‏ Matthew 14

Shomıldırıwshı Yaqıyanıń óltiriliwi

(Mrk 6:14-29; Luk 9:7-9)

1Sol waqıtta Iysa haqqında xabardı Galila úlkesiniń húkimdarı Hirod ta esitip, 2óz xızmetkerlerine:

– Bul adam – shomıldırıwshı Yaqıya. Ol ólimnen qayta tirilipti, sonlıqtan da usınday káramatlar islemekte, – dedi.

3Bunnan burın Hirod óz inisi Filiptiń hayalı Hirodiya sebepli Yaqıyanı uslap alıp baylatıp, qamatıp taslaǵan edi. 4Óytkeni Yaqıya oǵan: «Onı hayal qılıp alıwıń nızamǵa tuwrı kelmeydi», – degen edi. 5Hirod Yaqıyanı óltirmekshi de bolıp edi, biraq xalıqtan qorqtı. Sebebi xalıq Yaqıyanı payǵambar dep sanaytuǵın edi.

6Al Hirodtıń tuwılǵan kúninde, Hirodiyanıń qızı jıynalǵan qonaqlardıń aldında oyınǵa túsip, Hirodtıń kewlinen shıqtı. 7Sonıń ushın ol qızǵa soraǵan nársesin beriwge wáde berip, ant ishti.

8Qız anasınıń keńesi boyınsha:

– Shomıldırıwshı Yaqıyanıń basın aldırıp, tabaqqa salıp, maǵan usı jerge ákelip beriń, – dedi.

9Patsha buǵan qıynalsa da, qonaqlarınıń aldında ant ishkenlikten qızǵa soraǵanın beriwdi buyırdı. 10Solay etip, patsha adam jiberip, qamaqta Yaqıyanıń basın kesip aldırttı. 11Tabaqqa salıp ákelingen bas qızǵa berildi. Qız onı anasına aparıp berdi. 12Yaqıyanıń shákirtleri kelip, onıń denesin alıp ketip jerledi. Sonnan soń barıp, Iysaǵa xabarladı.

Iysanıń bes mıń adamdı toyǵızıwı

(Mrk 6:30-44; Luk 9:10-17; Yuxn 6:1-14)

13Iysa bunı esitkennen keyin qayıqqa minip, elsiz bir jerge jalǵız ketip qaldı. Bul tuwralı esitken xalıq óz qalalarınan shıǵıp, piyadalap Onıń izine erdi. 14Iysa qayıqtan túskende sonshama xalıqtı kórdi, olarǵa janı ashıp, awırıwlarına shıpa berdi.

15Kesh bolǵanda shákirtleri qasına kelip, Oǵan:

– Bul – bir elsiz jer, kún de kesh boldı. Xalıqtı tarqatıp jiber, olar awıllarǵa barıp, ózlerine awqat satıp alsın, – dedi.

16Biraq Iysa:

– Olardıń ketiwiniń hájeti joq, olarǵa sizler awqat berińler, – dedi.

17– Bizlerde tek bes nan menen eki balıq ǵana bar, – dedi olar.

18Iysa:

– Olardı bul jerge, Maǵan alıp kelińler, – dedi.

19Sońınan xalıqqa shópli jerge otırıwdı buyırdı da, bes nan menen eki balıqtı alıp, aspanǵa qarap Qudayǵa shúkirlik etti. Nanlardı sındırıp, shákirtlerine berdi, olar xalıqqa úlestirdi. 20Hámmesi jep toydı, awısqan bóleklerin jıynap, úlken on eki sebet toltırdı. 21Al jegenler hayal hám balalardan basqa bes mıńday adam edi.

Iysanıń suwdıń ústi menen júriwi

(Mrk 6:45-56; Yuxn 6:15-21)

22Bunnan soń dárhal Iysa shákirtlerine qayıqqa miniwdi hám Ózinen burın arǵı jaǵaǵa ketiwdi buyırdı. Al Ózi xalıqtı tarqatıp jiberdi. 23Xalıqtı tarqatıp jibergennen soń, Iysa duwa etiw ushın jalǵız Ózi tawǵa shıqtı, keshte de sol jerde jalǵız qaldı. 24Al sol waqıtta kóldiń jaǵasınan uzaqlasqan qayıqtı tolqınlar soqqılay basladı, óytkeni kúshli samal qayıqqa qarsı esip tur edi.

25Erte tańda Iysa kóldiń ústi menen júrip, olarǵa jaqınlay basladı. 26Shákirtleri kóldiń ústi menen kiyatırǵan Onı kórgende zárreleri ushıp:

– Bul árwaq, – dep qattı qorqıp baqırıstı.

27Biraq Iysa olarǵa dárriw:

– Jigerlenińler! Bul Men, qorqpańlar, – dedi.

28Petr Oǵan juwap berip:

– Iyem! Eger bul Sen bolsań, maǵan suwdıń ústi menen Seniń qasıńa júrip barıwdı buyır, – dedi.

29Iysa:

– Kel, – dedi.

Petr qayıqtan túsip, Iysaǵa qaray suwdıń ústi menen júrip ketti. 30Biraq ol samaldıń kúshli ekenin kórgende qorqıp ketip, suwǵa bata baslaǵanda:

– Iyem! Meni qutqar! – dep baqırdı.

31Iysa dárriw qolın sozıp, onı tartıp aldı da, oǵan:

– Háy, isenimi az! Sen nege gúmanlandıń? – dedi.

32Olar qayıqqa mingende, samal tınıp qaldı. 33Qayıqtaǵı shákirtleri Iysanıń ayaǵına jıǵılıp:

– Sen shınında da, Qudaydıń Ulısań! – desti.

Gennesarettegi awırıwlardıń shıpa alıwı

34Olar kóldiń arǵı jaǵasına ótip, Gennesaret jerine kelip toqtadı. 35Sol jerdiń turǵınları Iysanı tanıp, pútkil dógerekke xabarladı hám awırǵan adamlardıń hámmesin Oǵan alıp keldi. 36Olar Iysadan tek kiyiminiń shetine ǵana qol tiygiziwge ruxsat soradı. Qol tiygizgenlerdiń hámmesi shıpa taptı.