Mat 19 | KaaIBT22L | STEP | Iysa usı sózlerdi aytıp bolǵannan soń Galiladan jolǵa shıǵıp, Iordannıń arǵı jaǵasındaǵı Yahudiya úlkesine bardı.

‏ Matthew 19

Ajırasıw tuwralı

(Mrk 10:1-12)

1 Iysa usı sózlerdi aytıp bolǵannan soń Galiladan jolǵa shıǵıp, Iordannıń arǵı jaǵasındaǵı Yahudiya úlkesine bardı. 2 Onıń izine kóp xalıq erdi, Ol sol jerde olarǵa shıpa berdi.

3 Iysanıń qasına pariseyler kelip, Onı sınap kóriw ushın:

– Er adamnıń hár qıylı sebep penen hayalınan ajırasıwı nızamǵa tuwrı kele me? – dep soradı.

4 Iysa olarǵa juwap qaytarıp bılay dedi:

– Jaratıwshı eń basta olardı erkek hám hayal qılıp jaratqanın ^{▼▼ Jar 1:27.} oqımaǵansızlar ma? 5 Jáne Ol bılay degen: «Sonlıqtan er adam ata-anasın qaldırıp, óz hayalına qosıladı hám ekewi bir dene boladı» ^{▼▼ Jar 2:24.}. 6 Solay etip, olar endi eki emes, al bir dene boladı. Sol sebepli, Quday qosqanlardı adam ajıratpasın.

7 Olar Iysaǵa:

– Sonda nege Muwsa payǵambar er adamǵa ajırasqanda hayalına talaq xat berip ajırasıwdı buyırǵan? ^{▼▼ Nzm 24:1.} – dedi.

8 Iysa olarǵa:

– Sizler tas bawır bolǵanlıqtan, Muwsa sizlerge hayallarıńız benen ajırasıwǵa ruxsat bergen. Biraq basta olay emes edi. 9 Meniń sizlerge aytatuǵınım: kim de kim óz hayalı menen neke hadallıǵın buzıwdan basqa sebep penen ajırasıp, basqa hayal alsa, ol neke hadallıǵın buzǵan boladı ^{▼▼ Bazı qoljazbalarda mına sózler de bar: «Ajırasqan hayaldı alǵan adam da neke hadallıǵın buzǵan boladı».}, – dedi.

10 Sonda Iysanıń shákirtleri Oǵan:

– Eger er adamnıń hayalına degen wazıypası usınday bolsa, onda úylenbegen jaqsıraq eken, – dedi.

11 Iysa olarǵa:

– Bunı hámme de qabıl ete almaydı, biraq kimge Qudaydan berilse, sol ǵana qabıl ete aladı. 12 Óytkeni úylenbeytuǵın hár túrli adamlar bar: geybirewleri aqta bolıp tuwıladı, geybirewlerin adamlar aqta qılıp taslaydı, al bazıları Aspan Patshalıǵına xızmet etiw ushın óz erki menen úyleniwden bas tartadı. Kim bul sózdi qabıl ete alsa, sol qabıl etsin, – dedi.

Iysanıń balalarǵa pátiya beriwi

(Mrk 10:13-16; Luk 18:15-17)

13 Sol waqıtta adamlar Iysaǵa olardıń ústine qolın qoyıp duwa etsin dep, balaların alıp keldi. Al shákirtler olarǵa keyidi. 14 Biraq Iysa:

– Balalardıń Maǵan keliwine ruxsat berińler, olarǵa tosqınlıq jasamańlar. Sebebi Aspan Patshalıǵı usındaylardiki, – dedi.

15 Sońınan Ol balalardıń ústine qolın qoyıp duwa etti de, sol jerden ketip qaldı.

Baylıq hám máńgilik ómir

(Mrk 10:17-31; Luk 18:18-30)

16 Sonda bir jigit Iysadan:

– Ustaz! Máńgilik ómirge iye bolıwım ushın qanday iygilikli isler islewim kerek? – dep soradı.

17 Iysa oǵan:

– Sen nege Mennen iygilik haqqında soradıń? Tek Quday ǵana iygilikli. Al máńgilik ómirge eriskiń kelse, Onıń buyrıqların orınla, – dedi.

18 Jigit Iysadan:

– Qanday buyrıqlardı? – dep soradı.

Iysa:

– «Adam óltirme, neke hadallıǵın buzba, urlıq isleme, jalǵan gúwalıq berme, 19 ata-anańdı húrmetle ^{▼▼ Shıǵ 20:12-16; Nzm 5:16-20.} hám ózińdi súygeniń sıyaqlı, janıńdaǵı adamdı da súy!» ^{▼▼ Leb 19:18.}, – dedi.

20 Jas jigit Oǵan:

– Men bulardıń hámmesin orınlap kiyatırman, jáne ne jetispeydi? – dedi.

21 Iysa oǵan:

– Eger minsiz bolǵıń kelse, barıp barlıq mal-múlkińdi satıp, aqshasın jarlılarǵa ber. Sonda seniń ǵáziyneń aspanda boladı. Sońınan kelip, Meniń izime er, – dedi.

22 Bul sózlerdi esitken jas jigit qapa bolıp, sol jerden ketip qaldı. Óytkeni onıń baylıǵı kóp edi.

23 Iysa Óz shákirtlerine:

– Sizlerge shının aytıp turman: bay adamnıń Aspan Patshalıǵına kiriwi qıyın. 24 Taǵı sizlerge aytatuǵınım: bay adamnıń Qudaydıń Patshalıǵına kiriwinen góre, túyege iyneniń kózinen ótiw ańsatıraq, – dedi.

25 Bunı esitken shákirtleri qattı tań qalısıp:

– Olay bolsa, kim qutqarıla aladı? – dep soradı.

26 Al Iysa olarǵa qarap:

– Bul adamlardıń qolınan kelmeydi, biraq Quday ushın múmkin emes nárse joq, – dedi.

27 Sonda Petr juwap qaytarıp, Oǵan:

– Minekey, bizler hámme nársemizdi taslap, Seniń izińe erdik. Bizler nege erisemiz? – dedi.

28 Iysa olarǵa:

– Sizlerge shının aytıp turman: dúnya jańalanǵannan soń, Adam Ulı Óziniń saltanatlı taxtına otırǵanda, Meniń izime erip júrgen sizler de on eki taxtqa otırıp, Izrail xalqınıń on eki urıwına húkimdarlıq qılasızlar. 29 Sonda Meniń atım ushın óz úylerin, aǵa-inilerin, apa-qarındasların, ata-anasın ^{▼▼ Bazı qoljazbalarda «hayalın» degen sóz de bar.}, balaların, mal-múlkin taslap shıqqan hár kim júz ese artıǵı menen aladı hám máńgilik ómirge iye boladı. 30 Biraq birinshilerdiń kóbisi sońǵılar, sońǵılardıń kóbisi birinshiler boladı, – dedi.