Lev 14 | KaaIBT22L | STEP | Jaratqan Iye Muwsaǵa bılay dedi:

‏ Leviticus 14

Jaman teri keselliginen tazalanıw haqqında

1 Jaratqan Iye Muwsaǵa bılay dedi:

2 – Jaman teri keselligi menen awırǵan adamnıń hadal qılınatuǵın kúni mına pákleniw qaǵıydası qollanılıwı tiyis: awırıw adam ruwxaniyge aparılsın. 3 Ruwxaniy onı tekseriw ushın ordanıń sırtına shıqsın. Eger awırıw adam táwir bolǵan bolsa, 4 ruwxaniy onı páklew ushın eki hadal tiri qus, kedr ^{▼▼ Kedr – qaraǵay aǵashqa uqsas náhán terektiń bir túri.} aǵashın, qırmızı jip hám mayoran shóbin ^{▼▼ Mayoran shóbi – bul nazbaygúl shóbine tuqımlas ósimlik.} ákeliwdi buyırsın. 5 Ruwxaniydiń buyrıǵı menen quslardıń birewin taza bulaq suwı quyılǵan ılay ıdıstıń ústinde shalsın. 6 Keyin ruwxaniy tiri qustı, kedr aǵashın, qırmızı jipti hám mayoran shóbin soyılǵan qustıń qanı menen aralastırılǵan taza bulaq suwına batırsın 7 hám teri keselliginen páklenetuǵın adamnıń ústine jeti márte serpsin. Sonnan keyin, ruwxaniy onı hadal dep járiyalap, tiri qustı ashıq dalaǵa jibersin. 8 Páklenetuǵın adam kiyimlerin juwıp, barlıq shashların qırqıp taslasın hám suwǵa juwınsın, sonda ol hadal sanaladı. Keyin ol ordaǵa kiriwine boladı, biraq jeti kún shatırınıń sırtında jasasın. 9 Jetinshi kúni ol shashın, saqalın, qasların hám denesindegi barlıq júnlerin qırıp taslasın. Kiyimlerin juwıp, ózi de suwǵa juwınıp bolǵannan soń, hadal sanaladı.

10 Segizinshi kúni ol minsiz eki erkek toqlı, bir jasar minsiz qoy, ǵálle sadaqası sıpatında záytún mayı menen aralastırılǵan onnan úsh efa sapalı un hám bir log ^{▼▼ Bir log – shama menen 0,3 l.} záytún mayın alıp kelsin. 11 Páklew xızmetin orınlap atırǵan ruwxaniy bulardıń barlıǵın hám páklenip atırǵan adamdı Jaratqan Iyeniń aldına, Ushırasıw shatırınıń aldına alıp kelsin. 12 Keyin ruwxaniy toqlılardıń birewin alıp, onı bir log záytún mayı menen birge ayıp qurbanlıǵı etip usınsın. Bulardı Jaratqan Iyeniń aldında joqarı kóterip usınsın. 13 Toqlını gúna qurbanlıǵı hám jandırılatuǵın qurbanlıq shalınatuǵın muxaddes jerde shalsın. Óytkeni gúna qurbanlıǵı sıyaqlı ayıp qurbanlıǵı da ruwxaniyge tiyisli. Bul qurbanlıq júdá muxaddes bolıp esaplanadı. 14 Ruwxaniy páklenetuǵın adamnıń oń qulaǵınıń sırǵalıǵına, oń qolınıń hám oń ayaǵınıń bas barmaǵına ayıp qurbanlıǵınıń qanınan súrtsin. 15 Sonnan keyin, ol bir log záytún mayınan azǵantay alıp, óziniń shep alaqanına quysın. 16 Oń qolınıń barmaǵın sol mayǵa batırıp, Jaratqan Iyeniń aldında jeti márte serpsin. 17 Páklenetuǵın adamnıń oń qulaǵınıń sırǵalıǵına, oń qolınıń hám oń ayaǵınıń bas barmaǵına ayıp qurbanlıǵınan súrtilgen qannıń ústine qolındaǵı maydan súrtsin. 18 Sonıń menen birge, ruwxaniy alaqanında awısıp qalǵan maydı páklenetuǵın adamnıń basına súrtip, Jaratqan Iyeniń aldında onı páklesin.

19 Sonnan soń, ruwxaniy gúna qurbanlıǵın berip, páklenetuǵın adamdı haramlıǵınan páklesin. Bunnan keyin jandırılatuǵın qurbanlıqtı shalıp, 20 onı ǵálle sadaqası menen birge qurbanlıq orında jaǵıp jibersin. Usılay etip, ruwxaniy onı pákleydi hám sol adam hadal bolıp esaplanadı.

