‏ Leviticus 20

Gúnanıń tólemi

1Jaratqan Iye Muwsaǵa bılay dedi:

2– Izrail xalqına bılay dep ayt: «Izraillılardan yamasa arańızda jasap atırǵan kelgindi adamlardan birewi balasın Molox qudayına qurbanlıq qılsa, ol sózsiz óltirilsin. Xalıq onı tas boran qılsın. 3Kim de kim óz balasın Moloxqa qurbanlıq qılıp, Meniń Muxaddes mákanımdı haramlasa hám muxaddes atıma til tiygizse, Men oǵan qarsı shıǵıp, onı óz xalqınıń arasınan joq qılaman. 4Eger bir adam balasın Moloxqa qurbanlıq qılsa, bunı eldegi xalıq kórmegenge salıp, onı óltirmese, 5Ózim sol adamǵa hám onıń xojalıǵına qarsı shıǵaman. Maǵan opasızlıq qılǵan adamnıń ózin hám onıń izinen júrip, Moloxqa tabınǵanlardıń hámmesin óz xalqınıń arasınan joq qılaman.

6Kim de kim árwaqlardı hám ruwxlardı shaqıratuǵınlarǵa xabarlasıp, Maǵan opasızlıq qılsa, Men oǵan qarsı shıǵıp, onı óz xalqınıń arasınan joq qılaman. 7Ózlerińizdi Maǵan baǵıshlańlar hám muxaddes bolıńlar. Men – Qudayıńız Jaratqan Iyemen. 8Meniń qaǵıydalarıma ámel qılıp, orınlap júrińler. Sebebi sizlerdi Ózime ajıratıp alıp, muxaddes qılatuǵın Jaratqan Iyemen.

9Ákesin yamasa anasın ǵarǵaǵan hár bir adam sózsiz óltirilsin. Anasın yamasa ákesin ǵarǵaǵanı ushın, ol adamnıń qanı óz moynında qaladı.

10Bir adam basqa birewdiń hayalı menen buzıqshılıq qılsa, onda ol adam da, hayal da sózsiz óltirilsin. 11Ákesiniń hayalı menen jatqan adam ákesin shermende qılǵan boladı. Ekewi de sózsiz óltirilsin. Olardıń tógilgen qanı óz moynında qaladı. 12Eger bir adam óz kelini menen jatsa, ekewi de sózsiz óltirilsin. Sebebi olar buzıqlıq qılǵan boladı hám olardıń qanı óz moynında qaladı. 13Eger bir erkek adam hayal menen jatqanday qılıp, erkek penen jatsa, ekewi de jerkenishli is qılǵan boladı. Olar sózsiz óltirilsin hám olardıń qanı óz moynında qaladı. 14Eger bir adam qızına da, onıń anasına da úylense, ol uyatsız is qılǵan boladı. Sizlerdiń arańızda usınday uyatsız háreketler bolmawı ushın, úshewi de otqa jandırılsın. 15Eger bir erkek haywan menen jınısıy qatnas islese, adam da, haywan da sózsiz óltirilsin. 16Eger bir hayal jınısıy qatnasta bolıw ushın, bir haywanǵa jaqınlassa, hayal da, haywan da sózsiz óltirilsin. Olardıń qanı óz moynında qaladı.

17Bir adam ákesi yamasa anasınan tuwılǵan qarındasına úylenip, jınısıy qatnas qılsa, shermendelik boladı. Olardıń ekewi de xalıqtıń kóz aldında ashıq túrde joq qılınsın. Ol adam ógey qarındasınıń namısına tiygeni ushın, óz ayıbınıń jazasın tartadı. 18Etegi kelip júrgen hayal menen jatıp, jınısıy qatnasta bolǵan adam onıń etek kirin ashqan boladı, hayal da buǵan sherikles esaplanadı. Ekewi de xalıqtıń arasınan joq qılınsın.

19Ákeńniń ájapa-qarındası yamasa anańnıń ájapa-sińlisi menen jınısıy qatnas qılma. Óytkeni bul jaqın qanlasıńnıń namısı. Ekewińiz de óz ayıbıńızdıń jazasın tartasızlar.

20Ákesiniń aǵa-inisiniń hayalı menen jatqan adam olardıń namısına tiygen boladı. Ekewi de gúnalarınıń jazasın tartadı hám perzent kórmey, ólip ketedi. 21Tuwısqanınıń hayalına úylengen adam jerkenishli is qılǵan boladı. Ol tuwısqanınıń namısına tiygeni ushın, olar perzent kórmey ótedi.

22Meniń barlıq qaǵıyda hám nızamlarıma ámel qılıp, olardı orınlańlar. Sonda Men sizlerdiń jasawıńız ushın alıp baratırǵan jer sizlerden kewli aynıp, qusıp shıǵarıp taslamaydı. 23Sizlerdiń aldıńızdan quwıp shıǵaratuǵın milletlerdiń úrp-ádetleri boyınsha jasamańlar. Sebebi olar usı jaman ádetlerdiń hámmesin islep kiyatır. Sonlıqtan Men olardan jerkendim. 24Sonda sizler olardıń jerlerine iyelik etesizler. Sút hám pal aǵıp turǵan sol jerdi sizlerge múlik etip beremen, degen edim. Sizlerdi basqa milletlerden ajıratıp qoyǵan Qudayıńız Jaratqan Iye – Men bolaman.

25Sizler hadal hám haram sanalǵan haywanlar menen quslardı ajıratıwıńız kerek. Sizlerge haram dep aytqan haywanlar, quslar hám jer bawırlawshılardı jep, ózlerińizdi haramlamańlar. 26Meniń aldımda muxaddes bolıńlar, óytkeni Jaratqan Iye bolǵan Men – muxaddespen. Maǵan tiyisli bolıwıńız ushın, sizlerdi basqa xalıqlardan ajıratıp aldım.

27Árwaqlardı hám ruwxlardı shaqıratuǵın erkek te, hayal da tas boran qılınıp, sózsiz óltirilsin. Olardıń qanı óz moynında qaladı».