‏ Leviticus 15

Adamdı haram qılatuǵın nárseler tuwrısında

1Jaratqan Iye Muwsa menen Xaronǵa bılay dedi:

2– Izrail xalqına bılay dep aytıńlar: «Erkektiń jınısıy aǵzasınan iriń ajıralıp shıqsa, ol haram sanaladı. 3Adamnan ajıralıp shıǵatuǵın iriń haqqında nızam mınaday: iriń aqsa da, qoyıwlasıp irkilip qalsa da, adam haram sanaladı. 4Bunday adamnıń jatqan tósegi hám otırǵan hár bir nársesi haram sanaladı. 5Kim de kim onıń tósegine bir jerin tiygizse, kiyimlerin juwsın, ózi de juwınsın. Ol keshke deyin haram sanaladı. 6Sol adamnıń otırıp ketken jerine otırǵan adam da kiyimlerin juwıp, ózi juwınsın hám ol keshke deyin haram sanaladı. 7Kim de kim iriń aǵıp júrgen adamǵa bir jerin tiygizse, kiyimlerin juwsın hám ózi de juwınsın. Ol keshke deyin haram sanaladı. 8Eger de iriń aǵıp júrgen adamnıń túkirigi pák adamǵa shashırap ketse, túkirik shashıraǵan adam kiyimlerin juwsın, ózi de juwınsın. Ol keshke deyin haram sanaladı. 9Irińi bar adam mingen hár bir attıń eri haram sanaladı. 10Usı adam otırǵan hár bir nársege bir jerin tiygizgen adam keshke deyin haram sanaladı. Bul zatlardı kóterip júrgen hár bir adam kiyimlerin juwsın, ózi de juwınsın. Ol keshke deyin haram sanaladı. 11Irińi bar adam qolların juwmay, birewge qolın tiygizse, sol adam kiyimlerin juwsın, ózi de juwınsın. Ol keshke deyin haram sanaladı. 12Irińi bar adam uslaǵan hár bir ılay ıdıs sındırıp taslansın, al aǵash ıdıs bolsa, suw menen juwılsın.

13Eger adamnıń irińi toqtap, táwir bolsa, jeti kún ótiwi tiyis. Sonnan keyin, ol kiyimlerin juwıp, aǵın suwda juwınsın, sonda ol taza bolıp sanaladı. 14Segizinshi kúni ol eki qumırı yamasa eki jas kepter alıp, Jaratqan Iyeniń aldına, Ushırasıw shatırınıń aldına ákelsin hám bulardı ruwxaniyge bersin. 15Ruwxaniy olardıń birewin gúna qurbanlıǵı, ekinshisin jandırılatuǵın qurbanlıq etip bersin. Usılay etip, ruwxaniy irińi bar bolǵan adamdı Jaratqan Iyeniń aldında páklesin.

16Eger de bir erkek adamnıń urıǵı aqsa, pútkil denesin suwǵa juwsın hám ol keshke deyin haram sanaladı. 17Ústine jınısıy tuqımlıq tamǵan hár bir kiyim yamasa teri zatlar suw menen juwılsın hám olar keshke deyin haram sanaladı. 18Erkek bir hayal menen jatıp, erkekten urıq aqsa, ekewi de juwınsın hám olar keshke deyin haram sanaladı.

19Eger hayaldıń ádettegidey etek kiri kelip júrse, ol jeti kún dawamında haram sanaladı. Oǵan bir jerin tiygizgen adam da keshke deyin haram sanaladı. 20Etek kiri kelip júrgen waqtında, hayaldıń tósegi de, ol ústinde otırǵan hár bir nárse de haram sanaladı. 21– 22Kim de kim sol hayaldıń tósegine yamasa ol otırǵan zatqa bir jerin tiygizse, kiyimlerin juwsın, ózi de suwǵa juwınsın. Ol keshke deyin haram sanaladı. 23Hayaldıń tóseginiń yamasa ol otırǵan zattıń ústinde turǵan bir nársege jantasqan hár bir adam keshke deyin haram sanaladı. 24Eger erkek etek kiri kelip júrgen hayal menen jatsa, erkek te haram sanaladı. Ol erkek jeti kún haram bolıp, ol jatqan hár bir tósek te haram sanaladı.

25Eger hayaldıń etek kirinen tısqarı qan kelse hám bul uzaq waqıt dawam etse, yamasa etek kiri ádetten tıs uzayıp ketse, onda ol usı waqıt dawamında da etek kiri waqtındaǵıday haram sanaladı. 26Usı waqıt dawamında hayaldıń jatqan tósegi yamasa otırǵan hár bir nárse etegi kelip júrgen waqtındaǵı sıyaqlı haram sanaladı. 27Kim de kim sol nárselerge jantassa, haram bolıp esaplanadı. Ol kiyimlerin juwsın, ózi de juwınsın. Ol keshke deyin haram sanaladı.

28Hayaldıń qanı toqtaǵannan soń jeti kún ótiwi tiyis, sonnan keyin ol taza bolıp esaplanadı. 29Segizinshi kúni ol eki qumırı yamasa eki jas kepterdi Ushırasıw shatırınıń aldına alıp kelsin hám olardı ruwxaniyge bersin. 30Ruwxaniy olardıń birewin gúna qurbanlıǵı, ekinshisin jandırılatuǵın qurbanlıq qılıp usınsın. Usılay etip, ruwxaniy qan ketiwden haramlanǵan hayaldı Jaratqan Iyeniń aldında páklesin.

31Izrail xalqın haramlıqtan usılay saqlań. Solay etip, arańızda jaylasqan Meniń Muxaddes shatırımdı haram qılıp, ólip qalmańlar.

32– 33Jınısıy aǵzasınan iriń yamasa urıǵı aqqan adam, etek kiri kelip júrgen hayal hám usınday jaǵdaydaǵı hayal menen jatqan erkekke baylanıslı qaǵıydalar usı boladı».