‏ Leviticus 26

Qudayǵa boysınǵanlardıń jarılqanıwı

1«Ózlerińizge jalǵan qudaylardıń músinlerin islemeńler, kiyeli taslardı yamasa oyıp islengen taslardı ornatpańlar. Sebebi Men – Qudayıńız Jaratqan Iyemen. 2Meniń Shabbatıma ámel qılıń, Muxaddes mákanıma húrmet kórsetiń. Men – Jaratqan Iyemen.

3Eger qaǵıydalarım boyınsha jasap, buyrıqlarımdı dıqqat penen orınlap júrseńiz, 4jawındı óz waqtında jawdıraman. Jer óz zúráátin, miywe aǵashlar óz miywelerin beredi. 5Zúráátińiz sonshelli mol bolǵanlıqtan, júzim jıynaytuǵın waqıtqa deyin qırman aydaysızlar, egis waqtına deyin júzim jıynaysızlar. Azıq-awqatıńız kóp boladı hám elińizde qáwipsiz jasaysızlar.

6Elińizde tınıshlıq saqlayman, tınısh jatıp-turasızlar, hesh kim sizlerdi qorqıta almaydı. Jırtqısh haywanlardı jerińizden quwıp shıǵaraman. Jerińiz sawash sebepli wayran bolmaydı. 7Dushpanlarıńızdı quwasızlar, olar sizlerdiń qılıshlarıńızdıń soqqısınan aldıńızda jerge qulaydı. 8Besewińiz júz adamdı, júzińiz on mıń adamdı quwatuǵın bolasızlar. Dushpanlarıńızdı qılıshtan ótkerip, jeńiske erisesizler. 9Sizlerge Óz názerimdi salaman, sizlerdi ósip-óndirip, kóbeytemen. Sizler menen dúzgen kelisimime sadıq qalaman. 10Burınǵı zúráátińizdi jep tawısa almaysızlar. Jańadan alǵan zúráátińizge orın bosatıw ushın burınǵı zúráátińizdi shıǵarıp taslaytuǵın bolasızlar. 11Mákan jayımdı sizlerdiń arańızǵa quraman, sizlerden jerkenip, júz burmayman. 12Sizlerdiń arańızda jasaytuǵın Qudayıńız bolaman. Sizler de Meniń xalqım bolasızlar. 13Men sizlerdi Mısır elindegi qullıqtan qutqarǵan Qudayıńız Jaratqan Iyemen. Moyıntırıǵıńızdı sındırıp tasladım hám baslarıńızdı kóterip júriwge múmkinshilik berdim».

Qudayǵa boysınbawshılıqtıń jazası

14«Biraq Maǵan qulaq aspay, pútkil buyrıqlarımdı orınlamasańız, jazalanasızlar. 15Qaǵıydalarımnan júz burıp, nızamlarımnan jerkenip, buyrıqlarıma boysınbasańız hám kelisimimdi buzsańız, 16onda sizlerge mınaday jaza jiberemen: ústińizge qorqınısh dóndiremen. Ókpe keselligi hám ısıtpa kózlerińizdiń nurın sóndirip, janıńızdı kemiredi. Tuqımdı bosqa egetuǵın bolasızlar, sebebi zúráátińizdi dushpanlarıńız jeytuǵın boladı. 17Sizlerge Ózim qarsı shıǵaman. Dushpanlarıńız sizlerdiń ústińizden jeńiske erisedi. Sizlerdi jek kóretuǵınlar sizlerge húkimdarlıq qıladı hám izińizden hesh kim quwmasa da, qashatuǵın bolasızlar.

18Eger bularǵa da qaramay, Maǵan qulaq salmasańız, gúnalarıńızdıń jazasın jeti ese arttıraman. 19Qaysar menmenligińizdi joq qılaman. Aspanıńızdı temir sıyaqlı, jerińizdi qola sıyaqlı qılaman. 20Kúshińizdi bosqa sarplaysızlar, jerińiz óz zúráátin, miywe aǵashlarıńız miywesin bermeytuǵın boladı.

21Eger bunnan keyin de qarsı shıǵıwdı dawam etseńiz, Maǵan qulaq salıwdı qálemeseńiz, gúnalarıńızdıń jazasın jeti esege arttıraman. 22Sizlerge qarsı jabayı haywanlardı jiberemen. Olar sizlerdi balalarıńızdan ayırıp, mallarıńızdı qırıp taslaydı. Sonda sizlerdiń sanıńız azayıp, jollarıńız bosap qaladı.

