Luk 5:33-39 | KaaIBT22L | STEP | Olar Iysaǵa: – Yaqıyanıń shákirtleri jiyi-jiyi oraza tutıp, duwa etedi. Pariseylerdiń shákirtleri de solay isleydi. Al Seniń shákirtleriń iship-jep júripti,

‏ Luke 5:33-39

Oraza haqqında soraw

(Mat 9:14-17; Mrk 2:18-22)

33 Olar Iysaǵa:

– Yaqıyanıń shákirtleri jiyi-jiyi oraza tutıp, duwa etedi. Pariseylerdiń shákirtleri de solay isleydi. Al Seniń shákirtleriń iship-jep júripti, – dedi.

34 Iysa olarǵa:

– Kúyew ózleri menen birge bolǵanda, toyǵa kelgenlerdi oraza tutıwǵa májbúr ete alasızlar ma? 35 Biraq, olardan kúyew tartıp alıp ketiletuǵın kúnler keledi, olar sonda, sol kúnleri oraza tutadı, – dedi.

36 Iysa olarǵa jáne bir tımsal aytıp, bılay dedi:

– Hesh kim jańa kiyimnen jırtıp alıp, eski kiyimge jamaw salmaydı. Olay etse, jańa kiyim de jırtılıp qaladı, jańa jamaw da eski kiyimge úylespeydi. 37 Hesh kim jańa sharaptı da eski meske quymaydı. Olay etse, jańa sharap mesti jarıp aǵıp ketedi, mes te búlinedi. 38 Jańa sharaptı jańa meske quyıw kerek ^{▼▼ Bazı qoljazbalarda mına sózler de bar: «Sonda ekewi de saqlanadı».}. 39 Hesh kim eski sharaptı iship kórip, jańasın qálemeydi: óytkeni «eskisi jaqsıraq», – deydi.