barlıq denesi taza terige qaplanǵan bolsa, ruwxaniy onı hadal dep járiyalasın. 14 Biraq eger jaranıń awzı ashıq hám qızarǵan bolsa, onda adam haram sanaladı. 15 Ruwxaniy qızarǵan, awzı ashıq jara kórse, adamdı haram dep járiyalasın. Usınday jara haram bolıp, bul jaman teri keselliginiń belgisi. 16 – 17 Eger jaranıń awzı pitip, tek ǵana aq daq qalǵan bolsa, onda ruwxaniy tekserip shıǵıp, ol adamdı hadal dep járiyalasın.

18 Eger birewdiń terisine shıyqan shıǵıp, ol jazılıp ketken bolsa, 19 biraq shıyqannıń ornında aq yamasa aqshıl qızıl reńdegi aqtańlaq payda bolsa, ol ruwxaniyge kóriniwi tiyis. 20 Ruwxaniy onı tekserip shıqsın. Eger daq tereń oyılıp, ústindegi túkler aǵarǵan bolsa, onda ol adamdı haram dep járiyalasın. Bul – shıyqannıń ornına shıqqan jaman teri keselligi bolǵanı. 21 Biraq eger ruwxaniy teksergende, daqtıń ústindegi túktiń aǵarmaǵanın kórse, jara tereń oyılmay, aldınǵısınan góre bilinbey baratırǵan bolsa, onda ol adamdı jeti kún basqalardan bóleklep qoysın. 22 Eger usı waqıt dawamında jara jayılıp baslaǵan bolsa, ruwxaniy ol adamdı haram dep járiyalasın. Óytkeni bul – jaman teri keselligi bolǵanı. 23 Al eger aqtańlaq sol halında qalıp, jayılmaǵan bolsa, bul tek ǵana shıyqannan qalǵan tırtıq bolǵanı. Ruwxaniy ol adamdı hadal dep járiyalasın.

24 Eger birew kúyip qalıp, kúygen teride qızǵısh yamasa aq daq payda bolsa, 25 onda ruwxaniy jaraqattı tekserip shıqsın. Aqtańlaqtıń ústindegi túkler aǵarıp, daq tereń oyılǵan bolsa, demek, bul – kúygen teriniń ornında payda bolǵan jaman teri keselligi. Ruwxaniy bunday adamdı haram dep járiyalasın. 26 Biraq eger ruwxaniy aqtańlaqtaǵı túktiń aǵarmaǵanın kórse, daq tereń oyılmay, aldınǵısınan góre bilinbey baratırǵan bolsa, onda ruwxaniy ol adamdı jeti kún basqalardan bóleklep qoysın. 27 Jetinshi kúni ruwxaniy onı jáne tekserip kórsin. Eger daq terige jayılǵan bolsa, onda ol adamdı haram dep járiyalasın. Óytkeni ol jaman teri keselligine shalınǵan. 28 Eger teridegi aqtańlaq sol halında qalıp, terige jayılmaǵan hám aldınǵısınan góre bilinbey baratırǵan bolsa, onda bul – kúyikten payda bolǵan tırtıq. Ruwxaniy ol adamdı hadal dep járiyalasın.

29 Bir er adamnıń yamasa hayaldıń basında yamasa iyeginde jara bolsa, 30 ruwxaniy jaranı tekserip shıqsın. Jara teride tereń ornalasqan, ústindegi túkler jińishke hám sarı bolsa, onda ruwxaniy awırıw adamdı haram dep járiyalasın. Óytkeni bul qotır jara, bas hám iyekte payda bolǵan jaman teri keselligi. 31 Degen menen, ruwxaniy bunday jaranı teksergende, jaranıń tereń oyılmaǵanın, biraq jaranıń ústinde qara túk joq ekenin kórse, onda ol awırıw adamdı jeti kún basqalardan bóleklep qoysın. 32 Al jetinshi kúni ruwxaniy jaranı jáne tekserip kórsin. Eger qotır jara terige jayılmaǵan, ústinde sarı túk joq bolıp, jara tereń oyılmaǵan bolsa, 33 onda adamnıń qotır bolǵan jerinen basqa hámme jerindegi túkler qırıp taslansın. Ruwxaniy awırıw adamdı jáne jeti kún basqalardan bóleklep qoysın. 34 Jetinshi kúni ruwxaniy qotır jaranı taǵı tekserip kórsin. Eger qotır jara terige jayılmaǵan hám tereń oyılmaǵan bolsa, onda ruwxaniy sol adamdı hadal dep járiyalasın. Awırıw adam kiyimlerin juwsın, sonda ol hadal dep sanaladı. 35 Biraq awırıw adam hadal dep járiyalanǵannan soń, qotır jara onıń terisine jayılıp baslasa, 36 ruwxaniy onı qaytadan tekserip shıqsın. Eger qotır jayılǵan bolsa, onda sarǵayǵan túkti izlemese de boladı. Ol adam haram bolıp sanaladı. 37 Al eger qotır jara sol halında qalıp, ústine qara túk shıqqan bolsa, onda qotır jazılǵanı. Adam hadal boladı, ruwxaniy onı hadal dep járiyalasın.

