Lev 6 | KaaIBT22L | STEP | Jaratqan Iye Muwsaǵa bılay dedi:

‏ Leviticus 6

1 Jaratqan Iye Muwsaǵa bılay dedi:

2 – 3 – Eger kim de kim ózine amanat etilgen, ózine tapsırılǵan yamasa urlanǵan bir mal-múlik tuwrısında jaqının aldasa, ya onı nahaqlıq penen qolǵa kirgizse yamasa joytılǵan bir nárseni tawıp alıp, onı jasırsa, usınday yamasa usıǵan uqsaytuǵın gúnalardıń birin islep, onı islemedim dep jalǵan ant ishse, ol Jaratqan Iyeniń aldında ayıp is qılǵan boladı. 4 – 5 Adam usılardıń birin islep, gúna qılǵanda, ol hár qanday nahaq jol menen qolǵa kirgizgen zattı iyesine qaytarıp bersin. Ol ayıbı ashılǵan kúni zatlardıń ústine besten birin qosıp iyesine tolıǵı menen qaytarıp bersin. 6 Sońınan Jaratqan Iyege ayıp qurbanlıǵı etip usınıw ushın, qunı belgilengen hám minsiz bolǵan qoshqardı ruwxaniyge ákelsin. 7 Sonda ruwxaniy Jaratqan Iyeniń aldında onı gúnasınan pákleydi hám onıń islegen ayıbı qanday bolsa da, ol keshiriledi.

Kúndelikli jandırılatuǵın qurbanlıqtı beriw qaǵıydaları

8 Jaratqan Iye Muwsaǵa jáne bılay dedi:

9 – Xaron hám onıń ullarına mınaday dep buyır: «Kúndelikli jandırılatuǵın qurbanlıqtı beriw qaǵıydası mınaday: jandırılatuǵın qurbanlıq qurbanlıq orınnıń ústinde tún boyı, azanǵa deyin qalıwı kerek. Qurbanlıq orınnıń ústindegi ot sónbesin. 10 Azanda ruwxaniy zıǵırdan islengen kiyimi menen diz kiyimin kiyip alsın. Keyin ol qurbanlıq orınnıń ústindegi jandırılatuǵın qurbanlıqtan qalǵan kúldi jıynap, qurbanlıq orınnıń janına qoysın. 11 Sońınan ruwxaniy sol kiyimlerin sheship, ádettegi kiyimlerin kiysin hám kúldi ordanıń sırtındaǵı taza jerge aparıp taslasın. 12 Qurbanlıq orınnıń ústindegi ot hesh qashan óshpey, úzliksiz janıp tursın. Ruwxaniy hár kúni azanda otqa otın salıp, jandırılatuǵın qurbanlıqtıń bóleklerin onıń ústine qoysın. Keyin tatıwlıq qurbanlıqlarınıń mayın onıń ústinde tútetip jandırsın. 13 Qurbanlıq orınnıń ústindegi ot hesh qashan óshpey, úzliksiz janıp tursın».

Ǵálle sadaqasın beriw qaǵıydaları

14 «Ǵálle sadaqasın beriw qaǵıydası mınaday: Xaronnıń ulları ǵálle sadaqasın qurbanlıq orınnıń aldına ákelip, Jaratqan Iyege usınsın. 15 Ruwxaniy záytún mayı qosılǵan sapalı unnan bir uwısın toltırıp alsın hám xosh iyisli shayırdıń hámmesin alıp, olardı tolıq sadaqanıń belgisi retinde qurbanlıq orınnıń ústinde tútetip jandırsın. Bul – tolıq sadaqanıń belgisi hám Jaratqan Iyege xosh iyisli sıy boladı. 16 Sadaqanıń jandırılmaǵan bólegin Xaron hám onıń ulları jesin. Onnan ashıtqısız nan jawıp, muxaddes jerde, Ushırasıw shatırınıń háwlisinde jesin. 17 Oǵan ashıtqı qosılmasın. Men bunı Óz sıylarımnan ruwxaniylerdiń payı qılıp berdim. Bul – ayıp qurbanlıǵı hám gúna qurbanlıǵı sıyaqlı júdá muxaddes. 18 Xaron áwladınan bolǵan hár bir er adam onnan jewine boladı. Bul Jaratqan Iyege arnalǵan sıylardan áwladlar dawamında máńgige olardıń payı boladı. Qurbanlıqlarǵa tiyip ketken hár bir nárse muxaddes boladı».

19 Jaratqan Iye Muwsaǵa taǵı bılay dedi:

20 – Xaron hám onıń urpaǵınan biri bas ruwxaniylikke maylanıp, tayınlanǵan kúnnen baslap, onıń beretuǵın sadaqası mınaday bolsın: ol onnan bir efa sapalı unnıń yarımın azanda, al qalǵan yarımın keshte ǵálle sadaqası etip bersin. Ol bul sadaqanı hár kúni berip turıwı tiyis. 21 Sol unǵa záytún mayı qosıp iylenip, tabada pisirilsin. Bul ǵálle sadaqasın bóleklep sındırıp, Jaratqan Iyege xosh iyisli sıy qılıp usınsın. 22 Bunı Xaron áwladınan bolǵan bas ruwxaniy Jaratqan Iyege usınsın. Bul máńgige Jaratqan Iyeniń payı boladı. Usı sadaqa tolıǵı menen tútetip jandırılıwı tiyis. 23 Bas ruwxaniydiń bergen hár bir ǵálle sadaqası tolıǵı menen jandırıp jiberilsin, onı jewge bolmaydı.

Gúna qurbanlıǵın beriw qaǵıydaları

24 Jaratqan Iye Muwsaǵa bılay dedi:

25 – Xaron hám onıń ullarına bılay dep ayt: «Gúna qurbanlıǵın beriw qaǵıydası mınaday: gúna qurbanlıǵı jandırılatuǵın qurbanlıq shalınatuǵın jerde, Jaratqan Iyeniń aldında shalınsın. Ol – júdá muxaddes. 26 Gúna qurbanlıǵın usınıwdı orınlaytuǵın ruwxaniy onıń góshin muxaddes jerde, Ushırasıw shatırınıń háwlisinde jesin. 27 Qurbanlıqtıń góshine tiyip ketken hár bir nárse muxaddes boladı. Onıń qanı kimniń kiyimine shashırasa, kiyim muxaddes jerde juwılsın. 28 Qurbanlıqtıń góshi pisirilgen ılay ıdıs sındırıp taslanıwı kerek. Eger gósh qola ıdısta pisirilgen bolsa, ıdıs ısqılap tazalanıp, suw menen juwılsın.

29 Ruwxaniyler áwladınan bolǵan hár bir er adam gúna qurbanlıǵınıń góshinen jewine boladı. Bul qurbanlıq júdá muxaddes. 30 Biraq gúna qurbanlıǵınıń qanı Ushırasıw shatırınıń ishine, gúnadan páklew ushın Muxaddes bólmege alıp kirilse, bunday qurbanlıqtıń góshin jewge bolmaydı. Ol tolıǵı menen otqa jandırıp jiberiliwi tiyis».