Mat 18 | KaaIBT22L | STEP | Sol waqıtta shákirtleri Iysanıń janına kelip: – Aspan Patshalıǵında eń ullı kim?

‏ Matthew 18

Aspan Patshalıǵında eń ullı kim?

(Mrk 9:33-37, 42-48; Luk 9:46-48; 17:1-2)

1 Sol waqıtta shákirtleri Iysanıń janına kelip:

– Aspan Patshalıǵında eń ullı kim? – dep soradı.

2 Iysa bir kishkene balanı shaqırıp alıp, onı olardıń ortasına turǵızıp qoyıp bılay dedi:

3 – Sizlerge shının aytıp turman: kewillerińizdi ózgertip, balalar sıyaqlı bolmasańız, Aspan Patshalıǵına kire almaysız. 4 Solay etip, kim de kim ózin usı bala sıyaqlı pás tutsa, sol Aspan Patshalıǵında eń ullı boladı. 5 Al kim de kim mınaday bir balanı Meniń atım ushın qabıl etse, onıń Meni qabıl etkeni boladı.

6 Biraq kim de kim Maǵan isenetuǵın mına kishkenelerdiń birewin azǵırsa, onıń moynına úlken digirman tası baylanıp, tereń teńizdiń túbine batırılǵanı oǵan jaqsıraq bolar edi. 7 Adamlardı azǵırıwshı nárseler sebepli, dúnya hásiret shegedi! Azǵırıwshı nárselerdiń bolıwı sózsiz, biraq azǵırıw kim arqalı kelse, sol adam hásiret shegedi!

8 Eger seni qolıń yamasa ayaǵıń azǵırsa, onı shawıp tasla. Eki qolıń menen yamasa eki ayaǵıń menen máńgilik otqa taslanǵanıńnan góre, bir qolıń yamasa bir ayaǵıń menen ómirge eriskeniń ózińe jaqsıraq. 9 Eger seni kóziń azǵırsa, onı oyıp tasla. Eki kóziń menen dozaq otına taslanǵanıńnan góre, jalǵız kóziń menen ómirge eriskeniń ózińe jaqsıraq.

10 Abaylańlar, mına kishkenelerdiń hesh qaysısın da kemsitiwshi bolmańlar! Sebebi sizlerge aytatuǵınım: olardıń aspandaǵı perishteleri aspandaǵı Ákemniń júzin hámme waqıt kórip turadı. [ 11 ^{▼▼ Bazı qoljazbalarda 11-ayat ta bar: «Sebebi Adam Ulı joytılǵanlardı qutqarıw ushın keldi».}]

Joytılǵan qoy tuwralı tımsal

(Luk 15:3-7)

12 – Sizler qalay oylaysızlar? Eger birewdiń júz qoyı bolıp, onıń birewi joytılıp ketse, ol toqsan toǵız qoyın tawda qaldırıp, joytılǵan bir qoyın izlemes pe edi? 13 Sizlerge shının aytıp turman: eger onı tawıp alsa, joytılmaǵan toqsan toǵız qoyınan góre, tawıp alǵan jalǵız qoyına kóbirek quwanadı. 14 Sol sıyaqlı, sizlerdiń aspandaǵı Ákeńiz mına kishkenelerdiń birewiniń de joytılıwın qálemeydi.

Bir-birińizdi haq jolǵa túsirińler, birge duwa etińler!

15 – Eger tuwısqanıń saǵan qarsı gúna islese, oǵan bar da, awlaqta sóylesip, ayıbın betine ashıq ayt. Eger ol sózińdi tıńlasa, onda tuwısqanıńdı ózińe qaytarıp alǵanıń boladı. 16 Eger ol sózińdi tıńlamasa, óziń menen birge bir yamasa eki adamdı ertip oǵan bar, óytkeni aytılǵan barlıq sózleriń eki yamasa úsh adamnıń gúwalıǵında tastıyıqlanıwı tiyis ^{▼▼ Nzm 19:15.}. 17 Eger olardıń da sózin tıńlaǵısı kelmese, onda iseniwshiler jámáátine ayt. Al iseniwshiler jámáátin de tıńlaǵısı kelmese, onda onı butqa tabınıwshı hám salıqshı dep sana.

18 Sizlerge shının aytıp turman: sizler jer betinde neni baylasańız, sol aspanda da baylanadı, jáne de, sizler jer betinde neni sheshseńiz, sol aspanda da sheshiledi.

19 Sizlerge jáne shının aytaman: jer betinde sizlerdiń ekewińiz kelisip ne sorasańız, aspandaǵı Ákem sonı beredi. 20 Sebebi qay jerde eki yamasa úsh adam Meniń atım menen jıynalsa, Men olar menen birgemen.

Rehimsiz xızmetshi tuwralı tımsal

21 Sonda Petr Iysaǵa kelip:

– Iyem, maǵan qarsı gúna islegen tuwısqanıma neshe ret keshirim beriwim kerek? Jeti retke deyin be? – dep soradı.

22 Iysa oǵan:

– Saǵan jeti retke deyin emes, al jetpis jerdegi jeti retke deyin keshirim ber, deymen. 23 Solay etip, Aspan Patshalıǵı óz xızmetshileri menen qarızın esaplasqısı kelgen bir patshaǵa uqsaydı. 24 Ol esaplasa baslaǵanda, onıń aldına onnan on mıń talant ^{▼▼ On mıń talant – bir talant jumısshınıń on bes jıllıq is haqısı.} qarızdar bolǵan birewdi alıp kelipti. 25 Biraq ol qarızın tóley almaytuǵın bolǵanlıqtan, patsha oǵan onıń ózi menen qosıp hayalın, balaların hám barlıq mal-múlkin satıp, qarızın tólewdi buyırıptı. 26 Sonda xızmetshi onıń ayaǵına jıǵılıp: «Taqsır, shıdap turıń, men barlıq qarızımdı tóleymen!» – dep jalınıptı. 27 Xızmetshige janı ashıǵan patsha onı bosatıp, qarızınan keshipti. 28 Al xızmetshi sırtqa shıǵıp, ózine júz dinar ^{▼▼ Júz dinar – bir dinar jumısshınıń bir kúnlik is haqısı.} qarızdar bolǵan bir xızmetshi joldasın ushıratıp: «Maǵan beretuǵın qarızıńdı ber», – dep onı buwındıra baslaptı. 29 Sonda onıń joldası ayaǵına jıǵılıp: «Shıdap tur, men qarızımdı tóleymen», – dep jalınıptı. 30 Biraq ol joldasınıń sózin tıńlamay, ózine beretuǵın qarızın tólemegenshe, onı qamattırıp taslaptı. 31 Onıń basqa xızmetshi joldasları bul waqıyanı kórip, qattı qapa bolıptı hám patshaǵa barıp, bolǵan istiń bárin aytıp beripti. 32 Sonda patsha onı shaqırtıp alıp, oǵan: «Háy, jawız xızmetshi! Sen maǵan jalınǵanıń sebepli ǵana barlıq qarızıńnan keshken edim. 33 Meniń saǵan rehim etkenimdey, seniń de óz joldasıńa rehim etiwiń tiyis emes pe edi?» – depti. 34 Patsha qáhárlenip, ózine beriletuǵın qarızdıń bárin tólep bolmaǵansha, onı jazalawshılardıń qolına tapsırıptı.

35 Eger sizlerdiń hár birińiz tuwısqanıńızdıń gúnasın shın kewlińizden keshirmeseńler, Meniń aspandaǵı Ákem de sizlerge solay isleydi, – dedi.