Mar 7:24-30 | KaaIBT22L | STEP | Iysa sol jerden shıǵıp, Tir úlkesine keldi. Ol bir úyge kirdi hám bunı hesh kimniń bilgenin qálemedi, biraq jasırına almadı.

‏ Mark 7:24-30

Sirofenikiyalı hayaldıń isenimi

(Mat 15:21-28)

24 Iysa sol jerden shıǵıp, Tir ^{▼▼ Tir – Bazı qoljazbalarda «Tir hám Sidon».} úlkesine keldi. Ol bir úyge kirdi hám bunı hesh kimniń bilgenin qálemedi, biraq jasırına almadı. 25 Kishkene qızı jawız ruwxqa shalınǵan bir hayal Iysa haqqında esitip, dárhal Oǵan keldi de, ayaǵına jıǵıldı. 26 Bul – Sirofenikiya elinde tuwılǵan grek hayalı edi. Ol Iysadan qızındaǵı jindi quwıp shıǵarıwdı ótindi. 27 Al Iysa oǵan:

– Birinshi balalardı toydırıw kerek, balalardıń nanın alıp, iytlerge taslaw durıs emes, – dedi.

28 Hayal juwap berip:

– Durıs, Iyem. Biraq iytler de dasturxannan túsken balalardıń nanınıń usaqların jeydi-ǵo, – dedi.

29 Iysa oǵan:

– Usı juwabıń ushın úyińe qayta ber, qızıńnan jin shıǵıp ketti, – dedi.

30 Hayal úyine kelgende, qızınıń tósekte jatırǵanın hám onnan jinniń shıǵıp ketkenin kórdi.