Mic 4 | KaaIBT22L | STEP | Aqırǵı kúnler kelgende, Jaratqan Iyeniń Úyi qurılǵan taw, Barlıq tawlardan joqarı bolıp, Hámme tóbeshiklerden mártebeli bolar. Íǵıp barar ol jerge xalıqlar.

‏ Micah 4

Jaratqan Iyeniń basqarıwı

1 Aqırǵı kúnler kelgende,
Jaratqan Iyeniń Úyi qurılǵan taw,
Barlıq tawlardan joqarı bolıp,
Hámme tóbeshiklerden mártebeli bolar.
Íǵıp barar ol jerge xalıqlar.
2 Kóp milletler kelip, bılay deydi:
«Kelińler, Jaratqan Iyeniń tawına shıǵayıq,
Yaqıptıń Qudayınıń Úyine kireyik.
Ol bizlerge Óz jolların úyretsin,
Bizler Onıń jolınan júreyik».
Óytkeni nızam shıǵar Sionnan,
Jaratqan Iyeniń sózi keler Erusalimnen.
3 Kóp xalıqlardı Jaratqan Iye húkim qılar,
Jaqın hám uzaqtaǵı kúshli milletler arasındaǵı,
Jánjellerin sheship berer.
Olar qılıshlardan paznalar soǵar,
Nayzalardan oraqlar isler.
Bir-birine qılısh kótermes xalıqlar,
Sawash qılıwdı endi úyrenbes olar.
4 Hár kim óz júzimzarınıń, ánjir aǵashınıń astında tınısh jasaydı,
Hesh kim olarǵa abay etpeydi.
Bunı Álemniń Jaratqan Iyesiniń Ózi aytadı.

5 Barlıq xalıqlar óz qudaylarına erse de,
Bizler Qudayımız Jaratqan Iyeniń jolınan máńgi-baqıy júremiz.

Izrail xalqı súrginnen qaytıp keledi

6 «Sol aqırǵı kúnler kelgende,
– deydi Jaratqan Iye, –
Jıynap alarman qırǵınǵa ushıraǵanlardı,
Toplayman quwǵın bolǵanlardı,
Azapqa duwshar etkenlerimdi.
7 Qırǵınǵa ushıraǵanlardı aman saqlayman,
Quwǵın bolǵanlardan kúshli xalıq dóretemen,
Sol kúnnen baslap, máńgige Men, Jaratqan Iye,
Sion tawında olarǵa húkimdarlıq qılaman.

8 Háy, súriwdiń gúzetiw minarası,
Qız Sionnıń qorǵanı,
Húkimdarlıǵıń ózińe qaytar,
Háy, qız Erusalim, patshalıǵıń qayta tiklener».

9 Erusalim, nege sen dad salıp, zarlaysań?
Patshań bolmaǵanı ushın ba?
Tolǵaq tutqan hayalday nege azap shegeseń?
Másláhátshiń ólgeni ushın ba?
10 Háy, qız Sion, tuwıp atırǵan hayal sıyaqlı,
Ah urıp, ózińdi hár tárepke tasla.
Sebebi qaladan shıǵıp, shól dalalarǵa barıp qonıslaysań,
Keyin Babiloniyaǵa áketilip, súrgin etileseń.
Biraq ol jerde sen azatlıq tabasań,
Qutqaradı seni Jaratqan Iye dushpan qolınan.
11 Degen menen, saǵan qarsı jıynaldı bir talay milletler,
Sen haqqında bılay dep aytadı olar:
«Kelińler, Siondı xorlayıq,
Basına túskenlerin tamasha qılayıq».
12 Biraq bilmeydi olar Jaratqan Iyeniń niyetin,
Olardı qırmanǵa aparılatuǵın dán bawlarınday jıynap atır,
Onıń usı jobasın olar túsinbeydi.
13 Jaratqan Iye bılay deydi:
«Háy, qız Sion, tur da, olardı basqılay basla!
Sebebi temirden qılarman seniń shaqlarıńdı,
Qoladan isleymen seniń tuyaqlarıńdı,
Ezip, maydalap taslaysań kóp xalıqlardı.
Baǵıshlaysań Maǵan alǵan oljalarıńdı,
Pútkil jer júziniń Iyesi bolǵan Jaratqan Iyege».