Lev 22 | KaaIBT22L | STEP | Jaratqan Iye Muwsaǵa bılay dedi:

‏ Leviticus 22

Sıylardıń muxaddesligi

1 Jaratqan Iye Muwsaǵa bılay dedi:

2 – Xaronǵa hám onıń ullarına bılay dep ayt: «Izrail xalqınıń Maǵan beretuǵın muxaddes sıylarına húrmet penen qarasın, Meniń muxaddes atıma til tiygizbesin. Men – Jaratqan Iyemen. 3 Eger áwladıńızdan biri Izrail xalqınıń Maǵan alıp kelgen muxaddes sıylarına haram halda jaqınlassa, ol Meniń dárgayımnan joq qılınadı. Men – Jaratqan Iyemen.

4 Xaron urpaǵınan jaman teri keselligine duwshar bolǵan yamasa jınısıy aǵzasınan iriń ajıralıp shıqqan birewi taza bolmaǵansha, muxaddes sıylardı jemesin. Óli denege tiygeni ushın haram sanalǵan bir nársege jantasqan, urıǵı aqqan, 5 adamdı haram qılatuǵın jer bawırlawshılardıń birine yamasa bir nárseden haram sanalǵan bir adamǵa jantasqan 6 ruwxaniy keshke deyin haram sanaladı. Ol suwǵa juwınbaǵansha muxaddes sıylardan jemesin. 7 Kún batqannan soń, ol taza sanaladı hám muxaddes sıylardan jewine boladı. Óytkeni bul onıń awqatı bolıp esaplanadı. 8 Haram ólgen yamasa jabayı haywanlar tárepinen bawızlanǵan ólikti jep, ruwxaniy ózin haramlamasın. Jaratqan Iye – Men bolaman.

9 Ruwxaniyler Meniń buyrıqlarıma ámel qılsın. Bolmasa gúnalarınıń jazasın tartadı, buyrıqlarımdı pisent etpegeni ushın óledi. Men – olardı Ózime ajıratıp alıp, muxaddes qılatuǵın Jaratqan Iyemen.

10 Ruwxaniydiń shańaraq aǵzalarınan bolmaǵan basqa hesh kim, ruwxaniydiń úyinde waqtınsha jasap atırǵan adam bolsın, xızmetshisi bolsın, muxaddes sıylardan jemesin. 11 Biraq ruwxaniydiń pulǵa satıp alǵan yamasa úyinde tuwılǵan qul hám shorıları onıń awqatınan jewine boladı. 12 Ruwxaniydiń qızı ruwxaniy bolmaǵan adamǵa turmısqa shıqsa, ol baǵıshlap usınılǵan muxaddes sıylardan jemesin. 13 Biraq ol balası bolmay, jesir qalǵan bolsa yamasa kúyewinen ayırılısqan bolsa hám ákesiniń úyine qaytıp kelgennen soń, qız waqtındaǵıday úyinde jasasa, onda ákesiniń awqatınan jewine boladı. Al ruwxaniydiń shańaraǵınan bolmaǵan hesh bir adam onnan jemesin.

14 Eger kim de kim bilmesten muxaddes sıydan jep qoysa, ol sol sıydıń ornın toltırıp, ústine besten bir bólegin qosıp, ruwxaniyge qaytarıp bersin. 15 – 16 Ruwxaniyler Izrail xalqınıń Jaratqan Iyege alıp kelgen muxaddes sıyların basqa izraillılardıń jewine jol qoyıp, ózlerine tiyisli muxaddes sıylardı haramlamasın. Bolmasa izraillılar gúnaǵa batıp, jazaǵa tartıladı. Sebebi Men – qurbanlıqlardı Ózime ajıratıp, muxaddes qılatuǵın Jaratqan Iyemen».

Qabıl etiletuǵın qurbanlıqlar

17 Jaratqan Iye Muwsaǵa bılay dedi:

18 – Xaronǵa, onıń ullarına hám pútkil Izrail xalqına bılay dep ayt: «Izrail xalqınan yamasa izraillılar arasında jasap atırǵan kelgindilerden biri Jaratqan Iyege bergen wádesin orınlaw ushın yamasa óz ıqtıyarı menen jandırılatuǵın qurbanlıq bermekshi bolsa, 19 qurbanlıǵınıń qabıl etiliwi ushın, minsiz bir erkek iri mal yamasa mayda mal alıp kelsin. 20 Kemshiligi bar hesh bir haywandı qurbanlıqqa usınbańlar. Óytkeni bular qabıl etilmeydi.

21 Kim de kim bergen wádesin orınlaw ushın yamasa óz ıqtıyarı menen Jaratqan Iyege tatıwlıq qurbanlıǵın beriw ushın iri mal yamasa mayda mal alıp kelse, onıń qabıl etiliwi ushın ákelgen malı minsiz bolıwı tiyis. Onıń hesh qanday kemshiligi bolmasın. 22 Soqır, mayıp, jaraqatlanǵan, irińli jarası bar, qıshıma jarası bar yamasa qotırı bar maldı Jaratqan Iyege usınbańlar hám Oǵan sıy qılıp, qurbanlıq orınnıń ústine qoymańlar. 23 Al músheleriniń biri uzın yamasa kelte bolǵan iri mal yamasa mayda maldı ıqtıyarlı túrde beretuǵın qurbanlıq ushın usınıwıńızǵa boladı. Biraq bunday maldı wáde etilgen qurbanlıq etip usınbań, ol qabıl etilmeydi. 24 Tuqım bezi ezilgen, julınıp qalǵan yamasa kesip taslanǵan maldı Jaratqan Iyege usınbańlar, elińizde buǵan hesh qashan jol qoymańlar. 25 Usınday kemshiligi bar maldı jat jerli adamnan alıp, Qudayǵa awqat sıpatında qurbanlıq etip bermeń. Sebebi bul mal zıyanlanǵan hám kemshiligi bar. Ol qabıl etilmeydi».

26 Jaratqan Iye Muwsaǵa bılay dedi:

27 – Buzaw, qozı yamasa ılaq jańa tuwılǵan waqtında jeti kún anasınıń qasında bolsın. Segizinshi kúnnen baslap, onı Jaratqan Iyege arnap qurbanlıq etip berseńiz boladı. 28 Iri yamasa mayda maldı tuwǵan balası menen birge bir kúnde shalmańlar.

29 Jaratqan Iyege minnetdarshılıq qurbanlıǵın bergen waqıtta, onı qabıl etiletuǵın túrde usınıń. 30 Onıń góshin sol kúni jep taslań, azanǵa deyin awıstırmań. Men – Jaratqan Iyemen.

31 Buyrıqlarıma boysınıp, olardı orınlańlar. Men – Jaratqan Iyemen. 32 Meniń muxaddes atıma til tiygizbeńler. Izrail xalqı Meni muxaddes dep tán alsın. Sizlerdi Ózime ajıratıp alıp, muxaddes qılatuǵın Jaratqan Iyemen. 33 Qudayıńız bolıw ushın sizlerdi Mısırdan alıp shıqtım. Men – Jaratqan Iyemen.