Lev 17 | KaaIBT22L | STEP | Jaratqan Iye Muwsaǵa bılay dedi:

‏ Leviticus 17

Qannıń áhmiyeti

1 Jaratqan Iye Muwsaǵa bılay dedi:

2 – Xaronǵa, onıń ullarına hám pútkil Izrail xalqına bılay dep ayt: «Jaratqan Iyeniń buyrıǵı mınaw: 3 – 4 Eger Izrail xalqınan birew bir sıyır, bir qoy yamasa eshki shalmaqshı bolsa, onı qurbanlıq sıpatında Jaratqan Iyege usınıw ushın, Ushırasıw shatırınıń aldına alıp keliwi tiyis. Eger maldı yamasa janlıqtı Muxaddes shatırdıń aldına alıp kelmey, basqa jerde shalsa, ol qan tókken bolıp, ayıplı sanalsın. Qan tókken sol adam xalıqtıń arasınan joq qılınadı. 5 Solay etip, izraillılar ashıq dalalarda soyǵan qurbanlıqların endigiden bılay Jaratqan Iyeniń aldına alıp kelsin. Olar qurbanlıqların Ushırasıw shatırınıń aldına, ruwxaniyge alıp kelsin hám tatıwlıq qurbanlıǵı etip, Jaratqan Iyege usınsın. 6 Ruwxaniy qurbanlıqtıń qanın Ushırasıw shatırınıń kirer awzınıń aldındaǵı Jaratqan Iyeniń qurbanlıq ornına serpip jibersin, mayların bolsa, Jaratqan Iyege xosh iyisli sıy qılıp, tútetip jandırıp jibersin. 7 Bunnan bılay, Izrail xalqınıń qurbanlıqları teke kórinisindegi jinlerge berilmesin hám solay islep, olar Jaratqan Iyege opasızlıq qılmasın. Bul qaǵıydaǵa áwladlar dawamında ámel qılınsın».

8 Olarǵa jáne bılay dep ayt: «Eger Izrail xalqınan yamasa arasında jasap atırǵan kelgindilerden birewi jandırılatuǵın qurbanlıq yamasa basqa qurbanlıq berse, 9 biraq onı Jaratqan Iyege usınıw ushın Ushırasıw shatırınıń aldına alıp kelmese, ol xalıqtıń arasınan joq qılınadı.

10 Eger Izrail xalqınan yamasa arasında jasap atırǵan kelgindilerden birewi góshti qanı menen jese, Men oǵan qarsı shıǵıp, xalqınıń arasınan joq qılaman. 11 Óytkeni janıwarlardıń janı qanında boladı. Qandı sizlerge qurbanlıq orınnıń ústinde ózlerińizdi gúnadan páklewińiz ushın berdim. Ózinde ómir bolǵan bul qan sizlerdi gúnadan pákleydi. 12 Sonıń ushın, Izrail xalqına: „Sizler yamasa arańızda jasap atırǵan kelgindi adamlardıń hesh biri góshti qanı menen jemesin“, – dep ayttım.

13 Izrail xalqınan yamasa arasında jasap atırǵan kelgindi adamlardan birewi jewge bolatuǵın bir haywan yamasa qus awlasa, onıń qanın topıraqqa aǵızıp kómip taslasın. 14 Óytkeni janıwarlardıń janı qanında boladı. Sol sebepli Men Izrail xalqına: „Hesh bir janıwardıń góshin qanı menen jemeń“, – dedim. Onı ishken adam xalıqtıń arasınan joq qılınadı.

15 Izraillı bolsın, arańızda jasap atırǵan kelgindi bolsın, haram ólgen yamasa jabayı haywan bawızlap óltirgen haywannıń góshin jegen hár bir adam kiyimlerin juwsın, ózi de juwınsın. Ol keshke deyin haram sanaladı. Sonnan keyin barıp, ol hadal sanaladı. 16 Eger de ol kiyimlerin juwmasa, ózi de juwınbasa, ayıplı sanalıp, jazaǵa tartıladı».