Micah 3
Basshılardıń hám payǵambarlardıń gúnası
1Sonda men bılay dedim:«Tıńlańlar, Yaqıp urpaǵınıń basshıları,
Izrail xalqınıń húkimdarları!
Sizler ádalattıń ne ekenin biliwińiz kerek emes pe?
2Al sizler bolsa, jaqsılıqtan jerkenip,
Jamanlıqtı jaqsı kóresiz.
Sizler xalqımnıń terisin sıyırıp,
Etin súyeginen sılıp alasız.
3Xalqımnıń góshin jeysiz: terisin sıyırıp, súyeklerin maydalaysız,
Qazanǵa salınatuǵın góshtey, tabaǵa pisiretuǵın ettey olardı tuwraysız.
4Jaqın arada sizler Jaratqan Iyege jalbarınasız,
Degen menen, sol waqıtta jawızlıq islegenińiz ushın,
Ol sizlerden júzin jasıradı».
5Xalqın joldan azǵırǵan,
Ózin toydırǵanǵa tınıshlıq tilegen,
Al awzın maylamaǵanǵa urıs járiyalaǵan payǵambarlarǵa,
Jaratqan Iye bılay deydi:
6«Sonıń ushın, ústińizdi qarańǵı tún qaplaydı,
Qarańǵılıqtan hesh qanday ayan kóre almaysız.
Háy, payǵambarlar, sizler ushın quyash batadı,
Kúndizińiz qarańǵılıqqa aylanadı.
7Wáliyler shermende boladı,
Uyatqa qaladı palkerler.
Quday olarǵa juwap bermegeni ushın,
Uyattan júzlerin jawıp aladı».
8Biraq men Yaqıp urpaǵına ayıpların,
Izrail xalqına gúnaların bildiriw ushın,
Jaratqan Iyeniń Ruwxı menen kúshke,
Ádillik hám batıllıqqa tolaman.
9Qulaq salıń, Yaqıp urpaǵınıń basshıları,
Izrail xalqınıń húkimdarları!
Ádillikten jerkendińiz,
Haqıyqattı burmaladıńız.
10Qanlardıń esesine tikledińiz Siondı,
Ádilsizlik jolı menen qurdıńız Erusalimdi.
11Basshıları para alıp, húkim shıǵaradı,
Ruwxaniyleri dámegóylik penen tálim beredi,
Payǵambarları pul alıp, payǵambarshılıq qıladı.
Sonday bolsa da, olar:
«Jaratqan Iye bizler menen birge,
Basımızǵa túspeydi hesh qanday apat», – dep,
Jaratqan Iyege arqa súyegisi keledi.
12Sonlıqtan sizler sebepli Sion egin maydanı kibi súriledi,
Sizler sebepli Erusalim qarabaqanaǵa aylanadı.
Ibadatxana turǵan tawdı toǵay qaplaydı.
Copyright information for
KaaIBT22L