Lev 5 | KaaIBT22L | STEP | «Eger kim de kim kórgen-bilgenleri haqqında gúwalıq beriwge shaqırılsa, biraq ol bunnan bas tartsa, onda ol óz ayıbınıń jazasın tartadı.

‏ Leviticus 5

1 «Eger kim de kim kórgen-bilgenleri haqqında gúwalıq beriwge shaqırılsa, biraq ol bunnan bas tartsa, onda ol óz ayıbınıń jazasın tartadı.

2 Kim de kim bilmey, haram sanalǵan bir nársege: jabayı ya úy haywanınıń yamasa jer bawırlawshı bir haywannıń óligine bir jerin tiygizip alsa, ol haramlanǵan bolıp, ayıplı sanaladı.

3 Birew bilmey, adamnıń denesinen shıqqan ózin haramlaytuǵın qanday da bir nársege bir jerin tiygizse, keyin ne islegenin túsingen waqıtta, ol ayıplı sanaladı.

4 Eger kim de kim qanday da bir isti isleymen dep, oylanbastan ant iship, onı orınlamay qalsa, onda ol ayıplı sanaladı.

5 Eger kim de kim usı aytılǵan islerdiń birewinde ayıplı bolsa, islegen gúnasın ashıq moyınlasın. 6 Ol gúnasınıń qunı sıpatında Jaratqan Iyege gúna qurbanlıǵın bersin. Bul qurbanlıq mayda maldan bir qoy yamasa bir eshki bolsın. Sonda ruwxaniy adamdı gúnasınan pákleydi.

7 Eger adamnıń qoy ákeliwge jaǵdayı bolmasa, onda ol gúnasınıń qunı sıpatında Jaratqan Iyege eki qumırı yamasa eki jas kepter ákelsin. Olardıń biri gúna qurbanlıǵı ushın, al ekinshisi jandırılatuǵın qurbanlıq ushın beriledi. 8 Olardı ruwxaniyge alıp kelsin. Ruwxaniy dáslep gúna qurbanlıǵın berip, qustıń moynın sındırsın, biraq onıń basın julıp taslamasın. 9 Keyin qustıń qanınıń birazın qurbanlıq orınnıń qaptalına serpip, awısqan qandı qurbanlıq orınnıń túbine tóksin. Bul – gúna qurbanlıǵı. 10 Sonnan soń, ruwxaniy ekinshi qustı jandırılatuǵın qurbanlıq etip, qaǵıyda boyınsha bersin. Usılayınsha ruwxaniy adamdı gúnasınan pákleydi hám ol keshiriledi.

11 Eger adamnıń eki qumırı yamasa eki kepter ákeliwge jaǵdayı kelmese, onda ol islegen gúnası ushın efanıń ^{▼▼ Efa – bir efa shama menen 22 l.} onnan bir mólsherindegi sapalı biyday unınan ákelsin. Ol unnıń ústine záytún mayın quymasın hám xosh iyisli shayır da qospasın. Sebebi bul – gúna qurbanlıǵı.

12 Adam undı ruwxaniyge alıp kelsin. Ruwxaniy tolıq sadaqanıń belgisi retinde unnan bir uwıs alıp, onı qurbanlıq orında, Jaratqan Iyege arnap jaǵılıp atırǵan sıylardıń ústine qoyıp, tútetip jandırıp jibersin. Bul – gúna qurbanlıǵı.

13 Solay etip, ruwxaniy aytıp ótilgen gúnalardıń birin islegen adamdı gúnasınan pákleydi hám onıń gúnası keshiriledi. Ǵálle sadaqası sıyaqlı, sadaqanıń jandırılmaǵan bólegi ruwxaniyge tiyisli boladı».

Ayıp qurbanlıǵı

14 Jaratqan Iye Muwsaǵa bılay dedi:

15 – Eger kim de kim Jaratqan Iyege arnalıp, muxaddeslengen nárselerdi bılǵap, bilmey gúna islese, ol ayıp qurbanlıǵı sıpatında Jaratqan Iyege mayda maldan bir minsiz qoshqar usınsın. Qoshqardıń qunı shekel awırlıǵındaǵı gúmis penen, Muxaddes orın ólshemi menen bahalansın. 16 Adam muxaddes nársege keltirgen zıyanınıń qunın tólep, jáne sol qunnıń ústine besten birin qosıp, ruwxaniyge bersin. Ruwxaniy ayıp qurbanlıǵı ushın berilgen qoshqar menen sol adamdı gúnasınan pákleydi hám ol keshiriledi.

17 Eger kim de kim Jaratqan Iyeniń buyrıqlarında qadaǵan etilgen nárseni islep, gúna qılsa, ol bilmey islese de, óz ayıbınıń jazasın tartadı. 18 Ol ruwxaniyge ayıp qurbanlıǵı sıpatında mayda maldan bir qoshqar usınsın. Qoshqar minsiz hám qunı belgilengen bolıwı tiyis. Ruwxaniy adamdı bilmey islegen gúnasınan pákleydi hám ol keshiriledi. 19 Bul – ayıp qurbanlıǵı, óytkeni adam Jaratqan Iyege qarsı ayıp islegen edi.