Leviticus 16
Gúnadan pákleniw kúni
1Jaratqan Iyeniń aldına jaqınlaǵan waqıtta ólgen Xaronnıń eki ulınıń óliminen soń, Jaratqan Iye Muwsa menen sóylesip, 2oǵan bılay dedi: – Ájaǵań Xaronǵa ayt, ol Eń muxaddes bólmege, perdeniń artına, Kelisim sandıǵınıń ústindegi gúnadan pákleytuǵın qaqpaqtıń aldına tek belgilengen waqıtta kirsin. Basqa waqıtta kirse, ol ólip qaladı. Sebebi Men bult ishinde, qaqpaqtıń ústinde payda bolaman. 3Xaron Eń muxaddes bólmege kiretuǵın waqıtta gúna qurbanlıǵı ushın bir buǵa, jandırılatuǵın qurbanlıq ushın bir qoshqar usınsın. 4Ol zıǵırdan islengen muxaddes uzın kóylek, zıǵır diz kiyim kiysin, zıǵır belbew baylasın hám basına zıǵır sálle orasın. Bular muxaddes kiyimler, sonıń ushın olardı kiymesten aldın juwınıp alsın. 5Izrail jámiyeti de gúna qurbanlıǵı ushın Xaronǵa eki teke, jandırılatuǵın qurbanlıq ushın bir qoshqar ákelsin. 6Xaron ózin hám shańaraǵın páklew ushın, gúna qurbanlıǵı etip bir buǵa usınsın. 7Sonnan keyin, ol eki tekeni Jaratqan Iyeniń aldına, Ushırasıw shatırınıń aldına alıp kelsin. 8Sol jerde eki teke ushın shek taslanıp, qaysısınıń Jaratqan Iye ushın, qaysısınıń Azazel ▼▼ Azazel – bul dúzde jasaytuǵın bir jin bolıwı múmkin.
ushın dúzge aydap jiberiletuǵının anıqlasın. 9Xaron shek boyınsha Jaratqan Iyege tiyisli tekeni alıp, gúna qurbanlıǵı etip usınsın. 10Shek boyınsha Azazelge jiberiletuǵın tekeni tiriley Jaratqan Iyeniń aldına ákelip, xalıqtıń gúnalarınıń óteliwi ushın dúzge aydap jibersin. 11Xaron ózin hám shańaraǵın páklew ushın gúna qurbanlıǵına arnalǵan buǵanı shalǵannan soń, 12ol qurbanlıq orınnan shoqlardı alıp, tútetki tútetiletuǵın ıdısqa toltırıp salsın. Keyin sol ıdıstı hám eki qosuwıs maydalap untalǵan xosh iyisli tútetkini perdeniń artındaǵı Eń muxaddes bólmege alıp kirsin. 13Ol jerde, Jaratqan Iyeniń aldında tútetkini shoqlardıń ústine qoysın. Onıń tútini Kelisim sandıǵınıń ústindegi qaqpaqtı kózge kórinbeytuǵın etip qaplaydı. Sonda Xaron ólmey tiri qaladı. 14Sonnan keyin, ol buǵanıń qanınan alıp, barmaǵı menen shıǵıs tárepten qaqpaqtıń ústine bir márte, keyin qaqpaqtıń aldına jeti márte serpsin. 15Usıdan keyin ol xalıq ushın gúna qurbanlıǵı etip tekeni shalsın. Onıń qanın perdeniń ishki jaǵına, Eń muxaddes bólmege alıp kirsin. Buǵanıń qanın serpkendey etip, tekeniń qanın da sol Kelisim sandıǵınıń qaqpaǵınıń ústine hám onıń aldına serpsin. 16Usılay etip, Eń muxaddes bólmeni Izrail xalqınıń napákliklerinen, jınayatlarınan hám barlıq gúnalarınan páklesin. Eń muxaddes bólmeniń aldındaǵı Muxaddes bólme ushın da anıq usılay islensin. Óytkeni shatır napák adamlardıń arasında jaylasqan. 