Lev 8 | KaaIBT22L | STEP | Jaratqan Iye Muwsaǵa bılay dedi:

‏ Leviticus 8

Xaron hám onıń ullarınıń ruwxaniy bolıp tayınlanıwı

1 Jaratqan Iye Muwsaǵa bılay dedi:

2 – Xaron hám onıń ulların, olar menen birge ruwxaniylik kiyimlerin, maylaw ushın arnalǵan záytún mayın, gúna qurbanlıǵı ushın beriletuǵın buǵanı, eki qoshqardı hám bir sebet ashıtqısız nandı alıp kel. 3 Keyin pútkil jámiyetti Ushırasıw shatırınıń aldına jıyna.

4 Muwsa Jaratqan Iyeniń buyrıǵın orınladı. Hámme Ushırasıw shatırınıń aldına jıynalǵanda, 5 Muwsa jámiyetke:

– Men házir Jaratqan Iyeniń buyrıǵın ámelge asıraman, – dedi de, 6 Xaron hám onıń ulların aldıǵa shıǵarıp, olardı suw menen juwınıw rásiminen ótkizdi. 7 Sonnan keyin, Xaronǵa uzın kóylek kiygizip, beline belbew bayladı hám onıń sırtınan bahalı úst kiyim kiygizdi. Onıń ústine efodtı ^{▼▼ Efod – bas ruwxaniydiń kiyimleriniń bir bólegi. Sózlikke qarań.} taǵıp, belbewi menen buwdı. 8 Kóksine qaltalı óńirsheni taqtı. Óńirsheniń ishine Urim hám Tummimdi ^{▼▼ Urim hám Tummim – bul Qudaydıń erkin biliw ushın arnalǵan taslar bolıp, olardı shek taslaw jolı menen qollanǵan bolıwı múmkin.} saldı. 9 Xaronnıń basına sálle orap, sálleniń aldı betine muxaddes altın tajdı qoydı. Muwsa hár bir nárseni Jaratqan Iyeniń buyırǵanınday qılıp isledi.

10 Sońınan Muwsa maylaw rásimine arnalǵan záytún mayın alıp, Muxaddes shatırdı hám onıń ishindegi hár bir nárseni maylap, muxaddes qıldı. 11 Qurbanlıq orınnıń ústine maydan jeti ret serpti. Jáne de, orınnıń barlıq buyımlarına, úlken lágenge hám onıń tuyaqlarına may serpip, olardı muxaddes qıldı. 12 Xarondı muxaddes qılıp baǵıshlaw ushın, basına záytún mayın quyıp, onı maylaw rásiminen ótkizdi. 13 Sonnan soń, Xaronnıń ulların aldıǵa shıǵardı. Olarǵa uzın kóylekler kiydirip, bellerine belbew bayladı hám baslarına kishigirim sálle oradı. Muwsa bulardı da Jaratqan Iyeniń buyırǵanınday qılıp isledi.

14 Keyin Muwsa gúna qurbanlıǵı etip beriletuǵın buǵanı ákeldi. Xaron hám onıń ulları qolların buǵanıń basına qoydı. 15 Muwsa buǵanı shaldı. Qurbanlıq orındı tazalaw ushın, qandı barmaǵı menen orınnıń shaqlarına súrtip shıqtı. Awısqan qandı qurbanlıq orınnıń túbine tókti. Usılayınsha ol qurbanlıq orındı páklew rásimin ótkeriwge tayarlap, onı muxaddes qıldı. 16 Muwsa maldıń ish mayların, bawırınıń tómengi ushın, eki bótekesin hám bóteke mayların alıp, qurbanlıq orınnıń ústinde tútetip jandırdı. 17 Al buǵanıń qalǵan bóleklerin – terisin, góshin hám dárisin ordanıń sırtında jaǵıp jiberdi. Muwsa bulardı da Jaratqan Iyeniń buyırǵanınday qılıp isledi.