21 Eger de ol adam jarlı bolıp, bulardı alıwǵa shaması kelmese, pákleniwi ushın joqarı kóterip usınatuǵın ayıp qurbanlıǵı ushın bir erkek toqlı, ǵálle sadaqası ushın záytún mayı qosılǵan onnan bir efa sapalı un hám bir log záytún mayın alıp kelsin. 22 Ol birewin gúna qurbanlıǵı, ekinshisin jandırılatuǵın qurbanlıq etip beriw ushın shaması kelgeninshe, eki qumırı yamasa eki jas kepter ákelsin. 23 Ol bulardıń hámmesin pákleniw ushın segizinshi kúni Jaratqan Iyeniń aldına, Ushırasıw shatırınıń aldına alıp kelip, ruwxaniyge bersin. 24 Ruwxaniy ayıp qurbanlıǵı ushın berilgen toqlını hám bir log záytún mayın alıp, Jaratqan Iyeniń aldında joqarı kóterip usınsın. 25 Sońınan ayıp qurbanlıǵı ushın beriletuǵın toqlını shalıp, onıń qanınan alıp, páklenetuǵın adamnıń oń qulaǵınıń sırǵalıǵına, oń qolınıń hám oń ayaǵınıń bas barmaǵına súrtsin. 26 Sonnan soń, ruwxaniy óziniń shep alaqanına azǵantay záytún mayın quyıp, 27 oń qolınıń barmaǵın sol mayǵa batırıp, Jaratqan Iyeniń aldında jeti márte serpsin. 28 Ol qolındaǵı maydan páklenetuǵın adamnıń oń qulaǵınıń sırǵalıǵına, oń qolınıń hám oń ayaǵınıń bas barmaǵına ayıp qurbanlıǵınıń qanı súrtilgen jerge súrtsin. 29 Sonıń menen birge, ruwxaniy Jaratqan Iyeniń aldında páklenetuǵın adamdı páklew ushın, qolında qalǵan maydı onıń basına súrtsin. 30 – 31 Sonnan keyin, sol adamnıń shaması jetkenine qarap, alǵan qumırılardan yamasa kepterlerden birewin gúna qurbanlıǵı, ekinshisin jandırılatuǵın qurbanlıq etip, ǵálle sadaqası menen birge usınsın. Ruwxaniy usılay etip, sol adamdı Jaratqan Iyeniń aldında páklesin. 32 Jaman teri keselligi menen awırıp, táwir bolǵannan keyin tazalanıwı ushın jaǵdayı tómen adamlar ushın qaǵıydalar usılardan ibarat.

Kógeriwden tazalanıw

33 Jaratqan Iye Muwsa menen Xaronǵa bılay dedi:

34 – Sizlerge múlik qılıp beretuǵın Qanan jerine kirgenińizden keyin, elińizdegi bir úyge kógerip, baz basıw bálesin jibersem, 35 úydiń iyesi ruwxaniyge barıp: «Úyimde kógeriwge uqsaǵan bir nárse kórdim», – dep xabar bersin. 36 Ruwxaniy kógeriwdi kóriwge barmasınan aldın, úydegi hár bir nárse haram dep sanalmawı ushın, olardı sırtqa shıǵarıp qoyıwdı buyırsın. Sonnan keyin, ol úydi kóriwge barsın. 37 Ol kógergen diywallardı kózden ótkersin. Eger kógeriwdegi jasıl yamasa qızıl túsli daqlar diywalǵa sińip baratırǵan bolsa, 38 onda ruwxaniy úyden shıǵıp, úydi jeti kún dawamında jawıp qoysın. 39 Ol jetinshi kúni qaytıp barıp, úydi jáne kózden ótkersin. Eger de kógeriw diywallarǵa jayılǵan bolsa, 40 kógergen taslardı alıp taslap, qalanıń sırtına, haram sanalatuǵın bir jerge aparıp taslawdı buyırsın. 41 Úydiń ishindegi barlıq sıbawdı túsirtip, bulardı da qalanıń sırtındaǵı sol jerge taslatsın. 42 Alınǵan taslardıń ornına basqa taslar qalanıp, úy jańadan sıbalsın.

43 Sonnan keyin de úyde kógeriw jáne payda bolsa, 44 ruwxaniy barıp, úydi kózden ótkersin. Kógeriw jayılsa, ol zıyanlı bolıp, úy haram sanaladı. 45 Bunday úy buzıp taslansın. Onıń tasları, aǵashları, barlıq sıbawları qalanıń sırtındaǵı haram jerge aparıp taslansın. 46 Úy jabılǵan kúnleri, oǵan kirgen hár bir adam keshke deyin haram sanaladı. 47 Sol úyde jatqan yamasa awqat jegen adam kiyimlerin juwsın.

48 Al eger de úy sıbalǵannan soń, ruwxaniy úyge kirip, kózden ótkergende, sol kógeriw jayılmaǵan bolsa, onda ruwxaniy úydi taza dep járiyalasın. Óytkeni kógeriw joq boldı. 49 Ruwxaniy úydi páklew ushın eki qus, kedr aǵashın, qırmızı jip hám mayoran shóbin alsın. 50 Quslardıń birewin taza bulaq suwı quyılǵan ılay ıdıstıń ústinde shalsın. 51 Kedr aǵashın, mayoran shóbin, qırmızı jipti hám tiri qustı alıp, shalınǵan qustıń qanı menen aralastırılǵan taza bulaq suwına batırsın da, onı jeti márte úyge serpsin. 52 Usılay etip, ruwxaniy úydi páklegennen soń, 53 tiri qustı qalanıń sırtına, ashıq dalaǵa ushırıp jibersin. Solay etip, úy páklenip, taza boladı.

54 – 55 Hár túrli teri keselligi, qotır jara, daq, bórtpe yamasa aqtańlaqlar, jáne de, kiyim hám úylerde payda bolatuǵın baz basıw menen kógeriwge baylanıslı qaǵıydalar usılardan ibarat. 56 Bulardıń qashannan berli haram, qashannan berli hadal bolǵanı usı nızam boyınsha bilinedi.