‏ Matthew 9

Láń adamnıń shıpa tabıwı

(Mrk 2:1-12; Luk 5:17-26)

1Sońınan Iysa qayıqqa minip, kóldiń arǵı jaǵasına ótti de, Óz qalasına qaytıp keldi. 2Sonda adamlar tóseginde jatırǵan bir láń adamdı kóterip, Oǵan alıp keldi. Iysa olardıń isenimin kórip, láń adamǵa:

– Balam, jigerli bol, gúnalarıń keshirildi! – dedi.

3Sonda diniy muǵallimlerdiń geybirewleri ishinen: «Bul Qudayǵa til tiygizip tur-ǵo!» – dedi.

4Iysa olardıń ne oylaǵanın bilip, olarǵa:

– Ishlerińizden nege jamanlıq oylap tursızlar? 5Qaysısın aytıw ańsatıraq: «Gúnalarıń keshirildi», – dew me yamasa «Ornıńnan turıp júre ber», – dew me? 6Biraq, Adam Ulınıń jer betinde gúnalardı keshiriwge biyligi bar ekenin bilip qoyıńlar, – dedi de, láń adamǵa: – Ornıńnan turıp tósegińdi al da, úyińe bar! – dedi.

7Láń adam ornınan turıp, úyine ketti. 8Bunı kórgen adamlardı qorqınısh biylep, adamlarǵa usınday biylik bergen Qudaydı maqtadı.

Mattanıń shákirt bolıwı

(Mrk 2:13-17; Luk 5:27-32)

9Iysa sol jerden ketip baratırıp salıq keńsesinde otırǵan Matta atlı adamdı kórdi de, oǵan:

– Meniń izime er, – dedi.

Ol ornınan turıp, Iysanıń izine erdi.

10Iysa onıń úyinde dasturxan basında otırǵanda, kóplegen salıqshılar menen gúnakarlar kelip, Ol hám Onıń shákirtleri menen birge dasturxanlas boldı. 11Pariseyler bunı kórip, Onıń shákirtlerinen:

– Ustazıńız nege salıqshılar hám gúnakarlar menen birge as iship otır? – dep soradı.

12Bunı esitken Iysa olarǵa:

– Shıpakerge deni sawlar emes, al awırıwlar mútáj. 13Sizler barıp: «Men qurbanlıqtı emes, al miyrim-shápáátti qáleymen» ▼

▼ Hosh 6:6.

, – degen sózlerdiń mánisin bilip alıńlar. Sebebi Men haq adamlardı emes, al gúnakarlardı shaqırıw ushın keldim, – dedi.

Oraza haqqında soraw

(Mrk 2:18-22; Luk 5:33-39)

14Sol waqıtta Yaqıyanıń shákirtleri kelip, Iysadan:

– Bizler de, pariseyler de jiyi-jiyi oraza tutamız, al Seniń shákirtleriń nege oraza tutpaydı? – dep soradı.

15Iysa olarǵa:

– Toyǵa kelgenler kúyew olar menen birge bolǵan waqıtta qayǵıra ala ma? Biraq, olardan kúyew tartıp alıp ketiletuǵın kúnler keledi, sonda olar oraza tutadı.

16Hesh kim eski kiyimge jańa tawardan jamaw jamamaydı. Olay etse, juwǵanda jańa jamaw qısqarıp, eski kiyimnen jırtılıp qaladı hám jırtıq burınǵısınan beter boladı.

17Jańa sharaptı da hesh kim eski meske quymaydı. Olay etse, mes jarılıp, sharap ta aǵıp ketedi, mes te buzıladı. Jańa sharap jańa meske quyıladı, sonda ekewi de saqlanadı, – dedi.