18 Keyin Muwsa jandırılatuǵın qurbanlıqqa bir qoshqardı ákeldi. Xaron hám onıń ulları qolların qoshqardıń basına qoydı. 19 Muwsa qoshqardı shalıp, onıń qanın qurbanlıq orınnıń tórt qaptalına serpip jiberdi. 20 Qoshqardı jiliklerge bólip, jiliklerin, gellesin hám ish mayların tútetip jandırdı. 21 Ishek-qarnın hám tuyaqların juwıp, qoshqardı tolıǵı menen qurbanlıq orınnıń ústinde tútetip jandırdı. Bul jandırılatuǵın qurbanlıq – Jaratqan Iyege xosh iyisli sıy boladı. Muwsa hámmesin Jaratqan Iyeniń buyırǵanınday qılıp isledi.

22 Bunnan soń, Muwsa Xaron hám onıń ullarınıń ruwxaniylikke tayınlaw rásimine arnalǵan qurbanlıq ushın beriletuǵın qoshqardı alıp keldi. Xaron hám onıń ulları qolların qoshqardıń basına qoydı. 23 Muwsa qoshqardı shalıp, onıń qanın aldı. Qandı Xaronnıń oń qulaǵınıń sırǵalıǵına, oń qolınıń hám oń ayaǵınıń bas barmaqlarına súrtti. 24 Sońınan Xaronnıń ulların aldıǵa shıǵardı. Olardıń da oń qulaǵınıń sırǵalıǵına, oń qol hám oń ayaǵınıń bas barmaqlarına qan súrtti. Awısqan qandı qurbanlıq orınnıń tórt qaptalına serpip jiberdi. 25 Muwsa maldıń mayın, yaǵnıy quyrıq mayın, ish mayların, bawırınıń tómengi ushın, eki bótekesin, bóteke mayların hám oń sanın aldı. 26 Keyin Jaratqan Iyeniń aldındaǵı ashıtqısız nan salınǵan sebetten bir shórek, záytún mayı qosılǵan shórek hám bir pátir alıp, maldıń mayı menen oń sanınıń ústine qoydı.

27 Muwsa bulardıń hámmesin Xaron hám onıń ullarınıń qollarına berdi. Olar bulardı Jaratqan Iyeniń aldında joqarı kóterip usındı. 28 Keyin Muwsa bulardı olardıń qollarınan alıp, qurbanlıq orınnıń ústinde jandırılatuǵın qurbanlıq penen birge tútetip jandırdı. Bular – tayınlanıw qurbanlıǵı, Jaratqan Iyege xosh iyisli sıy boladı. 29 Soń Muwsa tósti alıp, onı Jaratqan Iyeniń aldında joqarı kóterip usındı. Tayınlanıw qurbanlıǵı ushın berilgen qoshqardan Muwsanıń payına usı tós tiydi. Muwsa hámmesin Jaratqan Iyeniń buyırǵanınday qılıp isledi.

30 Muwsa maylaw rásimine arnalǵan záytún mayın hám qurbanlıq orındaǵı qandı alıp, Xaron menen onıń ullarınıń ústine hám olardıń kiyimlerine serpti. Usılayınsha, Muwsa Xarondı, onıń ulların hám olardıń kiyimlerin muxaddes qıldı.

31 Soń Muwsa Xaron hám onıń ullarına:

– Góshti Ushırasıw shatırınıń kirer awzınıń aldında qaynatıń. Onı tayınlanıw sadaqaları salınǵan sebettegi nan menen birge sol jerde jeń. Maǵan: «Bunı Xaron hám onıń ulları jesin», – dep buyırılǵan. 32 Gósh penen nannan awısıp qalǵanın jaǵıp jiberiń. 33 Ruwxaniylikke tayınlanıw rásimińiz tamam bolǵansha, jeti kún dawamında Ushırasıw shatırınıń aldınan hesh jaqqa shıǵıp ketpeń. Sebebi tayınlanıw rásimińiz jeti kún dawam etiwi tiyis. 34 Búgingi islengen rásimdi Jaratqan Iye sizlerdi gúnalarıńızdan pákleniwińiz ushın buyırǵan edi. 35 Jeti kún dawamında kúni-túni Ushırasıw shatırınıń aldında tayın bolıp, Jaratqan Iyeniń buyrıǵın orınlawıńız tiyis. Bolmasa, ólip qalasızlar. Maǵan usılay buyrıq berilgen, – dedi.

36 Solay etip, Xaron hám onıń ulları Jaratqan Iyeniń Muwsa arqalı bergen barlıq buyrıqların orınladı.