‏ Leviticus 18

Qadaǵan etilgen jınısıy qatnaslar

1Jaratqan Iye Muwsaǵa bılay dedi:

2– Izrail xalqına bılay dep ayt: «Qudayıńız Jaratqan Iye – Men bolaman. 3Ózlerińiz burın arasında jasaǵan Mısır xalqınıń hám Meniń sizlerdi aparatırǵan Qanan jeriniń úrp-ádetlerine ámel qılıp, olar sıyaqlı jasamańlar. 4Meniń nızamlarımdı orınlap, qaǵıydalarım boyınsha jasańlar. Men – Qudayıńız Jaratqan Iyemen. 5Qaǵıyda hám nızamlarıma ámel qılıń. Óytkeni adam olardı orınlawı arqalı ómir súredi. Men – Jaratqan Iyemen.

6Hesh kim jınısıy qatnas jasaw ushın óz aǵayinine jaqınlamasın. Men – Jaratqan Iyemen. 7Anań menen jınısıy qatnas qılıp, ákeńdi shermende qılma. Ol anań bolǵanı ushın, onıń etegin ashpa. 8Ákeńniń namısına tiymewiń ushın, onıń hesh bir hayalı menen jınısıy qatnas qılma. 9Seniń menen bir úyde tuwılsın, basqa jerde tuwılsın, anańnan yamasa ákeńnen tuwılǵan ógey qarındaslarıńnıń hesh biri menen jınısıy qatnas qılma. 10Qızıńnan yamasa ulıńnan tuwılǵan aqlıq qızıń menen jınısıy qatnas qılma. Óytkeni olar seniń tuwǵan qanalaslarıń boladı. 11Ákeńniń basqa hayalınan tuwılǵan qız benen jınısıy qatnas qılma. Sebebi ol ákeńnen tuwılǵan, seniń qarındasıń boladı. 12Ákeńniń ájapası yamasa qarındası menen jınısıy qatnas qılma. Óytkeni ol ákeńniń jaqın qanalası boladı. 13Anańnıń ájapası yamasa sińlisi menen jınısıy qatnas qılma. Sebebi ol anańnıń jaqın qanalası boladı. 14Ákeńniń aǵasınıń yaki inisiniń hayalı menen jatıp, olardı shermende qılma. Sebebi ol seniń jeńgeń boladı. 15Keliniń menen jınısıy qatnas qılma. Ol balańnıń hayalı. Onıń menen jatpa. 16Aǵańnıń yaki inińniń hayalı menen jınısıy qatnas qılma. Bolmasa olardıń namısına tiyeseń. 17Bir hayaldıń ózi menen jınısıy qatnasta bolıp, onıń qızı menen de jınısıy qatnas qılma. Hayaldıń qızınan yamasa ulınan tuwılǵan aqlıq qızı menen jınısıy qatnas qılma. Sebebi olar hayaldıń jaqın qanlasları. Bul uyatsız is. 18Hayalıń tiri waqtında, onıń ájapasın yamasa sińlisin hayallıqqa alma hám onıń menen jınısıy qatnas qılma.

19Etegi kelip júrgeni ushın haram sanalǵan hayal menen jınısıy qatnas qılma. 20Basqa birewdiń hayalı menen jınısıy qatnas qılıp, ózińdi haramlama. 21Balalarıńnıń hesh birin Molox qudayına arnap, qurbanlıqqa berme hám usılay islep, Qudayıńnıń atına til tiygizbe. Men – Jaratqan Iyemen. 22Hayal menen jatqanday qılıp, erkek penen jatpa. Bul jerkenishli is. 23Hesh qanday haywan menen jınısıy qatnas qılıp, ózińdi haramlama. Hayallar da jınısıy qatnas qılıw ushın hesh qanday haywanǵa jaqınlamasın. Bul – buzıqlıq boladı.

24Usı is-háreketlerdiń hesh biri menen ózlerińizdi haramlamań. Men sizlerdiń aldıńızdan quwıp shıǵarıp atırǵan xalıq usınday isler menen ózlerin haramlaǵan edi. 25Olar sebepli el de haramlanǵan. Olardıń gúnası sebepli sol jerdi jazaladım. Eldiń ózi turǵınlarınan kewli aynıp, olardı qusıp tasladı. 26Sizler Meniń qaǵıyda hám nızamlarıma ámel qılıp jasańlar. Izraillı bolsın, arańızda jasap atırǵan kelgindi bolsın, hesh bir adam bunday jerkenishli isti islemesin. 27Sizlerden aldın bul elde jasaǵan adamlar usı barlıq jerkenishli islerdi islep, eldi haramladı. 28Eger sizler de eldi haramlasańız, sizlerden aldınǵı xalıqqa islegenindey, el sizlerdi de qusıp shıǵarıp jiberedi.

29Kim de kim usı jerkenishli islerdiń birewin islese, xalıqtıń arasınan joq qılınadı. 30Meniń buyrıqlarımdı orınlańlar, sizlerden aldın elde jasaǵan adamlardıń jerkenishli úrp-ádetlerine ámel qılıp, ózlerińizdi haramlamań. Men – Qudayıńız Jaratqan Iyemen».