Lev 27 | KaaIBT22L | STEP | Jaratqan Iye Muwsaǵa bılay dedi:

‏ Leviticus 27

Baǵıshlanǵan adamnıń hám mal-múliktiń qunı, olardı qaytarıp alıw tártibi

1 Jaratqan Iye Muwsaǵa bılay dedi:

2 – Izrail xalqına bılay dep ayt: «Eger kim de kim bir adamdı Jaratqan Iyege baǵıshlawǵa wáde berse, sol adamnıń qunı ushın beriletuǵın tólemi tómendegidey mólsherde bolsın. 3 Bul tólemniń qunı mınaday boladı: jigirma jastan alpıs jasqa deyingi er adamlar ushın Muxaddes orın ólshemi menen eliw shekel ^{▼▼ Eliw shekel – bir shekel shama menen 11 gr.} gúmis, 4 al hayallar ushın otız shekel gúmis. 5 Bes jastan jigirma jasqa deyingi er adamlar ushın jigirma shekel, al hayal-qızlar ushın on shekel. 6 Bir aylıq bópeden bes jasqa deyin bolǵan er balalar ushın bes, qızlar ushın úsh shekel gúmis. 7 Eger alpıs yamasa onnan joqarı jasta bolsa, onda erkekler ushın on bes shekel gúmis, al hayallar ushın on shekel gúmis tólensin. 8 Eger wáde bergen adam jarlı bolıp, belgilengen bahanı tólewge shaması kelmese, baǵıshlanǵan adamdı ruwxaniyge alıp barsın. Ruwxaniy wáde bergen adamnıń jaǵdayına qaray, baha belgilesin.

9 Eger Jaratqan Iyege wáde qılınǵan mal qurbanlıqqa shalıwǵa bolatuǵın mal bolsa, ol Jaratqan Iyege baǵıshlanǵan muxaddes bolıp esaplanadı. 10 Wáde qılǵan adam Jaratqan Iyege baǵıshlaǵan malın jaqsısınıń ornına jamanın yamasa jamanınıń ornına jaqsısın almastırmasın. Eger ol maldı almastırsa, almastırılǵan mal menen ekewi de Qudayǵa tiyisli bolıp, muxaddes sanaladı. 11 Eger Jaratqan Iyege arnap ákelingen sıy haram sanalǵan mallardan bolsa, onı ruwxaniyge alıp barsın. 12 Ruwxaniy maldıń jaqsı-jamanına qarap, baha belgilesin hám onıń bahası solay qalsın. 13 Eger iyesi maldı qaytarıp satıp alıwdı qálese, ruwxaniy tárepinen belgilengen bahanıń ústine besten bir bólegin qosıp tólesin.

14 Eger bir adam óziniń úyin sıy qılıp, Jaratqan Iyege baǵıshlasa, ruwxaniy úydiń jaqsı-jamanına qarap, onıń bahasın belgilesin. Ruwxaniy úyge qanday baha belgilese, úydiń bahası sonday boladı. 15 Eger sol adam baǵıshlaǵan úyin qaytarıp satıp alıwdı qálese, ruwxaniydiń belgilegen bahasınıń ústine besten bir bólegin qosıp tólesin. Sonda úy qaytadan óziniki bolıp qaladı.

16 Eger bir adam babasınan qalǵan miyras atızınıń bir bólegin Jaratqan Iyege baǵıshlawdı qálese, atızǵa egiletuǵın tuqımnıń muǵdarı boyınsha bahası belgilensin. Bir xomer ^{▼▼ Bir xomer – shama menen 220 l.} arpa tuqımı egiletuǵın atızdıń bahası eliw shekel gúmis boladı. 17 Eger atız Qutlı jılda baǵıshlansa, bunıń bahası belgilengen tolıq baha boyınsha qalsın. 18 Eger atız Qutlı jıldan soń baǵıshlansa, ruwxaniy keyingi Qutlı jılǵa deyin qalǵan jıllardıń sanı boyınsha atızdıń bahasın belgilesin. Atızdıń bahası soǵan sáykes tómen boladı. 19 Eger sol adam atızın qaytarıp alıwdı qálese, ol atızǵa belgilengen bahanıń ústine besten bir bólegin qosıp tólesin. Sonda atız jáne óziniki bolıp qaladı. 20 Biraq sol adam atızdı ózine qaytarıp satıp almasa hám atız basqa birewge satılǵan bolsa, onda atızdıń iyesi atızdı ózine qaytarıp satıp ala almaydı. 21 Atız Qutlı jılǵa deyin tursa, onda bul Jaratqan Iyege baǵıshlanǵan bolıp, muxaddes sanaladı hám atız ruwxaniylerge tiyisli bolıp qaladı.

22 Eger bir adam satıp alǵan, yaǵnıy babasınan miyras bolmaǵan atızın Jaratqan Iyege baǵıshlasa, 23 ruwxaniy Qutlı jılǵa deyin qalǵan jıllar boyınsha onıń bahasın belgilesin. Ol adam belgilengen bahanı sol kúni-aq tólesin hám tólem Jaratqan Iyege tiyisli bolıp, muxaddes sanaladı. 24 Keyingi Qutlı jılda atız birinshi iyesine qaytarıp berilsin. 25 Hár bir belgilengen baha Muxaddes orınnıń shekeli boyınsha belgilensin. Bir shekel jigirma geradan ^{▼▼ Jigirma gera – bir gera shama menen 0,5 gr.} ibarat.

26 Iri hám mayda mallarıńızdıń birinshi tuwılǵan tólleri Jaratqan Iyeniki bolıp, olardıń hesh qaysısın Jaratqan Iyege baǵıshlamań. Sebebi ol Jaratqan Iyege tiyisli. 27 Biraq birinshi tuwılǵan mal haram sanalǵan mallardan bolsa, ol ushın ruwxaniydiń belgilegen bahasın hám onıń ústine besten bir bólegin qosıp tólep, maldı qaytarıp alıwına boladı. Eger ol qaytarıp alınbasa, onda mal belgilengen bahaǵa basqa birewge satıladı.

28 Jaratqan Iyege tolıǵı menen baǵıshlanǵan adam, mal hám miyrastan qalǵan atızdıń hesh biri satılmasın hám qaytarıp alınbasın. Óytkeni Jaratqan Iyege tolıǵı menen baǵıshlanǵan hár bir nárse Jaratqan Iyege tiyisli bolıp, júdá muxaddes sanaladı. 29 Ólimge tapsırılǵan adam aqshaǵa qaytarıp satıp alınbasın, ol sózsiz óltirilsin.

30 Jerdiń zúrááti bolsın, miywe aǵashtıń jemisi bolsın, jerden ónip shıǵatuǵın hár bir zúrááttiń onnan biri Jaratqan Iyege tiyisli. Bular Jaratqan Iyege tiyisli bolıp, muxaddes sanaladı. 31 Eger bir adam onnan biriniń bir bólegin qaytarıp alıwdı qálese, onda ol bahasınıń ústine besten bir bólegin qosıp tólewi tiyis. 32 Barlıq iri hám mayda mallardıń onnan birine kelsek, shopannıń tayaǵınıń astınan ótken hár bir onınshı mal Jaratqan Iyege tiyisli bolıp, muxaddes sanaladı. 33 Hesh kim mallardı jaqsı hám jaman dep ayırıp, bir-biri menen almastırmasın. Eger de mal almastırılsa, onda eki mal da muxaddes sanaladı hám onı qaytarıp satıp alıwǵa bolmaydı».

34 Jaratqan Iyeniń Sinay tawında Izrail xalqına Muwsa arqalı bergen buyrıqları usılar edi.