Mat 16 | KaaIBT22L | STEP | Pariseyler menen saddukeyler Iysaǵa keldi de, Onı sınamaqshı bolıp, aspannan káramatlı belgi kórsetiwin soradı.

‏ Matthew 16

Káramatlı belgi kórsetiwdi soraw

(Mrk 8:11-13; Luk 12:54-56)

1 Pariseyler menen saddukeyler Iysaǵa keldi de, Onı sınamaqshı bolıp, aspannan káramatlı belgi kórsetiwin soradı. 2 Iysa olarǵa juwap qaytarıp:

– Keshte sizler: «Erteń kún ashıq boladı, aspan qızǵısh-ǵo», – deysizler. 3 Al tań azannan: «Búgin jawın-shashın boladı, aspan qızıl hám túnergen», – deysizler. Sizler nege aspannıń rayın ayıra alsańlar da, zamannıń belgilerin ayıra almaysızlar? 4 Jaman hám opasız áwlad káramatlı belgi talap etpekte. Biraq oǵan Yunustıń belgisinen basqası kórsetilmeydi, – dedi.

Soń olardı qaldırıp, sol jerden ketip qaldı.

Jalǵan tálimatlardan saq bolıńlar!

(Mrk 8:14-21)

5 Iysanıń shákirtleri arǵı jaǵaǵa ótkende, nan ákeliwdi umıtıp ketken edi. 6 Iysa olarǵa:

– Abaylańlar, pariseylerdiń hám saddukeylerdiń ashıtqısınan saq bolıńlar! – dedi.

7 Sonda olar:

– Nan ákelmegenimiz ushın solay dep atırǵan shıǵar, – dep óz ara aytısa basladı.

8 Iysa bunı bilip, olarǵa:

– Háy, isenimi azlar, sizler nege óz ara nanıńızdıń joqlıǵın aytısıp tursızlar? 9 Ele de túsinbedińler me? Bes nan bes mıń adamǵa jetip, awısqanın jıynaǵanıńızda neshe sebet toltırǵanıńız esińizde joq pa? 10 Jáne de jeti nan tórt mıń adamǵa jetip, awısqanın jıynaǵanıńızda neshe sebet toltırǵanıńız esińizde joq pa? 11 Meniń sizlerge nan haqqında aytpaǵanımdı nege túsinbeysizler? Pariseylerdiń hám saddukeylerdiń ashıtqılarınan saq bolıńlar, – dedi.

12 Olar sonda ǵana Onıń nannıń ashıtqısınan emes, al pariseylerdiń hám saddukeylerdiń tálimatlarınan saq bolıwdı aytqanlıǵın túsindi.

Petrdiń Iysanıń Masiyx ekenin moyınlawı

(Mrk 8:27-30; Luk 9:18-21)

13 Iysa Filip Kesariyasındaǵı úlkege kelgende, Óz shákirtlerinen:

– Adamlar Meni, Adam Ulın kim dep sanaydı? – dep soradı.

14 Olar:

– Geybirewleri shomıldırıwshı Yaqıya, geybirewleri Iliyas, al bazıları Eremiya yamasa payǵambarlardıń biri dep sanaydı, – dedi.

15 Iysa olarǵa:

– Al sizler Meni kim dep sanaysızlar? – dedi.

16 Shimon Petr juwap qaytarıp:

– Sen – Masiyxsań, tiri Qudaydıń Ulısań, – dedi.

17 Iysa oǵan:

– Yunustıń ulı Shimon, sen baxıtlısań! Saǵan bunı adam balası emes, al aspandaǵı Ákem ashıp bildirdi. 18 Saǵan Meniń aytatuǵınım mınaw: sen – Petrseń ^{▼▼ Petr – grek tilinde «Petros», tas degendi bildiredi.}, Men mına tastıń ústine Óz jámáátimdi ornataman, onı ólim kúshleri de jeńe almaydı. 19 Saǵan Aspan Patshalıǵınıń giltlerin beremen. Sen jer betinde neni baylasań, sol aspanda da baylanadı, jáne de, sen jer betinde neni sheshseń, sol aspanda da sheshiledi, – dep juwap berdi.

20 Sonnan soń, Iysa shákirtlerine Óziniń Masiyx ekenligin hesh kimge aytpawdı buyırdı.

Iysanıń Óz ólimi hám qayta tiriliwi haqqında bildiriwi

(Mrk 8:31–9:1; Luk 9:22-27)

21 Sol waqıttan baslap Iysa Óziniń Erusalimge barıp, aqsaqallar, bas ruwxaniyler hám diniy muǵallimler tárepinen kóp azap shegiwi hám óltiriliwi, biraq úshinshi kúni qayta tiriliwi tiyis ekenligin shákirtlerine bildire basladı.

22 Petr Iysanı shetke shaqırıp alıp, Oǵan:

– Quday saqlasın, Iyem! Saǵan bunday bola kórmesin! – dep qarsı sóyley basladı.

23 Iysa burılıp, Petrge:

– Joq bol kózimnen, shaytan! Sen Maǵan kesent berip atırsań. Sen Qudaydıń emes, al adamnıń islerin oylap tursań, – dedi.

Ózinen keship, Iysaǵa eriw

24 Sonda Iysa Óz shákirtlerine:

– Kim de kim Maǵan ergisi kelse, ózinen keshsin hám óz atanaq aǵashın arqalap, Meniń izime ersin. 25 Óytkeni kim de kim óz janın saqlamaqshı bolsa, onı joǵaltadı. Al kim de kim óz janın Men ushın joǵaltsa, onı saqlap qaladı. 26 Adam pútkil dúnyanı iyelep alıp, biraq óz janın joǵaltsa, bunnan oǵan ne payda? Ol óz janı ushın qanday tólem bere aladı? 27 Adam Ulı Ákesiniń saltanatında Óz perishteleri menen birge keledi. Sonda Ol hár kimge islegen islerine qaray qaytaradı. 28 Sizlerge shının aytaman: usı jerde turǵanlardıń geybirewleri Adam Ulınıń Óz Patshalıǵında keliwin kórmegenshe, ólmeydi, – dedi.