Lev 9 | KaaIBT22L | STEP | Segizinshi kúni Muwsa Xarondı, onıń ulların hám Izraildıń aqsaqalların shaqırdı.

‏ Leviticus 9

Ruwxaniylerdiń óz xızmetin baslawı

1 Segizinshi kúni Muwsa Xarondı, onıń ulların hám Izraildıń aqsaqalların shaqırdı. 2 Sonda Muwsa Xaronǵa bılay dedi:

– Gúna qurbanlıǵı ushın minsiz bir tana, jandırılatuǵın qurbanlıq ushın minsiz bir qoshqar alıp, olardı Jaratqan Iyege usın. 3 Sońınan Izrail xalqına ayt, olar da gúna qurbanlıǵı ushın bir teke, jandırılatuǵın qurbanlıq ushın bir jasar minsiz tana menen bir jasar minsiz toqlı ákelsin. 4 Jaratqan Iyeniń aldında tatıwlıq qurbanlıǵı ushın bir buǵa hám bir qoshqar alıp, buǵan qosa záytún mayı menen aralastırılǵan ǵálle sadaqasın usınsın. Óytkeni búgin olarǵa Jaratqan Iye kórinedi.

5 Olar Muwsanıń buyırǵanlarınıń hámmesin Ushırasıw shatırınıń aldına alıp keldi. Hámme jaqın kelip, Jaratqan Iyeniń aldında turdı. 6 Sonda Muwsa olarǵa:

– Jaratqan Iyeniń saltanatı sizlerge kóriniwi ushın, Ol sizlerge mınalardı islewdi buyırmaqta, – dep, 7 Xaronǵa bılay dedi:

– Qurbanlıq orınǵa jaqınlap, gúna qurbanlıǵın hám jandırılatuǵın qurbanlıǵıńdı ber. Usılay etip, ózińdi de, xalqıńdı da gúnalardan tazala. Sonnan keyin, Jaratqan Iye buyırǵanınday, xalqıńnıń qurbanlıǵın berip, olardı gúnalardan pákle.

8 Solay etip, Xaron qurbanlıq orınǵa jaqınlasıp, ózi ushın gúna qurbanlıǵına alıp kelgen tananı shaldı. 9 Ulları oǵan tananıń qanın alıp keldi. Xaron barmaǵın qanǵa batırıp, qurbanlıq orınnıń shaqlarına súrtti. Awısqan qandı qurbanlıq orınnıń túbine tókti. 10 Jaratqan Iyeniń Muwsaǵa bergen buyrıǵı boyınsha, ol gúna qurbanlıǵınıń mayın, eki bótekesin hám bawırınıń tómengi ushın qurbanlıq orında tútetip jandırdı. 11 Al tananıń góshi menen terisin ordanıń sırtında jaǵıp jiberdi.

12 Keyin Xaron jandırılatuǵın qurbanlıqtı shaldı. Onıń ulları qurbanlıqtıń qanın oǵan berdi hám ol qandı qurbanlıq orınnıń tórt qaptalına serpip jiberdi. 13 Sońınan ulları oǵan jandırılatuǵın qurbanlıqtıń barlıq jiliklerin hám basın ákelip berdi. Xaron hámmesin qurbanlıq orınnıń ústinde tútetip jandırdı. 14 Al qurbanlıqtıń ishek-qarnın hám tuyaqların juwıp, qurbanlıq orında jandırılatuǵın qurbanlıqqa qosıp tútetip jandırdı.

15 Bunnan soń, Xaron xalıqtıń qurbanlıǵın alıp keldi. Xalıqtıń gúnaları ushın berilgen tekeni shaldı hám birinshi qurbanlıq sıyaqlı bunı da gúna qurbanlıǵı sıpatında usındı.

16 Xaron jandırılatuǵın qurbanlıqtı da qaǵıydaǵa say tárizde berdi. 17 Sońınan ol ǵálle sadaqasın berdi. Onnan bir uwıs alıp, onı azanda beriletuǵın jandırılatuǵın qurbanlıqqa qosa qurbanlıq orınnıń ústinde tútetip jandırdı.

18 Xaron xalıqtıń tatıwlıq qurbanlıǵı ushın alıp kelgen buǵası menen qoshqarın da shaldı. Ulları qurbanlıqlardıń qanın oǵan ákelip berdi. Ol qandı qurbanlıq orınnıń tórt qaptalına serpip jiberdi. 19 Xaronnıń ulları buǵa menen qoshqardıń mayın, yaǵnıy quyrıq mayın, ishek-qarınlarındaǵı mayların, eki bótekesin hám bawırınıń tómengi ushın 20 tóslerdiń ústine qoydı. Xaron usı maylı bóleklerdi alıp, qurbanlıq orında tútetip jandırdı. 21 Sonnan keyin, Muwsanıń buyırǵanınday, ol tóslerdi hám oń sandı Jaratqan Iyeniń aldında joqarı kóterip usındı.

22 Xaron gúna, jandırılatuǵın hám tatıwlıq qurbanlıqların berip bolǵannan soń, qolların jayıp, xalıqqa pátiya berdi. Sonnan soń, ol tómenge tústi.

23 Muwsa menen Xaron Ushırasıw shatırına kirdi hám olar sırtqa shıqqannan soń, xalıqqa pátiyasın berdi. Sonda Jaratqan Iyeniń saltanatı pútkil xalıqqa kórindi 24 hám Jaratqan Iyeniń otı payda bolıp, qurbanlıq orınnıń ústindegi jandırılatuǵın qurbanlıqtı hám maylardı jandırıp jiberdi. Bunı kórgen pútkil xalıq shadlanıp baqırısıp, et betinen jerge jıǵıldı.