Matthew 4:12-17
Iysanıń Óz xızmetin baslawı
(Mrk 1:14-15; Luk 4:14-15)
12Iysa Yaqıyanıń tutqınǵa alınǵanın esitip, Galila úlkesine qaytıp ketti. 13Ol Nasıra qalasın qaldırıp, Zebulon hám Naftaliy dógeregindegi kóldiń jaǵasında jaylasqan Kaparnahum qalasına kelip ornalastı. 14Solay etip, Iyshaya payǵambar arqalı aytılǵan mına sózler orınlandı: 15«Háy, Zebulon jeri menen Naftaliy jeri,Teńizge baratuǵın joldaǵı,
Iordannıń arǵı jaǵasındaǵı,
Basqa milletler jasaytuǵın Galila eli!
16Qarańǵılıqta jasaǵan xalıq
Úlken bir jarıqtı kórdi.
Ólim qarańǵısında jasaǵanlar ushın,
Jaqtılıq nurı tústi» ▼.
17Sol waqıttan baslap, Iysa: – Táwbe etińler! Sebebi Aspan Patshalıǵı jaqınladı! – dep járiyalay basladı.
Copyright information for
KaaIBT22L