Lev 2 | KaaIBT22L | STEP | «Eger kim de kim Jaratqan Iyege arnap ǵálle sadaqasın bermekshi bolsa, sapalı biyday unınan alıp kelsin. Onıń ústine záytún mayın quyıp, xosh iyisli shayır qossın hám

‏ Leviticus 2

Ǵálle sadaqası

1 «Eger kim de kim Jaratqan Iyege arnap ǵálle sadaqasın bermekshi bolsa, sapalı biyday unınan alıp kelsin. Onıń ústine záytún mayın quyıp, xosh iyisli shayır qossın hám 2 sadaqanı Xaronnıń ulları bolǵan ruwxaniylerge aparsın. Ruwxaniy záytún mayı qosılǵan sapalı unnan bir uwısın toltırıp alsın hám xosh iyisli shayırdıń barlıǵın alıp, olardı tolıq sadaqanıń belgisi retinde qurbanlıq orınnıń ústinde tútetip jandırsın. Bul – Jaratqan Iyege xosh iyisli sıy boladı. 3 Ǵálle sadaqasınıń jandırılmaǵan bólegi Xaron hám onıń ullarına tiyisli. Bul bólek Jaratqan Iyege berilgen sıylardan bolǵanı ushın, júdá muxaddes.

4 Eger tandırda jabılǵan nandı ǵálle sadaqası etip bermekshi bolsańız, onda sapalı unnan záytún mayı qosılǵan ashıtqısız shórekler yamasa ústine záytún mayı jaǵılǵan pátirler ákeliwińiz tiyis.

5 Eger tabada pisirilgen nandı sadaqa qılmaqshı bolsańız, onda oǵan ashıtqı salmxay, sapalı unǵa záytún mayın qosıp iylep, pisiriń. 6 Onı usınǵan waqtıńızda, bóleklerge bóliwińiz hám ústine záytún mayın quyıwıńız kerek. Bul – ǵálle sadaqası.

7 Eger sadaqań qazanda pisirilgen bolsa, onda ol záytún mayı qosılǵan sapalı unnan tayarlanıwı tiyis.

8 Usı taqılette tayarlanǵan ǵálle sadaqasın Jaratqan Iyege beriw ushın, ruwxaniyge ákeliwińiz kerek. Al ruwxaniy onı qurbanlıq orınǵa alıp baradı. 9 Keyin ruwxaniy tolıq sadaqanıń belgisi retinde ǵálle sadaqalarınan bir bólek alıp, onı jandırılatuǵın qurbanlıq hám Jaratqan Iyege xosh iyisli sıy qılıp, qurbanlıq orında tútetip jandırsın. 10 Ǵálle sadaqasınıń jandırılmaǵan bólegi Xaron hám onıń ullarına tiyisli. Bul bólek Jaratqan Iyege berilgen sıylardan bolǵanı ushın, júdá muxaddes.

11 Jaratqan Iyege usınatuǵın ǵálle sadaqańızdıń hesh birine ashıtqı salmańlar. Óytkeni ashıtqını da, paldı da Jaratqan Iyege sıy qılıp, tútetip jandırmawıńız kerek. 12 Ashıtqı salınǵan nan menen paldı birinshi zúráátińiz sıpatında Jaratqan Iyege usınıwıńızǵa boladı. Biraq olar Jaratqan Iyege xosh iyisli sadaqa retinde qurbanlıq orında usınılmawı kerek. 13 Ǵálle sadaqańızdıń hár birine duz qosıńlar. Duz Qudaydıń sizler menen dúzgen kelisimin bildiretuǵın bolǵanlıqtan, sadaqalarıńız duzsız bolmasın.

14 Eger Jaratqan Iyege dáslepki ónimnen ǵálle sadaqasın bermekshi bolsańız, onda dáslepki shıqqan dándi quwırıp, onı túyip alıp keliń. 15 Bul ǵálle sadaqası bolǵanı ushın, onıń ústine záytún mayın quyıp, xosh iyisli shayır qosıń. 16 Ruwxaniy biraz túyilgen dán menen záytún mayınan alıp, olarǵa xosh iyisli shayırdıń hámmesin qosıp, tolıq sadaqanıń belgisi retinde qurbanlıq orında tútetip jandırsın. Bul – Jaratqan Iyege arnalǵan sıy».