38 Bir er adamnıń yamasa hayaldıń terisinde aqtańlaqlar payda bolsa, 39 onda ruwxaniy onı tekserip shıqsın. Teridegi aqtańlaqlar aldınǵısınan góre bilinbey baratırǵan hám aqshıl bolsa, bul – bórtpe bolǵanı. Adam hadal sanalsın.

40 – 41 Eger adamnıń tóbe shashı yamasa shashınıń aldı beti tógilgen bolsa, onda bul – kál bolǵanı. Adam hadal sanaladı. 42 Biraq kál bolǵan adamnıń basında qızǵısh aq jaralar payda bolsa, onda ol adamnıń jaman teri keselligine shalınǵanı. 43 Ruwxaniy onı tekserip kórsin. Basınıń tóbesindegi yamasa aldı betindegi daqlar jaman teri keselligine tán jaralar sıyaqlı aqshıl qızıl bolsa, 44 onda adam usınday teri keselligine shalınǵan bolıp, ol haram sanaladı. Basındaǵı jara sebepli ruwxaniy onı haram dep járiyalasın.

45 Jaman teri keselligine shalınǵan adamnıń kiyimleri jırtılıp, shashları jayılǵan bolsın. Adam júziniń tómenin jawıp: «Haramman! Haramman!» – dep baqırsın. 46 Ol adam keselligi dawamında haram sanalıp, xalıqtan uzaqta, ordanıń sırtında jasasın.

Baz basıw haqqında

47 – 48 – Eger jún yamasa zıǵır kiyimdi, hár qanday jún yamasa zıǵır jipten toqılǵan gezleme, teri yamasa teri buyımdı baz basıp ketse 49 hám bulardaǵı baz basqan daq jasıl yamasa qızıl túske ense, onda olar ruwxaniyge kórsetiliwi tiyis. 50 Ruwxaniy olardı tekserip kórip, zıyanlanǵan nárseni jeti kún bólek saqlasın. 51 Jetinshi kúni onı jáne teksersin. Eger kiyimde, gezlemede yamasa qanday da bir maqset penen qollanılǵan teri buyımda baz basqan jer jayılsa, bul zıyanlı bolǵanı. Zıyanlanǵan zat haram sanaladı. 52 Ústi baz basqan hár bir zat ruwxaniy tárepinen jaǵıp jiberilsin. Óytkeni bul zıyanlı nárse bolǵanlıqtan, jandırıp jiberiliwi kerek.

53 Eger ruwxaniy kiyimdegi, gezlemedegi yamasa qanday da bir teri buyımdaǵı baz basqan jerdiń jayılmaǵanın kórse, 54 baz basqan zattı juwıwdı buyırsın. Ruwxaniy onı jáne jeti kún bólek saqlasın. 55 Sonnan keyin, ruwxaniy onı jáne teksersin. Eger baz jayılmaǵanı menen reńi burınǵıday jasıl yamasa qızıl bolsa, ol haram sanaladı. Bul zattıń ishi yamasa sırtı baz basıp ketse, ol jandırıp jiberiliwi tiyis.

56 Biraq sol zattıń baz basqan jeri aldınǵısınan góre bilinbey baslaǵan bolsa, ruwxaniy kiyimdegi, teridegi yamasa gezlemedegi baz basqan jerdi kesip taslasın. 57 Eger sol zatlarda jáne baz basqan jer kórinse, ol jayılıp baslaǵanı. Onda bunday zattı jaǵıp jiberiwińiz tiyis. 58 Juwılǵan kiyimnen, gezlemeden yamasa teri buyımnan baz basqan jer joq bolıp ketse, onda ol qaytadan juwılsın. Sonnan soń, ol hadal sanaladı.

59 Baz basqan jún yamasa zıǵır kiyim, gezleme yamasa teri buyım haram yamasa hadal dep járiyalanıwı ushın qollanılatuǵın qaǵıydalar usılardan ibarat.