Lev 21 | KaaIBT22L | STEP | Jaratqan Iye Muwsaǵa bılay dedi: – Xaronnıń ulları bolǵan ruwxaniylerge bılay dep ayt: «Ruwxaniylerdiń hesh biri óz aǵayinleriniń arasındaǵı bir marhumǵa jantasıp, ózin haramlamasın.

‏ Leviticus 21

Ruwxaniylerge tiyisli nızamlar

1 Jaratqan Iye Muwsaǵa bılay dedi:

– Xaronnıń ulları bolǵan ruwxaniylerge bılay dep ayt: «Ruwxaniylerdiń hesh biri óz aǵayinleriniń arasındaǵı bir marhumǵa jantasıp, ózin haramlamasın. 2 Al eger de marhum óziniń jaqın tuwǵanı: anası, ákesi, ulı, qızı, aǵa-inisi yamasa 3 úyindegi turmısqa shıqpaǵan ájapa-qarındası bolsa, onda onıń óligine jantasıp, ózin haramlawı múmkin. 4 Biraq qáyin jurtı tárepinen birew qaytıs bolsa, sol sebepli ózin haramlamasın.

5 Ruwxaniyler aza tutqanda shashın qırdırıp, saqallarınıń ushların qırqtırmasın hám denelerin tilip jaraqatlamasın. 6 Olar Qudayı ushın muxaddes bolsın, Qudayınıń atına til tiygizbesin. Olar Jaratqan Iyege arnalǵan, yaǵnıy Qudayına awqat sıpatında berilgen sıylardı usınǵanı ushın muxaddes bolsın. 7 Ruwxaniyler buzıq yamasa zorlanǵan hayallarǵa hám ajırasqan hayallarǵa úylenbewi tiyis. Sebebi ruwxaniy Quday ushın muxaddes. 8 Qudayıńızǵa awqat sıpatında berilgen sıylardı usınatuǵın ruwxaniyler bolǵanlıqtan, sizler de olardı muxaddes sanap, húrmet qılıń. Olar sizler ushın muxaddes. Óytkeni Men sizlerdi Ózime ajıratıp alıp, muxaddes qılatuǵın Jaratqan Iye – muxaddespen. 9 Eger bir ruwxaniydiń qızı buzıqlıq qılıp, ózin haramlasa, onda ol ózin de, ákesin de haramlaǵan boladı. Onday qız otqa jandırıp jiberilsin.

10 Basına maylaw mayı quyılıp, ruwxaniylik kiyimlerdi kiyiwge tayınlanǵan hám basqa ruwxaniylerden ullı bolǵan bas ruwxaniy aza tutıp, shashların jayıp júrmesin hám kiyimlerin jırtpasın. 11 Ol hesh qanday ólige jaqınlaspasın, hátteki qaytıs bolǵan ákesi, ya anası bolsa da, ózin haramlamasın. 12 Aza tutıw ushın, ol Muxaddes shatırdaǵı xızmetin qaldırmasın, Qudaydıń Muxaddes shatırın haramlamasın. Sebebi maylanǵan ruwxaniy Qudayına baǵıshlanǵan. Men – Jaratqan Iyemen. 13 Bas ruwxaniy tek ǵana pák qızǵa úylensin. 14 Ol jesir, kúyewinen ajırasqan, zorlanǵan yamasa buzıq hayalǵa úylenbesin. Tek ǵana óz xalqınan bolǵan pák qızǵa úylensin. 15 Solay etip, ol óz urpaǵın haramlanıwdan saqlasın. Sebebi Men onı Ózime ajıratıp alıp, muxaddes qılǵan Jaratqan Iyemen».

16 Jaratqan Iye Muwsaǵa jáne bılay dedi:

17 – Xaronǵa bılay dep ayt: «Keleshekte áwladıńnan denesinde kemshiligi bar hesh bir adam awqat sıpatında beriletuǵın sıydı usınıw ushın Qudayına jaqınlamasın. 18 Denesinde kemshiligi bar hesh bir adam qurbanlıq orınǵa jaqınlamasın: soqır, aqsaq, mayıp, sıqılsız, 19 ayaǵı yamasa qolı sınıq, 20 búkir, irgejeyli, kózinde kemshiligi bar, qıshıma jarası bar, qotır hám jınısıy qos tuqım bezi ezilgen adam. 21 Ruwxaniy Xaronnıń urpaǵınan denesinde kemshiligi bar hesh bir adam Jaratqan Iyeniń awqatın, yaǵnıy Oǵan arnalǵan sıylardı usınıw ushın qurbanlıq orınǵa jaqınlamasın. 22 Degen menen, ol adam Qudayına usınılǵan muxaddes hám eń muxaddes awqattan jewine boladı. 23 Biraq ol Muxaddes bólmedegi perdege hám qurbanlıq orınǵa jaqınlamasın. Sebebi onıń denesinde kemshiligi bar. Ol muxaddes zatlarǵa jaqınlap, olardı haramlamasın. Men olardı Ózime ajıratıp alıp, muxaddes qılatuǵın Jaratqan Iyemen».

24 Muwsa Xaron menen ullarına hám pútkil Izrail xalqına usılardı járiyaladı.