Tirilgen qız hám shıpa tapqan hayal

(Mrk 5:21-43; Luk 8:40-56)

18Iysa olarǵa usılardı aytıp turǵanda qasına bir májilisxananıń basshısı kelip, Onıń ayaǵına jıǵıldı da:

– Meniń qızım jańa ǵana óldi. Sen kelip oǵan qolıńdı tiygiz, sonda ol tiriledi, – dedi.

19Iysa ornınan turıp, shákirtleri menen birge oǵan erdi.

20Sonda on eki jıldan beri qan ketip awırıp júrgen bir hayal Iysanıń artına jaqınlap kelip, Onıń kiyiminiń shetine qolın tiygizdi. 21Sebebi hayal ishinen: «Onıń kiyimine ǵana qolımdı tiygizsem, shıpa tabaman», – dep oylaǵan edi. 22Iysa burılıp, onı kórdi de:

– Qızım, jigerli bol, isenimiń seni qutqardı! – dedi.

Hayal sol waqıtta-aq shıpa taptı.

23Iysa basshınıń úyine kelgende, sıbızǵıshılardı hám tınıshsızlanıp turǵan adamlardı kórip, 24olarǵa:

– Shıǵıńlar! Qız ólgen joq, tek uyıqlap atır, – dedi.

Olar Iysanıń ústinen kúldi. 25Adamlar sırtqa shıǵarılǵannan keyin, Iysa ishke kirip qızdıń qolın uslaǵanda, qız ornınan turdı. 26Bul waqıya tuwralı xabar pútkil dógerekke jayıldı.

Eki soqırdıń shıpa tabıwı

27Iysa sol jerden ketip baratırǵanda Onıń izine eki soqır adam erip, Oǵan:

– Dawıttıń Urpaǵı ▼

▼ Dawıttıń Urpaǵı – Masiyxtıń basqa ataǵı.

! Bizlerge rehim ete gór! – dep baqırıstı.

28Ol úyge kirgende, Onıń qasına soqırlar da keldi. Iysa olardan:

– Meniń bunı isley alatuǵınıma isenesizler me? – dep soradı.

Olar:

– Awa, Iyem, isenemiz, – dep juwap berdi.

29Sonda Iysa olardıń kózlerine qolın tiygizip:

– Sizlerge isenimińiz boyınsha bolsın, – degende, 30olardıń kózleri kóre basladı.

Iysa olarǵa:

– Abaylań, bunı hesh kim bilmesin! – dep qatań tapsırdı.

31Biraq olar sırtqa shıǵıp, Iysa tuwralı xabardı pútkil dógerekke jaydı.

Jin urǵan bir gúńelektiń shıpa tabıwı

32Olar shıǵıp keteyin dep atırǵan waqıtta adamlar Iysaǵa jin urǵanı sebepli gúńelek bolǵan bir adamdı alıp keldi. 33Jin quwıp shıǵarılǵannan keyin, gúńelek adam sóyley basladı. Adamlar tań qalısıp:

– Bunday waqıya Izrailda hesh qashan bolǵan emes, – desti.

34Biraq pariseyler:

– Ol jinlerdi jinlerdiń baslıǵınıń kúshi menen quwıp shıǵarıp júr, – desti.

Iysanıń adamlarǵa janı ashıwı

35Sonnan soń, Iysa barlıq qala hám awıllardı aralap júrdi. Olardıń májilisxanalarında tálim berdi hám Aspan Patshalıǵı tuwralı Xosh Xabardı járiyalap, barlıq awırıwlarǵa hám hámme hálsiz adamlarǵa shıpa berdi. 36Ol kóp xalıqtı kórip, olarǵa janı ashıdı, óytkeni olar shopansız qoylarǵa uqsap qıynalǵan hám pıtırańqı edi. 37Sonda Ol shákirtlerine:

– Orılatuǵın egin kóp, biraq jumısshılar az. 38Sonlıqtan zúrááttiń iyesi bolǵan Iyemizden Óziniń atızına egindi oratuǵın jumısshılar jiberiwin duwa etip sorańlar, – dedi.