Mat 15 | KaaIBT22L | STEP | Sonda Iysanıń qasına Erusalimnen pariseyler menen diniy muǵallimler kelip, Oǵan:

‏ Matthew 15

Adamlardı ne haramlaydı?

(Mrk 7:1-13)

1 Sonda Iysanıń qasına Erusalimnen pariseyler menen diniy muǵallimler kelip, Oǵan:

2 – Ne ushın Seniń shákirtleriń ata-babalardan qalǵan dástúrlerdi buzıp júr? Olar nan jewden aldın qolların juwmaydı, – dedi.

3 Iysa olarǵa juwap berip, bılay dedi:

– Sizler ne ushın dástúrlerińiz sebepli Qudaydıń buyrıǵın buzasızlar? 4 Sebebi Quday: «Ata-anańdı húrmetle» ^{▼▼ Shıǵ 20:12; Nzm 5:16.} hám «Kim de kim ákesine yamasa anasına jaman sóz aytsa, ol sózsiz óltirilsin» ^{▼▼ Shıǵ 21:17; Leb 20:9.} dep buyrıq bergen. 5 Al sizler: «Kim de kim ákesine yamasa anasına: „Saǵan beretuǵınımdı Quday jolına qurban etip baǵıshlayman“, dese, 6 ol ákesin yamasa anasın sıylamasa da boladı», – deysizler. Solay etip, dástúrlerińiz sebepli, sizler Qudaydıń sózin biykar etip atırsızlar. 7 Háy, eki júzliler! Iyshaya payǵambar sizler tuwralı aldın ala durıs aytqan: 8 «Bul xalıq sıylar Meni tili menen ^{▼▼Bul xalıq sıylar Meni tili menen – Bazı qoljazbalarda «Bul xalıq awzı menen maǵan jaqınlap, tili menen meni sıylar».},
Biraq júregi Mennen alıs.
9 Olar Maǵan bosqa sıyınıp,
Adam oylap tapqan parızlardı úyreter» ^{▼▼ Iysh 29:13.}.

10 Sońınan Iysa xalıqtı shaqırıp alıp, olarǵa:

– Tıńlap, túsinip alıńlar: 11 adamdı onıń awzına engen nárse emes, al awzınan shıqqan nárse haramlaydı, – dedi.

12 Sonda Onıń shákirtleri qasına kelip, Onnan:

– Bul sózdi esitkende, pariseylerdiń ashıwlanıp qalǵanın bildiń be? – dep soradı.

13 Iysa olarǵa:

– Aspandaǵı Ákem ekpegen hár bir ósimlik túp-tamırı menen julıp taslanadı. 14 Olardı qoyıńlar. Olar – soqırlardıń soqır jetelewshileri. Eger soqırdı soqır jetelese, ekewi de shuqırǵa qulap túsedi, – dedi.

15 Petr Oǵan:

– Bul tımsaldı bizlerge túsindirip ber, – dedi.

16 Iysa olarǵa:

– Sizler ele túsinbey tursızlar ma? 17 Awızǵa engenniń hámmesi qarınǵa baratuǵının, onnan soń sırtqa shıǵıp ketetuǵının túsinbeysizler me? 18 Awızdan shıqqan kewilden shıǵadı. Adamdı haramlaytuǵın usı. 19 Óytkeni jamanlıq oylaw, adam óltiriw, neke hadallıǵın buzıw, buzıqshılıq qılıw, urlıq islew, jalǵan gúwalıq beriw hám masqaralaw kewilden shıǵadı. 20 Adamdı haramlaytuǵın usılar. Al qol juwmay awqat jew adamdı haramlamaydı, – dedi.

Qananlı hayaldıń isenimi

(Mrk 7:24-30)

21 Iysa sol jerden shıǵıp, Tir hám Sidon úlkesine ketti. 22 Sol úlkelerden qananlı bir hayal kelip, Oǵan:

– Iyem, Dawıttıń Urpaǵı, maǵan rehim ete gór! Meniń qızımdı jin urıp, qattı qıynalıp atır, – dep baqırdı.

23 Biraq Iysa oǵan hesh nárse aytpadı. Sonda shákirtleri qasına kelip, Onnan:

– Onı jiber, izimizden baqırıp kiyatır, – dep ótindi.

24 Iysa:

– Men tek Izraildıń joǵalǵan qoylarına jiberilgenmen, – dep juwap qaytardı.

25 Sonda hayal kelip, Onıń ayaǵına jıǵıldı da:

– Iyem! Maǵan járdem ete gór! – dep jalındı.

26 Iysa oǵan juwap berip:

– Balalardıń nanın alıp, iytlerge taslaw durıs emes, – dedi.

27 Hayal:

– Awa, Iyem, solay. Biraq iytler de xojayınlarınıń dasturxanınan túsken usaqlardı jeydi-ǵo, – dedi.

28 Sonda Iysa oǵan:

– Háy, hayal, seniń isenimiń kúshli eken, tilegeniń bolsın, – dedi.

Onıń qızı sol waqıtta-aq jazılıp ketti.

Iysanıń tórt mıń adamdı toyǵızıwı

(Mrk 8:1-10)

29 Iysa sol jerden ketip, Galila kóline keldi hám tawǵa shıǵıp otırdı. 30 Sonda Onıń qasına kóp xalıq jıynalıp qaldı. Olar ózleri menen birge aqsaqlardı, soqırlardı, mayıplardı, gúńeleklerdi hám basqa da awırıw adamlardı Iysanıń aldına alıp keldi. Iysa olarǵa shıpa berdi. 31 Solay etip, gúńeleklerdiń tilleri shıǵıp, mayıplardıń jazılıp, aqsaq bolǵanlardıń júrip, soqırlardıń kózleri ashılıp ketkenligin kórgen xalıq ań-tań bolısıp, Izraildıń Qudayına alǵıs ayttı.

32 Iysa shákirtlerin janına shaqırıp alıp, olarǵa:

– Xalıqqa janım ashıp tur. Olar úsh kúnnen beri qasımda bolıp, jeytuǵın hesh nársesi joq. Olardı ash halında jibergim kelmeydi, sebebi jolda hálsirep qalıwı múmkin, – dedi.

33 Shákirtleri:

– Usınshama xalıqtı toyǵıza alarlıqtay, bir elsiz dalada nandı qayaqtan tabamız? – dedi.

34 Iysa olardan:

– Neshe nanıńız bar? – dep soradı.

Olar:

– Jetew, jáne bir neshe kishi balıq ta bar, – dep juwap berdi.

35 Sońınan Iysa xalıqqa jerge otırıwdı buyırdı. 36 Jeti nandı hám balıqlardı alıp, Qudayǵa shúkirlik etti. Olardı sındırıp, shákirtlerine berdi, olar xalıqqa úlestirdi. 37 Olardıń hámmesi jep toydı. Awısqan bóleklerin jıynap, jeti sebet toltırdı. 38 Jegenler hayal hám balalardan basqa tórt mıń adam edi.

39 Sonnan soń, Iysa xalıqtı tarqatıp jiberdi de, qayıqqa minip, Magdala dógeregine ketti.