23Bunıń menen de tuwrı jolǵa túspey, Maǵan qarsı shıǵıwdı dawam etseńiz, 24Men de sizlerge qarsı shıǵıp, gúnalarıńız ushın sizlerdi jeti ese jazalayman. 25Kelisimimdi buzǵanıńız ushın basıńızǵa sawash dóndirip, jazalayman. Qalalarıńızǵa sheginip, tıǵılsańız, arańızǵa illet jiberemen hám sizlerdi dushpanıńızǵa táslim qılaman. 26Bir tislem nanǵa zar qılaman. Sonda on hayal nanların bir tandırda jabatuǵın boladı. Nanıńız az-azdan, ólshep beriletuǵın boladı. Sizler bunı jegenińiz benen de, buǵan toymaysızlar.

27Bulardan keyin de Maǵan jáne qulaq salmay, Maǵan qarsı shıqsańız, 28onda Men de ǵázep penen sizlerge qarsı shıǵaman hám gúnalarıńızdıń jazasın jeti esege kóbeytemen. 29Ashlıq sebepli ul-qızlarıńızdıń denesin jeytuǵın bolasızlar. 30Tabınatuǵın orınlarıńızdı qulatıp, tútetki tútetiletuǵın orınlarıńızdı joq qılaman. Óliklerińizdi jansız butlarıńızǵa qosıp úyemen, sizlerden jerkenetuǵın bolaman. 31Qalalarıńızdı wayran qılıp, muxaddes orınlarıńızdı buzıp taslayman. Maǵan usınǵan xosh iyisli sadaqalarıńızdı qabıl etpeymen. 32Elińizdi wayran qılaman, ol jerge jaylasatuǵın dushpanlarıńız bul awhalǵa qattı tań qalısatuǵın boladı. 33Sizlerdi bolsa, basqa xalıqlardıń arasına tarqatıp jiberip, qılıshım menen sizlerdiń izińizge túsip alaman. Elińiz bosap qaladı, qalalarıńız wayran boladı. 34Sizler dushpanlarıńızdıń elinde jasap atırǵanıńızda, jerińiz bosap qaladı. Sol waqıtları Shabbat jıllarınıń ornın toltırıp, dem aladı. 35Jerińiz wayran bolıp, bosap qalǵan waqıtta dem aladı. Sebebi sizler elińizde jasap atırǵan waqtıńızda, Shabbat jılları jerińizge dem bermegen edińiz.

36Dushpanlarıńızdıń jerlerinde aman qalǵanlarıńızdıń júregine sonday bir qorqınısh salaman, hátteki, japıraqtıń sıtırlısınan da qılıshtan qashqanday bolıp qashasızlar. Sizlerdiń izińizden hesh kim túspese de, qashıp, jıǵılasızlar. 37Sizlerdi hesh kim quwmasa da, qılıshtan qashqanday bolıp, bir-birińizge súrnigip jıǵılasızlar. Dushpanlarıńızǵa qarsı tura almaysızlar. 38Solay etip, basqa xalıqlardıń arasında joq bolasızlar. Dushpanlarıńızdıń jerleri sizlerdi jutıp jiberedi. 39Aman qalǵanlarıńız bolsa, dushpan jerlerinde ózlerińizdiń hám ata-babalarıńızdıń gúnaları sebepli dimarıńız qurıp, azap shegesizler.

40Biraq sizler ózlerińizdiń hám ata-babalarıńızdıń gúnaların, Maǵan qıyanet etkenlerińizdi hám Maǵan qarsı islegen islerińizdi tán alasızlar. 41Sebebi gúnalarıńız sebepli sizlerge qarsı shıǵıp, dushpanlarıńızdıń jerine alıp baraman. Endi tas júreklerińizdi jumsartıp, ayıplarıńızdıń jazasın óteysizler. 42Sonda Men de Yaqıp, Ísaq hám Ibrayım menen dúzgen kelisimimdi hám sizlerge wáde qılıp bergen jerdi esleymen. 43El wayran bolıp, bosap qalǵan waqıtları Shabbat jıllarınıń ornın toltırıp, dem aladı. Sizler islegen gúnalarıńızdıń jaza múddetin óteysizler, óytkeni sizler nızamlarımnan bas tartıp, qaǵıydalarımnan jerkendińiz. 44Bularǵa qaramay, Men dushpan jerlerinde bolǵan sizlerden bas tartpayman, sizlerden jerkenip, tolıǵı menen qırıp taslamayman. Sizler menen dúzgen kelisimimdi buzbayman. Sebebi Men sizlerdiń Qudayıńız Jaratqan Iyemen. 45Qudayıńız bolıw ushın, basqa xalıqlardıń kóz aldında Mısırdan alıp shıqqan ata-babalarıńız benen dúzgen kelisimimdi sizler ushın esleymen. Men – Jaratqan Iyemen».

46Jaratqan Iyeniń Sinay tawında Muwsa arqalı Izrail xalqına bergen qaǵıydaları, nızamları hám kórsetpeleri usılardan ibarat edi.