‏ Leviticus 23

Bayramlar

1Jaratqan Iye Muwsaǵa bılay dedi:

2– Izrail xalqına bılay dep ayt: «Muxaddes jıynalıs dep járiya qılınatuǵın bayramlarım, Jaratqan Iyege arnalǵan bayramlar mınalar boladı:

Shabbat, yaǵnıy dem alıs kúni

3Altı kún jumıs isleń. Biraq jetinshi kún sizler ushın tolıq dem alatuǵın Shabbat kúni hám muxaddes jıynalıs kúni boladı. Hesh qanday jumıs islemeń. Qaysı jerde jasasańız da, Shabbat kúnin Jaratqan Iyege baǵıshlań.

Qutqarılıw hám ashıtqısız nan bayramı

4Belgilengen waqıtta muxaddes jıynalıs dep járiya qılatuǵın Jaratqan Iyege arnalǵan bayramlar mınalar: 5Birinshi aydıń on tórtinshi kúni keshte Jaratqan Iyege arnalǵan Qutqarılıw bayramı. 6On besinshi kúni Jaratqan Iyege arnalǵan Ashıtqısız nan bayramı bolsın. Solay etip, jeti kún ashıtqısız nan jeń. 7Bayramnıń birinshi kúni muxaddes jıynalısıńız bolsın. Sol kúni kúndelikli jumısıńızdı islemeń. 8Jeti kún dawamında Jaratqan Iye ushın qurbanlıq beriń. Jetinshi kúni muxaddes jıynalıs bolsın. Kúndelikli jumısıńızdı islemeń».

Birinshi zúráát

9Jaratqan Iye Muwsaǵa bılay dedi:

10– Izrail xalqına bılay dep ayt: «Sizlerge beretuǵın elge kirip, arpa zúráátin jıynaǵanıńızda, jıynaǵan zúráátińizdiń birinshi bawın ruwxaniyge ákelip beriń. 11Qabıl etiliwi ushın, Shabbat kúninen keyingi kúni ruwxaniy bawdı Jaratqan Iyeniń aldında joqarı kóterip usınsın. 12Baw joqarı kóterip usınılǵan kúni Jaratqan Iyege bir jasar minsiz erkek toqlını jandırılatuǵın qurbanlıq etip usınıń. 13Toqlı menen birge ǵálle sadaqası qılıp, záytún mayı aralastırılǵan bir efa sapalı unnıń onnan ekisin bersin. Bul – Jaratqan Iyege xosh iyisli sıy boladı. Jandırılatuǵın qurbanlıq penen birge ishimlik sadaqası etip, bir hin sharaptıń tórtten birin usınıń. 14Qudayıńızǵa usı sadaqanı alıp keletuǵın kúnge deyin nan, quwırmash hám jańa pisken dán jemeńler. Qay jerde jasasańız da, bul áwladlar dawamında sizlerge máńgi qaǵıyda bolsın».

Hápteler bayramı

15«Shabbat kúninen keyingi bawdı joqarı kóterip usınǵan kúnnen baslap, jeti hápte sanań. 16Jetinshi Shabbattan keyin, eliwinshi kún baslanǵanda, Jaratqan Iyege taza biyday zúráátinen sadaqa ákeliń. 17Jasap atırǵan jerińizden Jaratqan Iyege joqarı kóterip usınılatuǵın sadaqa etip, eki nan alıp keliń. Nanlar birinshi zúráátińizden bolıp, onnan eki efa sapalı unnan ashıtqı salınıp jawılsın hám bunı Jaratqan Iyege usınıń. 18Nan menen birge jandırılatuǵın qurbanlıq ushın, Jaratqan Iyege bir jasardan bolǵan minsiz jeti erkek toqlı, bir buǵa hám eki qoshqardı alıp keliń. Ǵálle hám ishimlik sadaqası menen usınılatuǵın bul qurbanlıq Jaratqan Iyege xosh iyisli sıy boladı. 19Gúna qurbanlıǵına bir teke, tatıwlıq qurbanlıǵına bir jasardan eki toqlı alıp keliń. 20Ruwxaniy eki toqlını birinshi biyday zúráátinen jabılǵan nan menen birge, Jaratqan Iyeniń aldında joqarı kóterip usınsın. Jaratqan Iyege baǵıshlanıp, muxaddes bolǵan bul qurbanlıqlar ruwxaniylerge tiyisli. 21Sol kúndi muxaddes jıynalıs dep járiyalańlar hám kúndelikli jumıslarıńızdı islemeńler. Bul jasap atırǵan hár bir jerińizde áwladlarıńız dawamında máńgi qaǵıyda bolsın.

