Mal 1 | KaaIBT22L | STEP | Payǵambarshılıq sózi. Jaratqan Iye Malaxiya arqalı Izrail xalqına mına sózlerdi xabarladı:

‏ Malachi 1

1 Payǵambarshılıq sózi. Jaratqan Iye Malaxiya arqalı Izrail xalqına mına sózlerdi xabarladı:

Jaratqan Iyeniń Izrailǵa bolǵan súyispenshiligi

2 Jaratqan Iye: «Men sizlerdi súyip kelemen», – deydi.

Al sizler bolsańız: «Bizlerge bolǵan súyispenshiligińdi qalayınsha kórsetken ediń?» – dep soraysız.

Jaratqan Iye: «Esaw Yaqıptıń aǵası emes pe edi? Sonday bolsa da, Men Yaqıptı súydim, 3 al Esawdı jek kórdim. Esawdıń tawlı úlkelerin wayran qılıp, elin shóldiń saǵallarına tapsırdım», – dep juwap beredi.

4 Eger Esawdıń urpaǵı edomlılar: «Bizler búlginshilikke ushıradıq, biraq wayran bolǵan jerlerimizdi qayta tiklep alamız», – dep aytsa, Álemniń Jaratqan Iyesi bılay dep juwap beredi:

«Olar qayta qursa da, Men jáne wayran qılaman. Sonda olardıń úlkesi Jawızlıq úlkesi dep atalıp, al ózleri Jaratqan Iyeniń qáhárine máńgi ushıraǵan xalıq boladı. 5 Bunı óz kózlerińiz benen kórip, sizler: „Jaratqan Iye Izrail shegaralarınıń sırtında da dańqqa iye!“– dep aytatuǵın bolasız».

Jaratqan Iyeniń ruwxaniylerdi húkim qılıwı

6 «Ruwxaniyler! Ul ákesine, qul xojayınına húrmet kórsetedi. Eger Men sizlerdiń ákeńiz bolsam, sizlerdiń Maǵan kórsetken húrmetińiz qayaqta? Eger xojayınıńız bolsam, Mennen qorqqanıńız qayaqta?» – deydi Álemniń Jaratqan Iyesi. «Háy, ruwxaniyler, sizler Meniń atımdı húrmetlemey qoydıńız.

Degen menen, sizler: „Seniń atıńa qalayınsha húrmet kórsetpedik?“– dep soraysız.

7 Sizler qurbanlıq ornıma haram sadaqalar alıp kelesizler. Solay isleseńiz de, „Bizler Seniń qurbanlıq ornıńdı qalay haramladıq?“– dep soraysızlar. Biraq „Jaratqan Iyeniń dasturxanın qádirlemesek te boladı“, – dep aytasız. 8 Soqır maldı qurbanlıq qılıw nadurıs emes pe? Mayıp yamasa awırıw haywandı qurbanlıq qılıw nadurıs emes pe? Usınday bir haywandı óz hákimińizge aparıp kóriń! Onıń sennen kewli tolar ma eken yamasa ol seni jaqsı qabıllay ma eken?» – deydi Álemniń Jaratqan Iyesi.

9 «Endi sizlerge Óz miyrim-shápáátimdi kórsetiwim ushın, Maǵan, Qudayǵa jalbarınıń. Biraq sizler Maǵan sonday qurbanlıqlardı usınsańız, onda Men sizlerge miyrimimdi túsirip, qabıl eter me edim?» – deydi Álemniń Jaratqan Iyesi.

10 «Qáne endi, arańızdaǵı birińiz biykarǵa qurbanlıq orında ot jaǵılmasın, dep Ibadatxananıń esigin jawıp taslasa, jaqsı bolar edi! Meniń kewlim sizlerden toq emes», – deydi Álemniń Jaratqan Iyesi. «Sizlerdiń sadaqalarıńızdı qabıl etpeymen. 11 Óytkeni shıǵıstan batısqa deyingi xalıqlardıń arasında Meniń atım ullı boladı! Hámme jerde Meniń atıma arnap, tútetki tútetiledi, taza qurbanlıqlar beriledi. Sebebi xalıqlar arasında Meniń atım ullı boladı!» – deydi Álemniń Jaratqan Iyesi.

12 «Al sizler bolsańız: „Jaratqan Iyeniń dasturxanı qádirsiz, ondaǵı sadaqalar arzımas“, – dep Meniń atıma til tiygizesiz. 13 Sonıń menen birge, „Qanday awır júk!“– dep Maǵan murınlarıńızdı girjiytesiz», – deydi Álemniń Jaratqan Iyesi.

«Qurbanlıq ushın urlanǵan, mayıp hám awırıw haywanlardı alıp kelgenińizde, Men solardı sizlerdiń qolıńızdan qabıl etiwim kerek pe?» – deydi Jaratqan Iye. 14 «Óz súriwińizden Maǵan, Jaratqan Iyege baǵıshlap usınıwǵa wáde berip qoyǵan erkek haywannıń ornına kemshiligi bar haywandı qurbanlıq qılǵan ótirikshige nálet bolsın! Sebebi Men ullı Patshaman. Xalıqlar Meniń atımnan qorqadı», – deydi Álemniń Jaratqan Iyesi.