Lev 3 | KaaIBT22L | STEP | «Eger kim de kim tatıwlıq qurbanlıǵı ushın iri mal bermekshi bolsa, onda ol Jaratqan Iyege arnap minsiz erkek yamasa urǵashı mal usınsın.

‏ Leviticus 3

Tatıwlıq qurbanlıǵı

1 «Eger kim de kim tatıwlıq qurbanlıǵı ushın iri mal bermekshi bolsa, onda ol Jaratqan Iyege arnap minsiz erkek yamasa urǵashı mal usınsın. 2 Ol adam qolın qurbanlıqtıń basına qoyıp, onı Ushırasıw shatırınıń aldında shalsın. Xaronnıń ulları bolǵan ruwxaniyler qandı qurbanlıq orınnıń tórt qaptalına serpip jibersin. 3 Sol adam tatıwlıq qurbanlıǵınıń mına bóleklerin Jaratqan Iyege sıy etip beriwi tiyis: maldıń isheklerin qaplaǵan sharbı mayları menen ish mayların, 4 eki bótekesin, bóteke ústindegi mayın hám bawırınıń tómengi ushın. 5 Xaronnıń ulları bulardı qurbanlıq orında janıp turǵan otınnıń ústine qoyıp, jandırılatuǵın qurbanlıq penen birge tútetip jandırsın. Bul – Jaratqan Iyege xosh iyisli sıy boladı.

6 Eger kim de kim tatıwlıq qurbanlıǵı ushın mayda mal bermekshi bolsa, onda ol Jaratqan Iyege minsiz erkek yamasa urǵashı janlıq usınsın.

7 Eger qoy bermekshi bolsa, onı Jaratqan Iyeniń aldında usınıwı tiyis. 8 Ol qolın qurbanlıqtıń basına qoysın. Keyin onı Ushırasıw shatırınıń aldında shalsın. Xaronnıń ulları qoydıń qanın alıp, qurbanlıq orınnıń tórt qaptalına serpip jibersin. 9 Ol adam tatıwlıq qurbanlıǵınıń mına bóleklerin Jaratqan Iyege sıy etip beriwi tiyis: janlıqtıń mayların, yaǵnıy quyımshaqtıń túbinen kesip alınǵan pútkil quyrıq mayın, isheklerin qaplaǵan sharbı mayları menen ish mayların, 10 eki bótekesin, bóteke mayların hám bawırınıń tómengi ushın. 11 Ruwxaniy bulardı qurbanlıq orınnıń ústinde tútetip jandırsın. Bul – Jaratqan Iyege awqat sıpatında berilgen sıy.

12 Eger ol eshki bermekshi bolsa, onı Jaratqan Iyeniń aldında usınsın. 13 Adam qolın qurbanlıqtıń basına qoysın hám onı Ushırasıw shatırınıń aldında shalsın. Xaronnıń ulları eshkiniń qanın alıp, qurbanlıq orınnıń tórt qaptalına serpip jibersin. 14 Ol adam eshkiniń mına nárselerin alıp, Jaratqan Iyege sıy qılıp usınsın: isheklerin qaplaǵan sharbı mayları menen ish mayların, 15 eki bótekesin, bóteke mayların hám bawırınıń tómengi ushın. 16 Ruwxaniy bulardıń hámmesin qurbanlıq orınnıń ústinde tútetip jandırsın. Bul – Jaratqan Iyege awqat sıpatında berilgen xosh iyisli sıy. Maydıń hámmesi Oǵan tiyisli. 17 Maldıń mayın jemeńler, onıń góshin de qanı menen jemeńler. Bul ózlerińiz jasaǵan hámme jerde áwladlar boyı máńgi qaǵıyda bolsın».