17Xaron óziniń, shańaraǵınıń hám pútkil Izrail jámiyetiniń atınan páklew rásimin ótkeriw ushın Eń muxaddes bólmege kirgende, sırtqa shıǵaman degenshe, Ushırasıw shatırında hesh kim bolmawı tiyis. 18Sońınan Xaron Jaratqan Iyeniń aldındaǵı qurbanlıq orınǵa shıǵıp, qurbanlıq orındı páklew ushın, buǵa menen tekeniń qanın qurbanlıq orınnıń shaqlarına súrtip shıqsın. 19Qandı barmaǵı menen qurbanlıq orınǵa jeti márte serpsin. Usılay etip, ol qurbanlıq orındı Izrail xalqınıń napákliginen tazalap, muxaddes qıladı. 20Xaron Eń muxaddes bólmeni, onıń aldındaǵı Muxaddes bólmeni hám qurbanlıq orındı páklegennen soń, tiri tekeni alıp kelsin. 21Ol eki qolın tekeniń basına qoyıp, Izrail xalqınıń barlıq ayıpların, jınayatların hám gúnaların dawıslap tán alıp, bulardı tekeniń basına júklesin. Sonnan keyin, teke usı is ushın arnawlı adamǵa tapsırılsın hám ol tekeni qula dúzge aydap jibersin. 22Solay etip, teke Izrail xalqınıń barlıq ayıpların qula dúzge alıp ketedi. 23Sonnan soń, Xaron Ushırasıw shatırına kirsin. Ol Eń muxaddes bólmege kirer aldında kiyip alǵan zıǵır kiyimlerin sheship, Muxaddes bólmede qaldırsın. 24Ol muxaddes jerde juwınıp, kúndelikli ruwxaniylik kiyimlerin kiysin. Sonnan soń, ózi hám xalıq ushın beriletuǵın jandırılatuǵın qurbanlıqlardı usınsın. Usılay etip, ol ózin de, xalıqtı da gúnadan páklesin. 25Gúna qurbanlıǵınıń mayın qurbanlıq orında tútetip jandırsın. 26Al gúna júklengen tekeni Azazelge jiberip qaytqan adam kiyimlerin juwsın, ózi de juwınsın. Sonnan keyin, ol ordaǵa kire aladı. 27Gúna qurbanlıǵı etip berilgen hám páklew rásimin ótkeriw ushın qanları Eń muxaddes bólmege alıp kirilgen buǵa menen teke ordanıń sırtına shıǵarıp taslansın. Olardıń terileri, góshleri hám dárisi jaǵıp jiberilsin. 28Bulardı jaqqan adam kiyimlerin juwıp, ózi de juwınǵannan soń, ordaǵa kire aladı. 29Sizler ushın mınaw máńgige qaǵıyda bolsın: jetinshi aydıń onınshı kúni oraza tutıń. Izraillı bolsın, arańızda jasap atırǵan kelgindi adam bolsın, hesh birińiz ádettegi jumısıńızdı islemeń. 30Óytkeni sol kúni ruwxaniy Xaron sizlerdi gúnalarıńızdan pákleydi. Sonda sizler Jaratqan Iyeniń aldında barlıq gúnalarıńızdan tazalanasızlar. 31Sol kún sizler ushın tolıq dem alatuǵın Shabbat kúni boladı, sol kúni oraza tutıńlar. Bul sizler ushın máńgi qaǵıyda bolsın. 32Ákesiniń ornına bas ruwxaniylikke tayınlanıp, maylanǵan ruwxaniy muxaddes zıǵır kiyimlerin kiyip, páklew rásimin ótkersin. 33Ol Eń muxaddes bólmeni, Ushırasıw shatırın hám qurbanlıq orındı tazalap, ruwxaniylerdiń hám pútkil jámiyettiń gúnalarınan pákleydi. 34Izrail xalqınıń kóp gúnaları sebepli jılına bir márte páklew rásimi ótkerilsin. Bul sizler ushın máńgi qaǵıyda bolsın. Xaron hámmesin Jaratqan Iyeniń Muwsaǵa buyırǵanınday etip orınladı.
Copyright information for
KaaIBT22L