‏ Leviticus 19

Ádillik hám muxaddeslik nızamları

1Jaratqan Iye Muwsaǵa bılay dedi:

2– Izrail jámiyetine bılay dep ayt: «Muxaddes bolıń, óytkeni Qudayıńız Jaratqan Iye bolǵan Men – muxaddespen.

3Hár birińiz óz ata-anańızdı húrmetleń. Meniń Shabbatıma ámel qılıń. Men – Qudayıńız Jaratqan Iyemen.

4Mennen júz burıp, jalǵan qudaylarǵa tabınbań hám ózlerińizge butlardıń músinlerin soǵıp almań. Men – Qudayıńız Jaratqan Iyemen.

5Tatıwlıq qurbanlıǵın ákelgenińizde, onı Men qabıl etetuǵınday etip usınıń. 6Qurbanlıqtıń góshi soyılǵan kúni yamasa erteńgi kúni jeliniwi tiyis, al úshinshi kúnge qalǵan gósh jandırıp jiberilsin. 7Eger qurbanlıqtıń góshi úshinshi kúni jelinse, ol haram sanalıp, qurbanlıq qabıl etilmeydi. 8Onı jegen hár bir adam ayıbınıń jazasın aladı, sebebi Jaratqan Iyeniń aldında muxaddes bolǵandı ayaq astı qılǵan boladı. Onday adam xalıq arasınan joq qılınadı.

9Atızıńızdaǵı eginlerdi jıynaǵanıńızda, onıń shetlerin ormay qaldırıp ketiń, jerge túsken masaqlardı da jıynap almań. 10Júzim baǵıńızdıń zúráátin nárse qaldırmay jıynap almań. Jerge túsken júzimlerdi de terip almań. Olardı jarlılarǵa hám kelgindi adamlarǵa qaldırıń. Men – Qudayıńız Jaratqan Iyemen.

11Urlıq qılmań, hiylekerlik qılmań hám bir-birińizdi aldamań. 12Meniń atım menen ótirik ant iship, Qudayıńızdıń atına til tiygizbeń. Men – Jaratqan Iyemen.

13Basqa bir adamnıń mal-múlkin nahaqlıq hám zorlıq jolı menen qolǵa kirgizbeń. Jallanba jumısshınıń is haqısın tańǵa deyin uslap turmań. 14Gereńge ǵarǵıs sóz aytpań, soqırdıń aldına súrnigetuǵın hesh nárse qoymań. Qudayıńnan qorq. Men – Jaratqan Iyemen.

15Húkim waqtında nahaqlıq etpe. Jarlılardı jaqlap, eki júzlilik qılmań, baylardıń da kewline qarap háreket qılmań. Hár bir adamdı ádillik penen húkim etiń. 16Xalqıńızdıń arasında mısh-mısh gáp tarqatıwshı bolmań. Olardıń ómirine qáwip tuwdırmań. Men – Jaratqan Iyemen.

17Júregińizde tuwısqanıńızǵa qarsı jek kóriwshilik bolmasın. Tuwısqanıńızdıń ayıbın júzine aytıń, sonda onıń gúnasına sherik bolmaysız. 18Ósh alıwshı bolmań, óz xalqıńızdan bolǵan birewge qarsı kek saqlamań. Kerisinshe, ózińizdi súygenińiz sıyaqlı, janıńızdaǵı adamdı da súyiń. Men – Jaratqan Iyemen.

19Nızam-qaǵıydalarıma ámel qılıńlar. Haywannıń eki túrin bir-biri menen shaǵılıstırmań. Atızıńızǵa eki túrli tuqım ekpeń. Ústińizge eki túrli jipten toqılǵan kiyim kiymeń.

20Eger de bir adam basqa bir erkekke atastırılıp qoyılǵan shorı qız benen jatsa, ol qızdıń qunı tólenbegen yamasa ele azat etilmegen bolsa, onda ekewi de jazalansın, biraq óltirilmesin. Óytkeni qız ele azat etilmegen. 21Sol adam Jaratqan Iyege, Ushırasıw shatırınıń aldına ayıp qurbanlıǵı ushın bir qoshqar alıp kelsin. 22Ruwxaniy bul qoshqardı ayıp qurbanlıǵı ushın berip, sol adamdı Jaratqan Iyeniń aldında gúnasınan páklesin. Sonda ol adamnıń gúnası keshiriledi.

23Qanan eline kirgennen soń, hár túrli miywe aǵashın tikkenińizde, olardıń miywesin úsh jıl dawamında haram sanap, onnan jemeńler. 24Al tórtinshi jılı sol aǵashlardıń barlıq miywesin shúkirlik sadaqası etip, Jaratqan Iyege baǵıshlańlar. 25Besinshi jılı olardıń miywesin jewińizge boladı. Usılay qılsańız, miywe aǵashlarıńız mol miywesin beredi. Men – Qudayıńız Jaratqan Iyemen.

26Qanı aǵızılmaǵan góshten jemeń. Pal ashıwshılıq hám boljawshılıq penen shuǵıllanbań. 27Shekeńizdiń shashların kestirmeń, saqallarıńızdıń ushların qırıqpań. 28Marhumlar ushın aza tutqanıńızda, deneńizdi tilip jaraqatlamań, terińizdi testirip, hesh nárse jazdırmań. Men – Jaratqan Iyemen.

29Qızıńızdı buzıqlıq qılıwǵa iytermelep, onı biyabıray qılmań. Bolmasa, buzıqshılıq tarap, el uyatsız qılıqqa tolıp ketedi. 30Meniń Shabbatıma ámel qılıń, Muxaddes mákanıma húrmet kórsetiń. Men – Jaratqan Iyemen.

31Árwaqlardı hám ruwxlardı shaqıratuǵınlarǵa barıp, olarǵa xabarlaspań. Olar sebepli ózlerińizdi haramlamań. Men – Qudayıńız Jaratqan Iyemen.

32Jası úlkenler aldında ornıńnan turıp, jası ullı adamlarǵa húrmet kórsetiń. Qudayıńızdan qorqıń. Men – Jaratqan Iyemen.

33Elińizde sizler menen birge jasap atırǵan kelgindilerge jawızlıq qılmań. 34Olarǵa óz jerlesińizdey qatnasta bolıń hám onı ózińizdi súygendey etip súyiń. Óytkeni sizler de Mısırda kelgindi boldıńız. Men – Qudayıńız Jaratqan Iyemen.

35Bir nárseniń uzınlıǵın, awırlıǵın hám sıyımlılıǵın ólshegenińizde nahaqlıq qılmań. 36Tárezińiz, awırlıq taslarıńız, efa hám hin ólshem ıdıslarıńız durıs bolsın. Men sizlerdi Mısırdan alıp shıqqan Qudayıńız Jaratqan Iyemen. 37Barlıq qaǵıyda hám nızamlarıma ámel qılıp, olardı orınlańlar. Men – Jaratqan Iyemen».