Mat 20 | KaaIBT22L | STEP | Iysa jáne bılay dedi: – Aspan Patshalıǵı óziniń júzim baǵına jumısshılardı jallap alıw ushın tań azanda shıqqan úy iyesine uqsaydı.

‏ Matthew 20

Júzim baǵındaǵı jumısshılar tuwralı tımsal

1 Iysa jáne bılay dedi:

– Aspan Patshalıǵı óziniń júzim baǵına jumısshılardı jallap alıw ushın tań azanda shıqqan úy iyesine uqsaydı. 2 Ol jumısshılar menen kúnine bir dinar tólewge kelisip, olardı óziniń júzim baǵına jiberipti. 3 Saat toǵızlar shamasında shıǵıp, bazarda jumıssız turǵan adamlardı kórip, 4 olarǵa: «Sizler de meniń júzim baǵıma barıńlar, men sizlerge tiyisli haqılarıńızdı beremen», – degende, olar barıptı. 5 Ol saat on ekiler shamasında da, tústen keyin úshler shamasında da shıǵıp, taǵı usılay islepti. 6 Keshki besler shamasında da shıǵıp, ele jumıssız turǵan basqa adamlardı kórip, olarǵa: «Nege bul jerde kún boyı jumıssız tursızlar?» – dep soraptı. 7 Olar: «Sebebi bizlerdi hesh kim jallap alǵan joq», – dep juwap beripti. Ol: «Sizler de meniń júzim baǵıma barıp, miynet etińler ^{▼▼ Bazı qoljazbalarda «ózlerińizge tiyisli haqılarıńızdı alasızlar» degen sózler de bar.}», – depti. 8 Kún kesh bolǵanda, baǵdıń iyesi óziniń basqarıwshı xızmetkerine: «Jumısshılardı shaqırıp alıp, miynet haqıların ber. Eń sońǵı kelgenlerinen baslap, eń aldınǵı kelgenleri menen juwmaqla», – depti. 9 Sonda keshki besler shamasında kelgenler bir dinardan alıptı. 10 Eń aldı menen kelgenler: «Bizler kóbirek alarmız», – dep oylaptı, biraq olar da bir dinardan alıptı. 11 Is haqıların alǵan olar úy iyesine tońqıldap: 12 «Mına eń sońında kelgenler bir saat ǵana jumıs isledi. Al siz olardı kúni boyı azaplanıp, ıssıǵa kúyip jumıs islegen bizler menen teń ettińiz», – depti. 13 Biraq baǵdıń iyesi juwap qaytarıp, olardıń birewine: «Háy, dostım, men saǵan ádalatsızlıq etip turǵan joqpan. Sen meniń menen bir dinarǵa kelisken joq pa ediń? 14 Haqıńdı alıp, jónińe ket. Men mına sońǵı adamǵa da saǵan bergenimdey bergim keledi. 15 Meniń óz aqsham menen qálegenimdi islewime erkim joq pa? Meniń saqıylıǵıma ishi tarlıq qılıp tursań ba?» – depti.

16 Solay etip, sońǵılar birinshiler, birinshiler sońǵılar boladı ^{▼▼ Bazı qoljazbalarda mına sózler de bar: «Sebebi shaqırılǵanlar kóp, tańlanǵanlar az».}.

Iysanıń Óz ólimi hám qayta tiriliwi haqqında úshinshi ret bildiriwi

(Mrk 10:32-34; Luk 18:31-34)

17 Erusalimge baratırǵanda, Iysa jolda on eki shákirtin awlaqqa shaqırıp alıp, olarǵa:

18 – Minekey, bizler endi Erusalimge qaray kóterilip baratırmız. Sol jerde Adam Ulı bas ruwxaniyler menen diniy muǵallimlerdiń qolına uslap beriledi. Olar Onı ólimge húkim etip, 19 Onı masqaralaw, sabaw, atanaq aǵashqa shegelew ushın, basqa millet adamlarına tapsıradı. Biraq Ol úshinshi kúni qayta tiriledi, – dedi.

Yaqıp hám Yuxannıń anasınıń ótinishi

(Mrk 10:35-45)

20 Sol waqıtta Zebedeydiń ullarınıń anası ulları menen Iysanıń qasına keldi. Onıń ayaǵına jıǵılıp, bir nárse soramaqshı boldı.

21 Iysa onnan:

– Tilegiń ne? – dep soradı.

Hayal Oǵan:

– Óz patshalıǵıńda usı eki ulımnıń birewin oń jaǵıńa, ekinshisin sol jaǵıńa otırǵızıwdı wáde et, – dedi.

22 Al Iysa juwap qaytarıp:

– Sizler ne sorap turǵanıńızdı bilmeysizler. Sizler Men ishetuǵın azap kesesinen ishe alasızlar ma? ^{▼▼ Bazı qoljazbalarda mına sózler de bar: «Meniń shomıldırılatuǵınımday, shomıldırıla alasızlar ma?»} – dedi.

Olar:

– Awa, ishe alamız, – dedi.

23 Iysa olarǵa:

– Meniń kesemnen ishesizler ^{▼▼ Bazı qoljazbalarda mına sózler de bar: «Meniń shomıldırılǵanımday, sizler de solay shomıldırılasızlar».}. Biraq, Ózimniń oń jaǵım menen sol jaǵıma otırǵızıw Meniń erkimde emes. Ákem kimlerge arnaǵan bolsa, solar otıradı, – dedi.

24 Bunı esitken on shákirti aǵalı-inili ekewine ashıwlanıp qaldı. 25 Biraq Iysa olardı qasına shaqırıp alıp, bılay dedi:

– Basqa milletler arasında húkimdarları xalıqqa zulımlıq etip, basshıları ústemlik penen basqaratuǵının bilesizler. 26 Biraq, sizlerdiń arańızda bunday bolmasın. Arańızda kim ullı bolǵısı kelse, sol sizlerge xızmetshi bolıwı shárt. 27 Arańızda kim birinshi bolǵısı kelse, sol sizlerge qul bolıwı shárt. 28 Adam Ulı Ózine xızmet ettiriwge emes, al Ózi xızmet etiwge hám kóplerdiń azatlıq qunın tólew ushın, Óz janın baǵıshlawǵa keldi.

Iysanıń eki soqırǵa shıpa beriwi

(Mrk 10:46-52; Luk 18:35-43)

29 Olar Erixo qalasınan shıqqanda, kóp xalıq Iysanıń izine erdi. 30 Sonda joldıń shetinde otırǵan eki soqır adam Iysanıń ótip baratırǵanın esitip:

– Iyem, Dawıttıń Urpaǵı! Bizlerge rehim ete gór! – dep baqırdı.

31 Xalıq únlerin shıǵarmawdı aytıp, olarǵa keyidi. Biraq olar onnan da beter qattı baqırıp:

– Iyem, Dawıttıń Urpaǵı! Bizlerge rehim ete gór! – dedi.

32 Iysa toqtap, olardı shaqırıp aldı da:

– Meniń ózlerińiz ushın ne islewimdi qáleysizler? – dep soradı.

33 Olar:

– Iyem, kózlerimizdi ashıwıńdı, – dep juwap berdi.

34 Iysa olarǵa janı ashıp, kózlerine qolın tiygizdi.

Sol waqıtta-aq olardıń kózleri ashılıp, Onıń izine erdi.