22Jerińizdegi eginlerdi jıynaǵanıńızda, atızıńızdıń shetine deyin orıp almań. Túsip qalǵan masaqlardı jıynap almań. Olardı jarlılarǵa hám kelgindi adamlarǵa qaldırıń. Men – Qudayıńız Jaratqan Iyemen».

Kárnay bayramı

23Jaratqan Iye Muwsaǵa bılay dedi:

24– Izrail xalqına bılay dep ayt: «Jetinshi aydıń birinshi kúni dem alıs kúni bolsın. Sol kúni kárnay shertilip, eslew kúni belgilensin hám muxaddes jıynalıs ótkerilsin. 25Sol kúni kúndelikli jumısıńızdı islemeń, Jaratqan Iyege qurbanlıqlar usınıń».

Gúnadan pákleniw kúni

26Jaratqan Iye Muwsaǵa bılay dedi:

27«Jetinshi aydıń onınshı kúni Gúnadan pákleniw kúni. Sol kúni muxaddes jıynalıs bolsın hám oraza tutıp, Jaratqan Iyege sıy usınıń. 28Sol kúni hesh qanday jumıs islemeń. Óytkeni Qudayıńız Jaratqan Iyeniń aldında gúnalarıńızdan páklenetuǵın kúnińiz boladı. 29Sol kúni oraza tutpaǵan hár bir adam óz xalqı arasınan joq qılınadı. 30Sol kúni qanday da bir jumıs islegen adamdı óz xalqı arasınan joq etemen. 31Hesh qanday jumıs islemeń. Bul jasap atırǵan hár bir jerińizde áwladlar boyı máńgi qaǵıyda bolsın. 32Sol kúni sizler ushın tolıq dem alatuǵın Shabbat kúni bolıp, oraza tutıń. Aydıń toǵızınshı kúniniń keshinen baslap, erteńgi keshke deyin Shabbat kúnin belgileń».

Qos bayramı

33Jaratqan Iye Muwsaǵa bılay dedi:

34– Izrail xalqına bılay dep ayt: «Jetinshi aydıń on besinshi kúninen baslap, jeti kún dawamında Jaratqan Iyege arnap, Qos bayramın belgileń. 35Bayramnıń birinshi kúni muxaddes jıynalıs ótkeriń. Sol kúni kúndelikli jumısıńızdı islemeń. 36Jeti kún dawamında kúnine bir márte Jaratqan Iyege sıy usınıń. Segizinshi kúni de muxaddes jıynalıs ótkeriń hám Jaratqan Iyege sıy usınıń. Bul saltanatlı jıynalıs boladı. Kúndelikli jumısıńızdı islemeń.

37Muxaddes jıynalıs dep járiya qılınatuǵın Jaratqan Iyege arnalǵan bayramlar usılar boladı. Bayramlarda Jaratqan Iyege arnalǵan sıylardı, jandırılatuǵın qurbanlıqlardı, ǵálle sadaqaların, basqa qurbanlıqlardı hám ishimlik sadaqaların belgilengen óz kúnlerinde alıp keliń. 38Bular Jaratqan Iyeniń Shabbatınan, Jaratqan Iyege arnap alıp keletuǵın sıylarıńızdan, wáde hám ıqtıyarlı qurbanlıqlarıńızdan tısqarı bolsın.

39Jerlerińizdiń zúráátlerin jıynap bolǵan waqtıńızda, jetinshi aydıń on besinshi kúninen baslap, jeti kún dawamında Jaratqan Iyege arnap Qos bayramın ótkiziń. Bayramnıń birinshi hám segizinshi kúni dem alıs kúni bolsın. 40Birinshi kúni miywe aǵashlarıńızdıń eń jaqsı miywelerin, palma aǵashınıń japıraqların, mol japıraqlı terektiń talların, dárya boyında ósetuǵın tallardıń shaqaların jıynap, Qudayıńız Jaratqan Iyeniń aldında jeti kún dawamında shadlanıń. 41Bunı hár jılı jeti kún dawamında Jaratqan Iyeniń bayramı etip belgileń. Jıldıń jetinshi ayında belgilenetuǵın usı bayram áwladlarıńız dawamında máńgi qaǵıyda bolıp qalsın. 42Jeti kún dawamında qosta jasań. Hár bir jergilikli izraillı qoslarda jasasın. 43Sonda keleshek áwladlarıńız Izrail xalqın Mısırdan alıp shıqqan waqtımda, olardıń qoslarda jasaǵanın bilip aladı. Men – Qudayıńız Jaratqan Iyemen».

44Usılay etip, Muwsa Izrail xalqına Jaratqan Iyege arnalǵan bayramlardı járiyaladı.