‏ Leviticus 4

Gúna qurbanlıǵı

1Jaratqan Iye Muwsaǵa bılay dedi:

2– Izrail xalqına bılay dep ayt: «Eger kim de kim Men buyrıqlarımda qadaǵan qılǵan bir nárseni islep, bilmey gúna qılsa, tómende kórsetilgenlerge ámel qılsın:

3Eger bas ruwxaniy gúna islep, xalqın ayıpker qılsa, islegen gúnası ushın Jaratqan Iyege gúna qurbanlıǵı etip minsiz bir buǵa usınsın. 4Ol buǵanı Ushırasıw shatırınıń aldına, Jaratqan Iyeniń aldına alıp kelsin. Sońınan qolın buǵanıń basına qoysın hám Jaratqan Iyeniń aldında onı shalsın. 5Bas ruwxaniy buǵanıń qanınan biraz alıp, Ushırasıw shatırınıń ishine kirsin. 6Ol barmaǵın qanǵa batırıp, qandı Jaratqan Iyeniń aldında, Eń muxaddes bólmeni bólip turǵan perdege qaray jeti ret serpsin. 7Sońınan ol shatırdaǵı, Jaratqan Iyeniń aldındaǵı xosh iyisli tútetki tútetiletuǵın orınnıń shaqlarına qandı súrtsin. Buǵanıń awısqan qanın shatırdıń kirer awzınıń aldındaǵı jandırılatuǵın qurbanlıq orınnıń túbine tóksin. 8Keyin gúna ushın berilgen buǵanıń pútkil mayın: isheklerin qaplaǵan sharbı mayları menen ish mayların, 9eki bótekesin, olardıń mayların hám bawırınıń tómengi ushın 10tatıwlıq qurbanlıǵı sıpatında berilgen maldıń mayın ayırǵanday, ayırıp alsın. Bas ruwxaniy olardı jandırılatuǵın qurbanlıq beriletuǵın orınnıń ústinde tútetip jandırsın. 11Al buǵanıń qalǵan bóleklerin: terisin, góshin, gellesin, tuyaqların hám ishek-qarnı menen dárisin 12ordanıń sırtındaǵı kúl tógiletuǵın taza jerge aparıp, olardı otınnıń ústine qoyıp, jaǵıp jibersin.

13Eger pútkil Izrail jámiyeti Jaratqan Iyeniń buyrıqlarında qadaǵan etilgen nárseni islep, bilmey gúna qılsa, olar bári bir ayıplı sanaladı. 14Islegen gúnası belgili bolǵanda, olar jámiyet atınan gúna qurbanlıǵı etip bir buǵa usınıp, onı Ushırasıw shatırınıń aldına alıp kelsin. 15Jámiyet aqsaqalları Jaratqan Iyeniń aldında qolların buǵanıń basına qoyıp, onı Jaratqan Iyeniń aldında shalsın. 16Bas ruwxaniy buǵanıń qanınan biraz alıp, Ushırasıw shatırınıń ishine kirsin. 17Ruwxaniy barmaǵın qanǵa batırıp, qandı Jaratqan Iyeniń aldında, Eń muxaddes bólmeni bólip turǵan perdege qaray jeti ret serpsin. 18Sońınan ruwxaniy qandı shatırdaǵı, Jaratqan Iyeniń aldındaǵı tútetki tútetiletuǵın orınnıń shaqlarına súrtsin. Buǵanıń awısqan qanın shatırdıń kirer awzınıń aldındaǵı jandırılatuǵın qurbanlıq orınnıń túbine tóksin. 19Buǵanıń pútkil mayın alıp, onı qurbanlıq orınnıń ústinde tútetip jandırsın. 20Ruwxaniy óz gúnası ushın bergen buǵaǵa ne islegen bolsa, bul buǵaǵa da sonı islesin. Usılayınsha ruwxaniy jámiyetti gúnadan pákleydi hám olardıń gúnaları keshiriledi. 21Aldınǵı buǵanı qalay jandırǵan bolsa, bul buǵanı da ordanıń sırtına alıp shıǵıp, jaǵıp jibersin. Bul – jámiyettiń gúnası ushın qurbanlıq boladı.

22Eger basshılardıń biri Qudayı Jaratqan Iyeniń buyrıqlarında qadaǵan etilgen bir nárseni islep, bilmey gúna qılsa, ol ayıplı sanaladı. 23Islegen gúnası ózine áshkara etilgen waqıtta, ol qurbanlıqqa minsiz bir teke alıp kelsin. 24Keyin ol qolın tekeniń basına qoyıp, onı jandırılatuǵın qurbanlıqlar shalınatuǵın jerde, Jaratqan Iyeniń aldında shalsın. Bul – gúna qurbanlıǵı. 25Ruwxaniy barmaǵın gúna qurbanlıǵınıń qanına batırıp, qandı jandırılatuǵın qurbanlıq orınnıń shaqlarına súrtsin. Awısqan qandı qurbanlıq orınnıń túbine tóksin. 26Keyin tekeniń pútkil mayın tatıwlıq qurbanlıǵınıń mayı sıyaqlı, qurbanlıq orınnıń ústinde tútetip jandırsın. Usılayınsha, ruwxaniy sol kósemdi gúnasınan pákleydi hám onıń gúnası keshiriledi.

27Eger xalıq arasınan birew Jaratqan Iyeniń buyrıqlarında qadaǵan etilgen bir nárseni islep, bilmey gúna qılsa, ol ayıplı sanaladı. 28Islegen gúnası ózine áshkara bolǵanda, ol gúnası ushın qurbanlıqqa minsiz bir eshki ákelsin. 29Soń ol qolın gúna ushın berilgen qurbanlıqtıń basına qoyıp, onı jandırılatuǵın qurbanlıq shalınatuǵın jerde shalsın. 30Ruwxaniy qurbanlıqtıń qanına barmaǵın batırıp, jandırılatuǵın qurbanlıq orınnıń shaqlarına súrtsin. Awısqan qandı qurbanlıq orınnıń túbine tóksin. 31Qurbanlıq bergen adam eshkiniń pútkil mayın tatıwlıq qurbanlıǵınıń mayı sıyaqlı ayırıp alsın. Ruwxaniy maydı Jaratqan Iyege xosh iyisli sıy qılıp, qurbanlıq orında tútetip jandırsın. Usılayınsha, ruwxaniy sol adamdı gúnasınan pákleydi hám onıń gúnası keshiriledi.

32Eger birew gúna qurbanlıǵı ushın qoy bermekshi bolsa, qoy minsiz bolsın. 33Ol qolın qurbanlıqtıń basına qoysın hám onı jandırılatuǵın qurbanlıqlar shalınatuǵın jerde shalsın. 34Keyin ruwxaniy barmaǵın shalınǵan qoydıń qanına batırıp, jandırılatuǵın qurbanlıq orınnıń shaqlarına súrtsin. Al awısqan qandı qurbanlıq orınnıń túbine tóksin. 35Tatıwlıq qurbanlıǵı ushın berilgen qoy sıyaqlı, adam bul qurbanlıqtıń da pútkil mayın ayırıp alsın. Ruwxaniy onı qurbanlıq orında Jaratqan Iyege arnap jaǵılıp atırǵan sıylardıń ústine qoyıp, tútetip jandırıp jibersin. Usılayınsha, ruwxaniy adamdı gúnasınan pákleydi hám onıń gúnası keshiriledi».