Mat 17 | KaaIBT22L | STEP | Aradan altı kún ótkennen soń, Iysa tek Petrdi, Yaqıptı hám onıń inisi Yuxandı qasına alıp, bir biyik tawǵa shıqtı.

‏ Matthew 17

Iysanıń túr-túsiniń ózgeriwi

(Mrk 9:2-13; Luk 9:28-36)

1 Aradan altı kún ótkennen soń, Iysa tek Petrdi, Yaqıptı hám onıń inisi Yuxandı qasına alıp, bir biyik tawǵa shıqtı. 2 Sonda olardıń aldında Iysanıń túr-túsi ózgerdi: Onıń júzi quyashtay jarqıradı, kiyimleri jarıq sıyaqlı appaq boldı. 3 Sol waqıtta birden olarǵa Iysa menen sóylesip turǵan Muwsa hám Iliyas payǵambarlar kórindi. 4 Sonda Petr Iysaǵa:

– Iyem, bizlerdiń bul jerde bolǵanımız qanday jaqsı! Eger qáleseń, men bul jerge úsh qos quraman: birewin Saǵan, birewin Muwsaǵa, birewin Iliyasqa, – dedi.

5 Ol ele sóylep turǵanda, bir jarıq bult olardı qapladı. Bulttan:

– Bul – Meniń súyikli Ulım, Men Oǵan ırzaman. Onıń aytqanın tıńlańlar! – degen saza esitildi.

6 Bunı esitken waqıtta shákirtleri qattı qorqısıp, bet-álpetinen jerge jıǵıldı. 7 Biraq Iysa jaqınlap kelip, olarǵa qolın tiygizdi de:

– Turıńlar, qorqpańlar! – dedi.

8 Olar kózlerin ashıp joqarıǵa qaraǵanda, Iysadan basqa hesh kimdi kórmedi.

9 Tawdan tómen túsip baratırǵanda, Iysa olarǵa:

– Adam Ulı ólimnen qayta tirilmesinen burın, bul kórgenlerińizdi hesh kimge aytpańlar! – dep buyırdı.

10 Sonda olar:

– Nege diniy muǵallimler aldı menen Iliyas keliwi shárt deydi? – dep soradı.

11 Iysa olarǵa:

– Durıs, aldı menen Iliyas kelip hámmesin dúzetedi. ^{▼▼ Mal 4:5-6.} 12 Al Meniń sizlerge aytatuǵınım: Iliyas álle qashan kelgen edi, biraq onı adamlar tanımadı hám oǵan qálegenin isledi. Adam Ulı da olardan solay azap shegedi, – dep juwap berdi.

13 Sonda shákirtleri Iysanıń shomıldırıwshı Yaqıya haqqında aytıp turǵanın túsindi.

Jin urǵan balanıń shıpa tabıwı

(Mrk 9:14-32; Luk 9:37-45)

14 Olar xalıqtıń janına kelgende, bir adam Iysaǵa jaqınlap, Onıń aldında dize búkti de:

15 – Iyem, meniń ulıma rehim ete gór. Ol qoyanshıq bolıp awırıp, qattı azap shegip atır, jiyi-jiyi otqa da, suwǵa da jıǵıladı. 16 Men onı Seniń shákirtlerińe ákelgen edim, biraq olar shıpa bere almadı, – dedi.

17 Iysa juwap qaytarıp:

– Háy, isenbeytuǵın, adasqan áwlad! Men qashanǵa deyin sizler menen birge bolaman? Qashanǵa deyin sizlerge shıdayman? Onı Maǵan, bul jerge ákelińler, – dedi.

18 Iysa jinge buyrıq bergende, ol baladan shıǵıp ketti hám bala sol waqıtta-aq shıpa taptı.

19 Sonda shákirtleri Iysaǵa awlaqta kelip:

– Bizler nege jindi quwıp shıǵara almadıq? – dep soradı.

20 Iysa olarǵa:

– Isenimińiz az bolǵanlıqtan. Men sizlerge shının aytıp turman: eger isenimińiz qıshqıl tuqımınday ǵana bolsa da, bul tawǵa: «Usı jerden ana jerge kósh!» deseńler, ol kóshedi. Sizlerdiń qolıńızdan kelmeytuǵın hesh nárse bolmaydı, – dedi. [ 21 ^{▼▼ Bazı qoljazbalarda 21-ayat ta bar: «Biraq, jinlerdiń bunday túrin tek duwa etiw hám oraza tutıw arqalı quwıp shıǵarıwǵa boladı».}]

Iysanıń Óz ólimi hám qayta tiriliwi haqqında jáne bildiriwi

(Mrk 9:30-32; Luk 9:43-45)

22 Shákirtleriniń hámmesi Galilada bolǵanda, Iysa olarǵa:

– Adam Ulı adamlardıń qolına uslap beriledi. 23 Olar Onı óltiredi, biraq Ol úshinshi kúni qayta tiriledi, – dedi.

Buǵan olar qattı qapa boldı.

Ibadatxana salıǵı

24 Olar Kaparnahumǵa kelgende, eki draxmalıq ^{▼▼ Eki draxma – bir draxma jumısshınıń bir kúnlik is haqısı.} Ibadatxana salıǵın jıynawshılar Petrdiń janına kelip, onnan:

– Sizlerdiń Ustazıńız Ibadatxana salıǵın tólemey me eken? – dep soradı.

25 Petr:

– Awa, tóleydi, – dedi.

Ol úyge kelgende, Iysa onnan burın:

– Shimon, sen qalay oylaysań? Jer betiniń patshaları bajılar menen salıqtı kimlerden aladı? Óz balalarınan ba yamasa basqa adamlardan ba? – dep soradı.

26 Petr:

– Basqa adamlardan, – dedi.

Iysa:

– Olay bolsa, patshanıń balaları salıq tólewden azat. 27 Biraq, olardı túsinbewshilikke salmawımız ushın, kólge bar da, qarmaq salıp, eń birinshi ilingen balıqtı al. Onıń awzın ashsań, tórt draxmalıq bir gúmis teńgeni tabasań. Onı alıp, Meniń menen óziń ushın olarǵa tóle, – dedi.